OMULINGO TUSOBORA KULEKA ENOBI

1 | Ba Muntu Atarukusoroora

Baibuli Egamba:

“Ruhanga tasorora omu bantu: baitu, omu ihanga lyona lyona, [buli muntu wena] anyakumutina nakora okuhikirra nuwe asiimwa.”—ENGESO EZABAKWENDA 10:34, 35.

Eki Nikimanyisa Ki?

Yahwea Ruhanga taturora n’asigikirra ha ihanga lyaitu, erangi, omubiri rundi obuhangwa bwaitu. Oihireho, ateeka omutima ha kiki ekituli omu nda kandi ebi nibyo ebitekerezo byaitu n’enyehurra zaitu. Baibuli egamba eti: “Abantu nibarora okusisana kwa haruguru, baitu [Yahwe] narora ha mutima.”—1 Samuiri 16:7.

Eky’Osemeriire Kukora:

N’obukiraaba ngu titusobora kumanya ekiri omu mitima y’abantu, nitusobora kulengaho kuhondera ekyokurorraho kya Ruhanga eky’okutasoroora. Wekambe kurora abantu omu omu hatali nka guruupu. Kakuba okyetegereza ngu oine enyehurra embi hali abandi—obundi ab’erangi endi rundi ihanga erindi,—saba Ruhanga akukonyere kweyihamu enyehurra nk’ezi. (Zabuli 139:23, 24) Obw’orasaba Yahwe kukukonyera kuba muntu atarukusoroora, kigumye ngu naija kuhurra esaara yaawe kandi akukonyere.—1 Petero 3:12.

a Yahwe niryo ibara lya Ruhanga.—Zabuli 83:18.

“Nkaba ntakaikarraga n’omujungu omu businge . . . Baitu hati nkaba nfookere kicweka ky’oruganda orw’ensi yoona.”—TITUS

Ekyokurorraho Ekyabaireho Kwo—TITUS

Akasingura Enobi

Titus akaba ali mu kikoosi ky’abantu abaali baine ekiniga ky’amaani habw’ebiragiro ebyali bitairweho ebirumu okusoroora n’obutalibwinganiza. N’agamba ati: “Twagendaga omu biikaro nka hoteeri n’amabbaara nambere bataikirizaaga abairaguzi kandi tutandikaho obulemu.” Titus n’agamba ngu enobi niyo yamuleeteraga kukora binu. Akongera yagamba ati: “Obunatungaga obutetegerezangana n’omuntu weena, kaabe musaija rundi mukazi, ninyowe natandikaga kurwana.”

Titus akahinduka obuyatandikire kwega Baibuli n’Abakaiso ba Yahwe. Ebiyasomere omu Baibuli bikamukwataho muno. Ekyakizireyo kumukwataho nugwo omurago ogurukukwata ha busumi obw’omu maiso ogurukugamba ngu “tihakiroho okufa; nobukwakuba okutera empamo, nobukwakuba okurra, nobukwakuba okusasa tibikiroho.”—Okusuku’rwa 21:3, 4.

Ha kubanza, Titus kikamugumira kweyihamu enobi. N’agamba ati: “Kikangumira muno kuhindura entekereza n’enyetwaza yange.” Baitu ebiyasomere omu Engeso Ezabakwenda 10:34, 35, aharukugamba ngu Ruhanga tasoroora, nibyo byamukonyiire.

Biki ebyarugiremu? Titus n’asoborra ati: “Nkakigumiza kimu ngu Abakaiso ba Yahwe niyo ediini ey’amananu obunarozere okugonza okubainiirengana n’obukiraaba ngu baine erangi ezirukwahukana. N’obunkaba ntakabatiziibwe, omu h’Abakaiso ba Yahwe ow’erangi erukwera akandaaliza omu ka ye kulya nauwe ekiihuro. Nkasisana nk’owarukuroota. Nkaba ntakaikarraga n’omuntu ow’arukwera omu businge, baitu hati tukaba nitulya hamu ekiihuro omu ka ye. Nkaba nfookere kicweka ky’oruganda orw’ensi yoona.”