Ɗiggi maaga daŋgo ga jee táabay maŋ ne diŋ hãge see ɓe go ne Jeofa nen tosge, lan kolge go jee maa ɓi feele maa ni Jeofa no. Jeofa de sãy maaga wosela ɓuy mo joŋ doosen nono. Wer mayse là? Á da ga á mo fruy wo wer holaŋ ɓaara de se, lan mo hay wo tum tenen ti’i. (Dog. 30:​19, 20; Gal. 6:​7, 8) Amaa, Jeofa bay joŋ doole jobo maa goŋge ɓe wa. Á ɓo’ faage ne wosela ɓuy maa maŋ ɗiggi ti fẽn maaga se joŋ ne. Re mayse hres hayga jobo maaga go de joŋ batem ɗii we go ne jag liŋgi ti, de joŋ ɓlagge maa kwũy là? Hayga á mbiɗ faale we ne ɓlagge ɓen ga no, à naa ne go ti tayge. (1 Kor. 5:13) Day koh de maaga à mbe go de naage ɓe ti tayge mo laybla, Jeofa de sãy maaga á mo mbiɗ faale ne ɓlagge ɓe no, mo fer baa barge de se de woore tigriŋ. Wersen, fẽn maaga daŋgo ga Jeofa hã Weel ɓen go ti re ɓe—diŋ ga se fug ɓil go ne jar maaga mbiɗ wo faale ne ɓlagge ɓaaran wo mo ti. Jeofa diŋ Baa maa de dage debaŋ, á wii jar maaga joŋ wo ɓlagge maa kwũy maaga á mo mbiɗ wo faale ne ɓlagge ɓaara no.—Sak. 1:3; Rom. 2:4; Jag 4:8. w24.08 14 §1-2

De ngar ngeel maaga apotre Jaŋ yer leder sen mono, jar maa po hay wo had gete’, lan hay wo car ɓil jar maa ti tayge no. Amaa jar maa po ya’ wo wer “seege ti jag liŋgi no.” Á hay wo hoo sug ti Jeofa, lan hay wo “seege ti ɓe doo maaga [saara] hay laan le taŋgu ti tĩĩgi wer mono.” (2 Jaŋ 4, 6) Kretiyẽ se de deelen fruy wo ɓil Jeofa wo de Jaŋ go debaŋ. (Jõõ. 27:11) Sen had naa ga hãylà? Hayga naa lag we de deele peel Jeofa no, naa joŋ de fruygi, lan fruy ɓil jar lan wo lay. (1 Jaŋ 5:3) Ko ba ɗa, naa joŋ de fruygi de maaga naa ko we ga naa de fruy ɓil Jeofa no. Á fruy de maaga á ko naa ooge ngiŋ jag jãɗge maa ti tamsir wo, lan naa yãã cwãyn mono. Jar peele Baa wo le ciŋ fruy wo lay. (Lug 15:10) Naa joŋ de fruygi de maaga naa ko hẽẽre naa wo lagge de deele (2 Tes. 1:4) Day de maaga à taw tamsir maa ni Manhúulín we go no, naa joŋ yaŋ de fruygi debaŋ ti maaga naa lag de deele peel Jeofa mono. w24.11 12 §17-18

Ndo ig ko joŋre jobo gemãy blam maaga ndo wãã ne hẽn ga ndo de sãy ɓe ti là? Hayga ndo raw we see jee ɓen deparday tu no, maapo se ɗig ga ndo bay go de ɗiggi de woore taŋgu maaga ndo maŋ ɗiggi sen wa. (Jõõ. 29:20) Maa po pa mono, hayga jobo ko we go ga ndo de sãy se ti, day ga ndo ig go debaŋ maa wããge ɓe ne hẽn no, se ɗig ga taŋgu maaga ndo maŋ ɗiggi sen mono, ndo hay de mbrawge jag jiili debaŋ. (Ekl. 11:4) Ɗig ndo ga, taŋgu maaga ndo wii jobo mono, ndo bay maaga ndo joŋ go de bawge jag jiili ɓo ga ndo da ge ne naŋ na wa. Amaa, ndo de hay joŋ mbo go de bawge jag jiili ɓo an ga, ndo go de bag jag see ɓo maa da wãy noga da ware, day ga jee ɓen joŋ ge yaŋ diŋ jee maaga nday lag de kẽẽ. Day hayga ndo ko we ga jobo de sãy da’ wer ne ndo ti laylà? Hayga á bay we diŋ jee maaga ndo de sãy dage ɓe ti wa no, ngaɓn go ne hẽn nen joŋre ɓo. Á bay de el maaga ndo mo joŋ doo ga nday da ge kẽẽ yaŋ paga baywa na wa.—Efe. 4:25. w24.05 22-23 §9-10