Mbaa sen ngaɓ fẽn maaga da’ Sedeewa Jeofa maa hõnla ɓuy mono. Maapo ga á le’ go nen ɓlagge maa kwũy, day ko go blam ga fẽẽren ɓuy hay hres go brus brus tu. Amaa hayga á hay ɗig we ti re maaga hay hres cwãy no, maapo ga á hay ko yaŋ ga se hay far ɗiggi maa de baywoore wo taŋgu maaga se joŋ ɓlagge mono. Maapo ga se far ɗiggi maa seege de kããrebe maa de baywoore wo, maa joŋ hragge maa de yeeɗe, noga woge ti ngeel maa de baywoore—noga pa ti sid interned maa de baywoore wo. Maapo ga á men tos Baa, jaŋge Bible, woge ti taygeti, lan siigi wããre Baa go. Diŋ wer maaga á far ɗiggi po wo ngaɓa de baywoore ga weel maa ɓil Jag Jõõ wo joŋ ɓlagge maa kwũy mono. Sen had mayse ne naa là? Naa mo hay ɗee go diŋ see ɓlaggen tawa wa, amaa see joŋre maaga kaŋ wo wer naa joŋ ɓlagge go mo lay. Sen diŋ fẽn maaga Salomoŋ joŋ blam maaga á ngaɓ re maaga da’ weel maa ɓil Jag Jõõ wo de wãy figliwn mono.—Mat. 5:​29, 30. w24.07 16 §10-11

Loone pãy sen diŋ maylà? Á wãã diŋ ti jar joŋ joŋre ne Baa wo, jar maaga sii wo wããre maa de cõõre maa ni Baan go ne jar mono. (2 Kor. 4:1) Ti kal maa ni Poln le mono, jar trere hay wo joŋ joŋre de pãy wo maa hoor fẽẽre maaga daŋ wo go doo : rege wo, yíi wo, lan suŋgu. Doo sen no lay, Jeofa hã joŋre siigi wããre maa de cõõre maaga daŋ go ne naa. De kayge maa ɓen, naa da’ ẽgre maa sii wããren go de deele. De ngar ngeel maa po naa joŋ hẽẽne do jare noga ga dayla à yãã wããre naan ga. Naa naa blum hẽẽne sen na naage là? Ko tosge maaga apotre tos wo de maaga à maŋ jag ɓaara go sii wããre mo ɗa. Á joŋ wo hẽẽne ga, amaa saara wii Jeofa ga á mo hã ẽgre ne saara maa sii wããren go bay hẽẽne. Jeofa yiŋ jag ti tosge ɓaaran deparday tu. (Joŋre 4:​18, 29, 31) Hayga de ngar ngeel maa po naa yaŋ joŋ hẽẽne do jar téebeere wo no, naa mo wii kayge do Jeofa maaga dage naa see jar mo ya’ ciŋ ni nen maaga hẽẽne mo joŋ naa maa sii wããren go wa. w24.04 16 §8-9

Dage naa see Jeofa jor glog naa maa fãã ɗuu ɓe go. Sen da wããge ga naa de sãy wããge ne jar ga fẽẽre maaga Manhuúulí wãã ra ti Jeofa wo diŋ gete’e. (Tĩĩ. 3:​1-5; Job 2:4; Jaŋ 8:44) Ti siigi wããre mono, naa fãã ɗuu Baa go de bay yõõ ti, de wãã cwãy ti ɓe ne jar maaga wo de sãy co’ sug naa ti mono. Naa de sãy maaga wosela ɓuy mo ko go ga joŋre ɓe maaga daŋgo diŋ dage, ga ɗeŋ wããge re jar maa ɓen de deele lan ti ngeel ɓe, lan ga twaywaŋ maa ɓen caa ge wer bonn yaŋ wo go, day a ge yaŋ de jam wo de ti desãy ne jar téebeere wo. (Siŋ. 37:​10, 11, 29; 1 Jaŋ 4:8) Maaga naa hã sedeewa go ti Jeofa mono, naa go de fããge diŋ ɗuu ɓe. Naa de fruygi debaŋ ti maaga naa bag jag fẽn maaga ɗuu naa Sedeewa Jeofa da wããge ɓe go mono. w24.05 18 §12