Nea Ɛkyerɛ Ma Yɛn
ƐWOM sɛ Onyankopɔn diyifo biara nni asase so nnɛ a ɔyɛ anwonwade a otumi nyan awufo de, nanso yebetumi anya ahotoso sɛ ɛrenkyɛ wɔbɛsan de yɛn adɔfo a wɔawuwu no aba nkwa mu bio.
Bere tiaa bi ansa na ɔrekɔ Nain, bere a Yesu wɔ Yerusalem a na ɔrekɔ akodi Yudafo Twam afahyɛ no wɔ fefɛw bere no mfiase hɔ wɔ 31 Y.B. mu no, ɔhyɛɛ awufo a wobenyan wɔn yi ho bɔ bi a ɛyɛ nwonwa. Ɛde besi saa bere no ɛda adi sɛ na onnyanee obiara. Nanso, ɔkae sɛ: “Sɛnea agya no nyan awufo na ɔma wɔn nkwa no, saa ara na ɔba no nso ma wɔn a ɔpɛ nkwa. Na sɛnea agya no wɔ nkwa n’ankasa mu no, saa ara na ɔde ama ɔba no nso sɛ onnya nkwa n’ankasa mu; na wama no tumi sɛ ommu atɛn nso, efisɛ ɔyɛ onipa ba. Mommma eyi nnyɛ mo nwonwa efisɛ dɔn no reba a wɔn a wɔwɔ ada mu nyinaa bɛte ne nne, na wɔafi adi; wɔn a wɔayɛ papa no bɛkɔ nkwa sɔre mu, na wɔn a wɔayɛ bɔne no bɛkɔ atemmu sɔre mu.”—Yoh. 5:21, 26-29.
Saa nyamesom mu asɔretiafo a na Yesu rekasa akyerɛ wɔn no annye no anni. Bere a efii ase trɛwee wɔ Yudea nyinaa sɛ Yesu anyan okunafo no babarima no wɔ Galilea no, wɔpowee sɛ wobegye adi. Nokwarem no, mfe abien akyi bere a Yesu nyan n’adamfo Lasaro no, wɔn bo fuwii kɛse na wɔyɛɛ ne wu ho nhyehyɛe. Wotuu “agyina sɛ wobekum Lasaro nso, efisɛ ne nti na Yudafo pii . . . kogyee Yesu dii.”—Yoh. 12:10, 11; 11:38-53
Nanso, esiane sɛ ebinom a na wɔwɔ afeha a edi kan no mu annye adanse bebrebe a na ɛkyerɛ sɛ Yesu ne Onyankopɔn diyifo a wɔahyɛ ne ho nkɔm no antom no nyɛ nea enti ɛsɛ sɛ yɛyɛ akyinnyegyefo nnɛ na yɛpow sɛ yebenya Yesu bɔhyɛ a ɛfa owusɔre ho no mu gyidi. Yesu nsɛm no yɛ nea yebetumi de yɛn ho ato so! Obetumi ayɛ nea ɔhyɛɛ ho bɔ no! Okunafo no ba no a onyan no no dii adanse sɛ obetumi ‘anyan wɔn a ɔpɛ.’
Enti, yɛwɔ biribiara nnɛ a enti yebetumi anya Yesu bɔhyɛ no mu ahotoso sɛ “wɔn a wɔwɔ ada mu nyinaa bɛte ne nne, na wɔafi adi.” Adanse no kyerɛ sɛ bere a eyi bɛba no abɛn. Efi afe 1914 reba no, yɛahu nneɛma a Yesu Kristo ne n’asomafo no kae sɛ ɛbɛhyɛ nneɛma nhyehyɛe yi “nna a edi akyiri” agyirae no nyinaa mmamu wɔ yɛn awo ntoatoaso yi mu. Wiase nyinaa akodi, ɔkɔm, ɔyaredɔm, nsasewosow, nsɛmmɔnedi, asoɔdenyɛ—eyinom nyinaa ne nea aba so nnɛ. Akyinnye biara nni ho sɛ nhyehyɛe bɔne yi awiei abɛn.—Mat. 24:3-14; Luka 21:10, 11; 2 Tim. 3:1-5; 2 Pet. 3:3, 4.
Awiei no akyi no, owusɔre no bɛba wɔ asase so ha. Sɛ wokyerɛ gyidi a, ebia wobɛtra ase ahu. Hwɛ bere a anigye wom a eyi bɛyɛ! Hwɛ anigye ara a hyia a awufo a wɔanyan wɔn no ne wɔn adɔfo bɛsan ahyiam no bɛyɛ! Ɛno na bɔhyɛ no bɛbam: “[Onyankopɔn] bɛmene owu akosi daa, na [Yehowa] bɛpopa ani nyinaa so nusu.”—Yes. 25:8.