Adɔeyɛ Nniso

BIBLE no ka nokware a emu da hɔ pefee, wɔ bere a ɛka sɛ: “Ɛbere bi wɔ hɔ a onipa di onipa so tumi ma ɛdan no bɔne.” (Ɔsɛnk. 8:9) Nea ɛne eyi bɔ abira no, woakyerɛkyerɛ Yehowa nniso denam ne Mesia no so no mu wɔ nnwom mu wɔ ɔkwan a ɛte sɛɛ so: “Ɔbɛba sɛ osu a ɛtɔ gu sare a wɔahuw so so, sɛ osu kɛse a ɛtɔ dwudwo asase mu. Ɔtreneeni besi frɔmm, ne bere so, na asomdwoe pii bɛba akodu sɛ ɔsram nni hɔ bio. Obedi hene afi po so akosi po so de afi asubɔnten no so akosi asase ano.”​—Dw. 72:6-8.

Nnipa renni wɔn mfɛfo nnipa so mma ɛnkowie wɔn bɔne wɔ saa nniso no ase. Ɔyɔnko dɔ na ɛbɛyɛ susudua. Ɛsɛ sɛ ɛyɛ saa mprempren. Onyankopɔn ahyehyɛ saa wo nhwɛso horow abien yi mu: Wɔ aware mu ne afei wɔ Kristofo asafo no mu.

Ɛsɛ sɛ ɔbarima no yɛ ti wɔ aware no mu, nanso ɛnsɛ sɛ ɔyɛ otirimɔdenfo wɔ eyi mu. Wɔka kyerɛ no sɛ ɛsɛ sɛ ɔdɔ ne yere sɛnea ɔdɔ n’ankasa ho. Nea ɛkyɛn eyi mpo no, ɛsɛ sɛ ɔdɔ no te sɛ nea Kristo nso dɔ asafo no​—efisɛ owu maa no! Ɛsɛ sɛ okunnunom kae eyi.

Ɔsoro nhyehyɛe a ɛwɔ asafo no mu ne sɛ mpanyimfo bɛhwɛ asafo no so, nanso ɛnsɛ sɛ wɔhyɛ wɔn so. (Efe. 4:8, 11-16) Yesu kae sɛ: “Na mo de, wɔmmfrɛ mo rabi; na obiako ne mo kyerɛkyerɛfo, na mo nyinaa yɛ anuanom. Na mommfrɛ obiara mo agya asase so; na obiako ne mo agya, ɔne nea ɔwɔ ɔsoro no.” (Mat. 23:8, 9) Ɛsɛ sɛ mpanyimfo kae eyi.

Yiw, ɛnsɛ sɛ onipa di afoforo so tumi de di wɔn awu. Wɔ Yehowa nniso ase, bere a Onyankopɔn soro nniso no nkutoo na edi asase so no, wɔremma onipa kwan na wayɛ saa!

[Box/Pictures on page 18]

ƆSORO NHYEHYƐE AHOROW ABIEN

AWARE

ABUSUA

“Onyankopɔn ka kyerɛɛ wɔn sɛ: Monwo, na monnɔ, na monhyɛ asase so ma.”​—Gen. 1:28.

OKUNU, AGYA

“Ɛsɛ sɛ okununom dɔ wɔn yerenom sɛ wɔn ankasa nipadua.” ‘Ne mma hyɛ n’ase. Kyerɛkyerɛ abofra ade.’​—Efe. 5:28; 1 Tim. 3:4; Mmeb. 22:6.

ƆYERE, ƐNA

‘Monnɔ mo kununom, monnɔ mo mma, monyɛ adwumayɛfo wɔ ofie, mommrɛ mo ho ase mma mo ankasa mo kununom.’​—Tito 2:4, 5.

MMOFRA

‘Mma yɛ agyapade a efi Yehowa hɔ. Mmofra, monyɛ osetie mma mo awofonom.’​—Dw. 127:3; Efe. 6:1.

MPANYINNI

ASƐMPAKA

‘Ka asɛm no, di ho dwuma wɔ ahohia so, yɛ ɔsɛmpakafo adwuma no.’​—2 Tim. 4:2.

ƆKYERƐKYERƐ

‘Ma wani mmra wo kyerɛkyerɛ so. Fa ɔkyerɛkyerɛ pa tu fo.’​—1 Tim. 4:16; 2 Tim. 4:2

AFOTU

‘Sɛ obi fa mfomso kwan bi so a, mommɔ mmɔden nsiesie saa onipa no wɔ odwo honhom mu.’​—Gal. 6:1.

HWƐFODWUMA

‘Monyɛn Onyankopɔn nguankuw a ɔde wɔn ahyɛ mo nsa no, wɔ ɔpɛ so; ɛnyɛ adufudepɛ nti, na mmom koma a ɛpɛ nti.’​—1 Pet. 5:2.