Hiob

32 Ɛnna mmarima baasa yi gyaee sɛ wɔbɛma Hiob mmuae, efisɛ na ɔteɛ n’ankasa ani so.+ 2 Na Busni+ Barakel a ofi Ram abusua mu no ba Elihu bo fuwii kɛse. Ne bo fuw Hiob sɛ wabu ne kra bem asen Onyankopɔn.+ 3 Ne nnamfo baasa no nso, ne bo fuw wɔn sɛ wɔannya mmuae bi, na mmom wobuu Onyankopɔn fɔ.+ 4 Elihu de nsɛm twɛn Hiob efisɛ na wɔn nyinaa sen no panyin.+ 5 Elihu hui sɛ mmuae biara nni mmarima baasa no anom,+ na n’abufuw mu yɛɛ den. 6 Enti Busni Barakel ba Elihu buae sɛ:

“Meyɛ abofra,

Na mo de, moyɛ mpanyimfo.+

Ɛno nti na metwɛnee no efisɛ na misuro

Sɛ mɛka nea minim akyerɛ mo.

 7 Mekae sɛ, ‘Mɛma nna akasa,

Na mfe dodow ada nyansa adi.’+

 8 Ampa, honhom a ɛwɔ adesamma mu,

Ade nyinaa so Tumfoɔ no home, na ɛma wɔn ntease.+

 9 Ɛnyɛ nna dodow nko na ɛma nyansa,+

Na ɛnyɛ onyin nko na ɛma nnipa te atemmu ase.+

10 Ɛno nti mekae sɛ, ‘Muntie me.

Na me nso mɛka nea minim akyerɛ mo.’

11 Hwɛ! Metwɛn mo nsɛm,

Na meyɛɛ asõ tiee mo adwene,+

Kosii sɛ mubenya asɛm bi aka.

12 Meyɛɛ asõ maa mo,

Nanso obiara nni hɔ a oyii Hiob ntɛn,

Na obiara nni hɔ a ɔmaa ne nsɛm no ho mmuae.

13 Enti monhwɛ na moanka sɛ, ‘Yɛahu nyansa;+

Onyankopɔn na wabɔ n’asɛm agu, na ɛnyɛ onipa.’

14 Ɔnkasa ntiaa me,

Enti meremfa mo nsɛm no bi mma no mmuae.

15 Moabɔ hu, muntumi nkasa bio;

Mo anom nsɛm asa.

16 Metwɛnee, nanso moankasa bio;

Mugyinaa hɔ dinn, na moanka hwee bio.

17 Me nso mebua me fam de;

Me nso mɛka nea minim.

18 Efisɛ nsɛm ahyɛ me ma;

Honhom no ahyɛ me so+ wɔ me yam.

19 Hwɛ! Me yam ayɛ sɛ bobesa a wontuee ho;

Ɛte sɛ nsã kotoku foforo a ɛreyɛ apae.+

20 Momma menkasa, na me ho ntɔ me.

Mebue m’ano na mabua.+

21 Ɛmpare me sɛ mɛhwɛ onipa anim;+

Na ɔdesani nso, meremmɔ no mmran;+

22 Minhu nea ɛbɛma mabɔ mmran;

Anka me Bɔfo+ beyi me afi hɔ ntɛm.