Nyamesom Wɔ Ntua Ase

Wɔakyekyere Philippine Roman Katolek asɔfo ne mmea a wɔresua asɔfodi pii nnansa yi ara na wɔakunkum binom sɛ wɔyɛ nnipa a wotutu ɔman ase. Afei nso, “asraafo faa ɔkwan a emu yɛ den so a na asɔfo baanu din ka atuatewfo a wɔn a wɔkyeree wɔn bae nyaa akyɛde no ho,” saa na The New York Times bɔ amanneɛ. Na Philippine asraafo panyin no “bɔɔ asɔfo atuatewfo baanan a wɔwɔ Ilocos kusuu fam amantam no mu no kɔkɔ sɛ wɔmfa wɔn atuo ngu fam na wɔmfa wɔn ho mma anyɛ saa a wobehu amane koro no ara bi” te sɛ ɔsɔfo bi a wɔakum no no. Wɔ nsɛm bi a wobisabisaa wɔn maa BBC (Britania radio dwumadibea) mu no, wɔbɔ amanneɛ sɛ asɔfo baanan no mu biako kyerɛkyerɛɛ mu “sɛ wama akode so ahyɛ Aban esiane pɛ a ɔpɛ sɛ ɔne ahiafo ne nnipa a wɔhyɛ wɔn so benya ayɔnkofa nti.”

Wɔkyerɛ sɛ Nigeria polisifo ne nnipa a wɔnyɛ polisifo pii wuwui bere a nyamesom kuw bi a wogye wɔn ho di sɛ atuo ntumi wɔn ne polisifo a wɔwɔ mpɔtam hɔ koe nnanan no. Awiei koraa no wɔde atuo akɛse a ano yɛ den na ɛbrɛɛ saa nyamesom kuw yi mufo no ase. “Nnipa afoforo pii a saa kuw yi mufo buu wɔn sɛ wɔyɛ asɔretiafo ne abusufo no yɛ nea wɔde nkrante kunkum wɔn bere a na wɔakɔfa polisifo aba no mpo,” saa na amanneɛbɔ bi a ɛwɔ Times mu ka. Ná ɛyɛ asɛm a emu yɛ den foforo wɔ Nigeria kusuu fam nyamesom mu ntawntawdi ho abakɔsɛm a akyɛ no mu.”