“Ɔkɔ Wɔ Asomdwoe Mu”

Nhoma foforo bi a wotintimii wɔ London a wɔato din War in Peace (Ɔko wo Asomdwoe Mu) no kyerɛ sɛ efi bere a wɔkoo Wiase Nyinaa Ko II no, asraafo ntawntawdi ahorow bɛyɛ 130 wɔ aman ahorow a ɛboro 100 so akunkum nnipa bɛyɛ ɔpepem 35. “Wɔntawntawdi ahorow yi fã kɛse no ara mu no, aman ahorow anan a wowɔ tumi kɛse dedaw wɔ Amanaman Nkabom no bagua a ɛhwɛ ahobammɔ so no mu​—Britania, Franse, United States ne Rusia​—anya afã kɛse wom,” saa na Canada Toronto Star no ka, na ɛde ka ho sɛ aman akɛse a wɔwɔ tumi no nneyɛe wɔ sraadi mu fi 1968 mu no mu ɔha biara mu 80 yɛ nea etia amanaman ntam mmara. So wɔtwe wɔn a wɔtõ mmara yi no aso? Star no ma mmuae sɛ: “Wada Amanaman Nkabom no bagua a ɛhwɛ ahobammɔ so no ase wɔ ɔkwan a ɛnam so si gyinae no ho, ɛmfa asotwe biara mma wɔn.” Bio nso, “aman akɛse a wɔwɔ tumi no ne wɔn aboafo afoforo a wowɔ Atɔe fam no ama wiase no ani agye akodi ho denam ma a wɔama akodeyɛ ne ne tɔn abɛyɛ ade a edi kan a sika wom kɛse wɔ wiase sen aduan no so.”