Dua Bi a Ɛto Dwom

EFI NYAN! KYERƐWFO A ƆWƆ KENYA HƆ

DUA bi si Afrika sare tɛtrɛɛ no so a ɛtaa to dwom. Dua no yɛ ɔkanto dua bi a wɔfrɛ no nsɔe a ɛbɔ hwirema. Dɛn ntia? Efisɛ sɛ mframa bɔ fa ne nnubaa a ɛyɛ hare no mu a, ɛte sɛ nea dua no bɔ hwirema.

Sɛ dua no ho nsɔe ateateaa no di ahim wɔ mframa mu a, ɛma wɔte nne bi a ɛkanyan anigye. Nea ɛka nsɔe no nnwonto no ho ne dua no mu ntokuru a ɛma ɛnne nnyigyei te sɛ nea efi toa a enni ntuano a mframa refa ano mu ba no. Ntɛtea a wɔkyerɛ sɛ wotutu ntokuru nkuruwankuruwa a wɔtra mu no na wɔyɛ saa “nnwinade” yi, na wotu ntokuru a wɔfa mu kɔ mu na wotumi fa mu pue. Esiane sɛ ntokuru no kɛse gu ahorow nti, ɛma nnyigyei a egu ahorow. Saa nnyigyei yi ka ho bi na ɛma nsɔe no hwirema no da nsow koraa na ɛyɛ anika no.

Saa dua yi kae yɛn Odwontofo no nsɛm a ɔkaa no sɛnkyerɛnne kwan so no: ‘Petee mu nnua nto ahosan nnwom Yehowa anim.’ (Dwom 96:12,13) Nokwarem no, sɛ mframa bɔ nsɔe no ne ntokuru a ɛte sɛ atɛntɛbɛn no mu a, ɛma nnyigyei a ɛyɛ ahomeka, Afrika dwom a ɛka koma.