Aduan a Wudi—Ɛyɛ Asɛnhia

BIBLE ka wɔ Ɔsɛnkafo 9:7 sɛ: “Kɔ na fa anigye kodi w’aduan.” Nokwarem no, adidi nyɛ ade a ehia ara kɛkɛ, na mmom ɛka nneɛma a ɛma asetra yɛ anigye no ho.

Susuw Thomas a wadi mfe 34 no ho hwɛ. Ɔpɛ mogyanam yiye. Na daa ɔwe bi—ɔtaa we no mpɛn pii da koro. Nnuan a ɔtaa di no anɔpa ne nufusu, nkesua pii, paanoo anaa paanoo a wɔatoto a wɔde bɔta ayɛ so, ne nam a wɔatwitwa no nketenkete de ahyɛ ade mu anaa prakonam a wɔatwitwa no anankum. Sɛ ɔkɔ mmeae a wɔyɛ nnuan gya-so-gya-so a, ɔtɔ nantwinam a wɔayam de kyiis afra, Ntɔmmɔ a wɔatwitwa akye, ne nufusu a wɔde nneɛma afra mu di. Sɛ ɔkɔ adidibea kodidi a, aduan a ɔpɛ ne nantwinam a wɔayɛ no ntraantraa akye. Wɔn a wɔwɔ adidibea a ɔtaa kɔ hɔ no de nantwinam a wɔayɛ no ntraantraa akye a emu duru yɛ gram 680 ne ntɔmmɔ a wɔatõ a wɔde anwa agu so na ebesi n’anim, sɛnea ɔpɛ no ara pɛ. Nea ɔtaa de popa n’anom ne chocolate keeki a wɔde chocolate ice cream agu so.

Thomas tenten yɛ sɛntimita 178 na ne mu duru yɛ kilogram 89; sɛnea 1995 U.S. aban aduan ho akwankyerɛ kyerɛ no, wayɛ kɛse aboro so kilogram 9. Thomas ka sɛ: “Me kɛse a mayɛ no nhaw me. Mewɔ akwahosan pa. Mayɛ adwuma mfe 12 a mentoo mu da. Mpɛn pii no, mete nka sɛ me ho ye na mewɔ ahoɔden—gye sɛ ebia mawe nantwi a wɔayɛ no ntraantraa a emu duru yɛ gram 680.”

So ebetumi aba sɛ Thomas aduan no repira no nkakrankakra a ɛbɛma wanya komayare daakye? Wɔ ne nhoma How We Die mu no, Oduruyɛfo Sherwin Nuland ka ‘akwan a wɔfa so tra ase a edi awu’ ho asɛm na ɔde ‘mogyanam, prakonam anankum akɛse ne bɔta’ a wodi ka ho.

Ɔkwan bɛn so na nnuan bi ma nnipa pii nya komayare? Dɛn na ɛwom a ɛde asiane ba? Ansa na yebesusuw nsɛmmisa yi ho no, momma yɛntɔ yɛn bo ase nhwɛ akwahosan mu asiane horow a ɛwɔ kɛseyɛ mmoroso mu.

[Kratafa 3 mfonini]

Dɛn nti na aduan a ɛte saa yɛ asɛnhia?