TV Nyɛ Nea Ɛkyerɛkyerɛ Obu

The Royal Bank Letter, a wotintim wɔ Canada no kaa obu ne hia a ɛho hia no ho asɛm nnansa yi. Nanso, ɛdaa no adi sɛ television nnkyerɛkyerɛ nkurɔfo obu: “Mmofra a wɔn awofo di tete asetra kwan akyi a wɔntetew wɔn ho wɔn ho atua wɔ mmofra no anim no mpo, nneɛma bɔne a wɔhwɛ wɔ television so nya wɔn so nkɛntɛnso wɔ ɔkwammɔne so. Wɔn a wɔasew wɔn tɛkrɛma na wɔn ano yɛ yaw a woyi aseresɛm a wɔba so no mfa akwankyerɛ biara mma wɔ atirimpɔw titiriw a ɛne obu ho, a ɛbɛma nkurɔfo anya abotɔyam. Nnipa a wɔagye din wɔ agoru ahorow mu no da wɔn ho adi sɛ wɔyɛ ahohoahoafo, bere a wɔn a wɔka agoru ahorow ho asɛm wɔ TV so no da asɛm no adi sɛ, sɛ́ ɛyɛ ɔkwan pa anaa ɔkwammɔne so no, nea ehia nyinaa ne nkonim a wubedi. Wɔn a wɔyɛ ɔmanfo nsɛm mu nhwehwɛmu no kasa tia wɔn a wɔreka wɔn ho asɛm no boro so na nkamfo kakraa bi na wonya. Ne nyinaa yɛ ntɔkwa pɛ ne akyinnyegye bere a ɛda nsow no fã, na ntɔkwapɛ ne akyinnyegye yɛ obu atamfo.”

Bible no kaa “ntɔkwapɛ ne akyinnyegye bere” yi ho asɛm too hɔ sɛ wɔ nneɛma nhyehyɛe yi “nna a edi akyiri” no mu no, nnipa bɛyɛ ‘ahohoahoafo, ahantanfo, apamsɛefo, wɔn a wɔnhyɛ wɔn akɔnnɔ so, wɔn a wɔyɛ keka, anuɔdenfo, wɔn a wɔhoman.’ (2 Timoteo 3:1-5) Wɔ ɔkwan foforo so no, ɛyɛ anigye sɛ wo ne wɔn a wodi Bible afotu sɛ “momma mo yam nyɛ yiye na ɛnhyehye mo momma mo ho” no akyi, na enti bere nyinaa wɔyɛ ade wɔ ɔkwan a obu wom so no bɛbɔ.​—Efesofo 4:32.