E fakaasi mai i te tala o Solomona a te mea e mafai o tupu ki so se tino tapuaki o Ieova. E mafai o tosina atu a ia ki te faiga o se agasala matagā kae fakamuli ko mafaufau me i mea katoa ne ˋtupu fakavave i konā eiloa. Io me kāti ka fai aka a ia, “Seiloa me kaia ne tupu i ei.” Kae kafai e mafaufau a ia ki te mea ne tupu, e mautinoa me ka lavea aka ne ia me ne fai ne ia a fakaikuga vaˋlea mai mua o fai ne ia se agasala matagā. Kāti ne filifili ne ia a taugasoa maˋsei, fakafiafiaga sē ˋlei, fakatuatusi i te neti kolā e fano a ia ki ei, mo koga e fano a ia ki ei kolā e se ˋtau o fano ki ei se Kelisiano. Kāti ko se fai foki ana ˋtalo, faitau ki te Tusi Tapu, kau ki fakatasiga, io me fano i te galuega talai. E pelā mo te tamataene telā ne fakamatala mai i te Faataoto, kāti ne seki fai ne ia a te agasala i konā eiloa. Se a te akoakoga mō tatou? E ˋtau mo tatou o ˋkalo keaˋtea mai i te agasala e penā foki mo auala kolā e ˋtaki atu ei tatou ki ei. Tenā eiloa te mea ne fakamatala mai ne Solomona mai tua o te fakamatalamaiga ne ia te mea ne tupu.—Mata. 5:​29, 30. w24.07 16 ¶10-11

Se a te koloa tāua tenei? Ko te galuega fakaˋsao ola telā ko te talaiatuga o te fekau o te Malo. (2 Koli. 4:1) Ne a mea ne faite ki kele? E fakasino ki tavini a te Atua kolā e fakaoko atu ne latou te tala ˋlei ki nisi tino. I aso o Paulo, ne fakaaoga ne tino fai pisinisi a tiā kele mō aveave a koloa tāua e pelā mo meakai, uaina, mo tupe. I se auala tai ˋpau, ko oti ne tuku mai ne Ieova ki a tatou se fekau tāua telā ko te tala ˋlei. E auala i te fesoasoani o Ieova, ka mafai o maua ne tatou te malosi e manakogina ke tumau i te talai atu mo te fakamaoni. I nisi taimi e mafai o maˋtaku tatou i tino io me maˋtaku ma kaitāua mai a tino ki a tatou. E manumalo pefea tatou i te tulaga faigata tenā? Mafaufau ki te ˋtalo a te kau apositolo i te taimi ne fakatonu atu ki a latou ke taofi te lotou talai atu. I lō te maˋtaku, ne ˋtalo latou ki a Ieova ke fesoasoani atu ke faiˋpati atu faeloa latou mo te loto ˋtoa. Ne tali fakavave ne Ieova te lotou ˋtalo. (Galu. 4:​18, 29, 31) Kafai e poleˋpole koe ma olo o talai ona ko te mataku ki tino, fakamolemole atu ki a Ieova ke fesoasoani atu ke fakatakavale ne tou alofa ki tino a tou mataku ki tino. w24.04 16 ¶8-9

Ko te ˋtou aˋlofa ki a Ieova e fakamalosi ei tatou ke fakaˋmalu tena igoa. Ko tena uiga, e maˋnako tatou o fakailoa atu ki tino me i mea maˋsei ne fai atu ne Satani e uiga ki a Ieova, ne loi katoa. (Kene. 3:​1-5; Iopu 2:4; Ioa. 8:44) I te ˋtou galuega talai, e maˋnako malosi tatou o ˋtu mō te ˋtou Atua, mai te fakailoa atu te munatonu e uiga ki a ia ki tino katoa kolā e fia fakalogoˋlogo mai. E maˋnako tatou ke iloa ne tino katoa me i tena toe uiga sili ko te alofa, tena pulega ko te ˋtoe pulega amiotonu kae tonu, kae ko pili o fakaseai atu ne tena Malo a logoˋmaega katoa kae aumai te filemu mo te fiafia ki te kaukāiga o tino. (Sala. 37:​10, 11, 29; 1 Ioa. 4:8) Kafai e ˋpulu ne tatou te ata o Ieova i te ˋtou galuega talai, ko fakaˋmalu eiloa ne tatou a tena igoa. E maua foki ne tatou a te lotomalie ke iloa atu me ko ola tatou e ˋtusa mo ˋtou igoa. w24.05 18 ¶12