“Bɛyɛ sɛ Dua Nna”

BƐBORO mfe mpem abiɛsa a atwam ni no, Mose kyerɛwee sɛ: “Yɛn mfirihyiam nna, emu wɔ mfe aduɔson, na sɛ ɛboro so a, na ɛredu aduɔwɔtwe, na emu ahoahoade yɛ ɔbrɛ ne ahuhude.”—Dwom 90:10.

Ɛmfa ho nkɔso a aba wɔ nnuruyɛ mu no, onipa nkwa nna da so te sɛ nea na ɛte wɔ Mose nna no mu ara. Nanso, nnipa renkɔ so ntra asetra a etwam ntɛmso no mu bere nyinaa. Onyankopɔn kae wɔ Bible nhoma a ɛne Yesaia mu sɛ: “Me man nna bɛyɛ sɛ dua nna, na wɔn a mapaw wɔn yi bedi wɔn nsa ano adwuma.”—Yesaia 65:22.

Nnua a enyin kyɛ sen biara wɔ Bible nsase so biako ne ngo dua. Dua a ne mfonini wɔ ha yi no yɛ ngo nnua pii a adi mfirihyia apem a ɛda so wɔ ahoɔden wɔ Galilea no mu biako. Bere bɛn na nnipa betumi anyin akyɛ saa? Nkɔmhyɛ koro no ara kyerɛkyerɛ mu sɛ, ɛbɛyɛ bere a Onyankopɔn bɛbɔ “ɔsoro foforo [ne asase foforo]” no.—Yesaia 65:17.

Adiyisɛm nhoma no nso hyɛ “ɔsoro foforo ne asase foforo” ho nkɔm—ɔsoro nniso foforo ne adesamma abusua foforo a ɛbɛba, bere a Onyankopɔn ‘bɛpopa wɔn aniwam nusu nyinaa, na owu nni hɔ bio, na awerɛhow ne osu ne ɛyaw bi nni hɔ bio’ no.—Adiyisɛm 21:1, 4.

Onyankopɔn bɔhyɛ yi bɛbam nnansa yi ara. Afei, ngo dua nna mpo bɛyɛ sɛ nnɔnhwerew 24 da kɛkɛ. Na yebenya bere pii de adi yɛn nsa ano adwuma akosi ase.