‘Mmabun Nni Hɔ Bio’

Adesua bi a Johns Hopkins Sukuu Kunini mu abenfo Melvin Zelnik ne John Kantner yɛe no kyerɛ sɛ mmabaa ɔpepem 10.3 a wɔadi fi mfe 15 kosi 19 a wɔwɔ Amerika no, ɔha mu 50 de wɔn ho ahyɛ aguamammɔ mu. Eyi yɛ dodow no mmɔho fi bere a Zelnik ne Kantner fii wɔn nhwehwɛmu no ase wɔ 1971 mu no. Zelnik kyerɛ sɛ: “Nneɛma a ɛboa maa obi kɔɔ so yɛɛ ɔbabun bere a atwam no . . . ayera.” Obi a wakyɛ wɔ ntoaso sukuu bi mu wɔ Louisiana kae wɔ mmabaa a afei na wɔrefi ase anaasɛ wɔanya mfe abien wɔ ntoaso sukuu a ɔwom mu no ho sɛ: “Ɛnkosi bere a wobewie sukuu no na wɔnyɛ mmaabun bio.” Ade biako a efi aguamammɔ yi mu ba ne sɛ: mmabaa ɔpepem biako a wonnuu mpanyin afe so a wɔwɔ Amerika nyinsɛn afe biara, eyi nya nkɔanim ntɛmntɛm kɛse wɔ wɔn a wonnii mfe 14 mu. Foforo nso ni: babaso abu so wɔ mmerante ne mmabaa a wonnuu mpanyin afe so mu, na edu nnipa ɔpepem biako a wɔyɛ foforo koraa a wɔbɔ amanneɛ sɛ babaso haw wɔn afe biara no ɔha mu 25.