Dɛn na Ɛbɛba Kristoman Mmeae Kronkron no So?

WƆN a wotintim nhoma Holy Places of Christendom a Stewart Perowne a otutu fam de hwehwɛ tete nneɛma mu kyerɛwee no bisa sɛ: “Kristofo ahyehyɛde bɛn muni na obetumi agyina Calvary wɔ Church of the Resurrection [anaasɛ, Church of the Holy Sepulcher] no mu wɔ Jerusalem a ne ho nnwiriw no: efisɛ ɛha a wɔde mfehaha pii som na wɔko peree mpo no ne baabi a Kristoman fi ankasa.”

Obiara ntumi nkyerɛe sɛ wosii asɔredan yi sii Calvary, baabi a Yesu Kristo wui no. Nokwarem no, ansa na Romafo ɔhempɔn Constantine rebɔ ne tirim sɛ obesi asɔredan wɔ hɔ no, na abosonsomfo asɔrefi bi si hɔ. Afei nso, Yesu se: “Onyankopɔn yɛ Honhom, na wɔn a wɔsɔre no no, ɛsɛ sɛ wɔsɔre no honhom ne nokware mu.” (Yohane 4:24) Asɔrefo a wɔte saa no nsom mmeae “kronkron” a aniwa hu.

Bere bi na Yerusalem na Onyankopɔn asɔrefi si, ma enti na ɛne baabi a nokware som wɔ. Nanso, nokware a kurow no mufo anni nti, Yehowa pow wɔn, sɛnea Yesu hyɛɛ nkɔm no. (Mateo 23:37, 38) Yesu hyɛɛ nkɔm sɛ wɔbɛsɛe saa beae a wɔsom wɔ hɔ, a nnipa pii kɔɔ so buu no sɛ kronkronbea no. Nsɛm a ɔkae no nyaa mmamu bere a Romafo sɛee Yerusalem ne n’asɔrefi wɔ 70 Y.B. mu no.​—Mateo 24:15, 21.

Ɛrenkyɛ Yesu nkɔmhyɛ no benya mmamu kɛse wɔ Kristoman nyamesom mmeae a ɛkyerɛ sɛ ɛyɛ kronkronbea no nyinaa so. Ɛdɔm a wɔmpɛ nyamesom a wɔfrɛ wɔn “amamfoyɛ akyide no” rebɛsɛe Kristoman ne ne mmeae kronkron. (Daniel 11:31) Yehowa Adansefo de anigye bɛka ahodwiriw asɛm a ebesi no ho asɛm pii akyerɛ wo.

[Mfonini wɔ kratafa 32]

Church of the Holy Sepuicher no mu asɔredan bi

[Mfonini Fibea]

Pictorial Archive (Near Eastern History) Est.