So Menkɔ Kɔlege Anaasɛ Minsua Nsaanodwuma?

ƐYƐ nwonwa sɛ wɔ aman horow pii a mmerante ne mmabaa nnya adwuma nyɛ mu no, adwumfo ahorow a wɔwɔ nnwuma ahorow bi ho nimdeɛ nso ho yɛ nna. William Davies a ɔyɛ ɔsoafo panyin wɔ Ottawa, Canada no ka sɛ, “yɛn su wɔ nsaanodwuma ahorow ho” ka ho bi na ama nsonsonoe abɛda adwuma ahorow a ɛwɔ hɔ ne adwumayɛfo a wɔwɔ adwuma ahorow ho nimdeɛ ntam no. Wɔanya adwene yi esiane nsusuwii a abu so kɛse a ɛne sɛ “awofo redi mfomso” sɛ wɔmfa wɔn mma nkɔ kɔlege no nti. Nanso Davies kae sɛ mfomso biara nni ho sɛ awofo bɛhyɛ wɔn mma nkuran ma wɔasua nsaanodwuma sen sɛ wɔbɛkɔ sukuupɔn ma wɔakɔtete wɔn ama adwuma bi no. Ɔtoaa so sɛ, “Esiane nhyɛso a efi ayɔnkofo hɔ sɛ wonsua ade bio bere a wɔawie ntoaso sukuu ahorow ne anisɔ a wonni mma nsaanonnwuma ho nimdeɛ nti, mmerante ne mmabaa kakraa bi na wɔasusuw eyi ho sɛ ɛyɛ adwuma hokwan a ɛyɛ anigye a wɔwɔ.” Ɔkɔɔ so kae sɛ, “Nnwuma horow nyinaa yɛ nea ɛho hia” na nnipa a wɔn ho kokwaw wɔ nsaanonnwuma ahorow mu no de mmoa horow a ɛsom bo ma ɔman no. Ɔkae nso sɛ wɔboa mmerante ne mmabaa a wɔatete wɔn ma “wɔanya nsaanonnwuma ho nimdeɛ a ɛho hia” ma wonya “asetra a akomatɔyam wom” nso.