Ɔdansefo a N’ani Afura Gye Obi Nkwa

Vicente yɛ onifuraefo a wadi mfe 75. Wasom sɛ akwampaefo boafo wɔ Spain bɛyɛ mfe anum, ma ɔde nsɛmma nhoma bɛyɛ 110 ma ɔsram biara, na ɔyɛ Bible adesua ahorow abiɛsa. Da koro anadwo a na awɔw wom kɛse no ne hokafo a na ɔtaa ne no kɔ adansedi no amma ma wɔasan akɔsra obi a ɔwɔ asɛm no ho anigye a na wɔahyehyɛ sɛ wɔbɛsan akɔ hɔ anadwofa 9.15 no. Esiane sɛ na bere a ɔde bɛkɔ akɔyɛ sankɔhwɛ no nsoe na ɔmpɛ sɛ ɔsɛe bere no de twɛn nti, Vicente yɛɛ n’adwene sɛ ɔno nkutoo bɛyɛ ofie ofie adansedi kakra. Ɔbarima a ɔbaa pon no ano no gyee no ayamye so, tiee Ahenni anidaso no ho nsɛm na ogyee nsɛmma nhoma abien a ɔde kyerɛe no. Adapɛn kakra okyi bere a ɔsan kɔɔ hɔ bio sɛ ɔde nsɛmma nhoma foforo a aba no bi rekɔma no no, ɔbarima no kae sɛ: “Owura Vicente, sɛ woamma me pon ano saa anadwo no a, anka minnyina ha nnɛ a me ne wo rekasa. Na mayɛ m’adwene sɛ mɛbɔ me ho tuo akum me ho. Saa bere no na owu ara na mepɛ sɛ miwu, nanso mprempren, bere a mekenkan nsɛmma nhoma yi na misua Ahenni no ho ade pii no, ɔpɛ a mewɔ sɛ mɛtra ase no mu reyɛ den bere nyinaa.”