Okuhingurwaho Nikyo Kiki?
Eky’okugarukamu kuruga omu Baibuli
Okuhingurwaho kiri kijaguzo ky’Abayudaaya eky’okwijuka nk’oku Ruhanga yacungwire Abaisaleri kuruga omu ihanga lya Misiri omu mwaka 1513 Y.A. Ruhanga akaragira Abaisaleri kwijukaga omukoro gunu buli mwaka ha kiro kya 14 omu kwezi kwa Abibu kusigikirra ha kalenda ey’Ekiyudaaya kandi okwahikire kwayetwa Nisani.—Okuruga 12:42; Ebyabalevi 23:5.
Ensonga habwaki omukoro gunu gwayeserwe Okuhingurwaho
Ekigambo “Okuhingurwaho” nikimanyisa akasumi Ruhanga akayajuniiremu Abaisaleri hali akabi akaleetiire buli muzigaijo wena omu ihanga lya Misiri kufa. (Okuruga 12:27; 13:15) Ruhanga obwakaba atakalesereho omuhito gunu ogw’akabi, akagambira Abaisaleri kumiisira esagama y’embuzi rundi ey’akaana k’entaama ha miryango y’enju zaabo. (Okuruga 12:21, 22) Ruhanga yaroraga akokurorraho kanu kandi ‘ahinguraho’ amaju gaabo kandi aleka kwita emizigaijo yabo.—Okuruga 12:7, 13.
Okuhingurwaho kwajaguzibwaga kuta omu kasumi ka kara?
Ruhanga akaha Abaisaleri oburagirizi ha mulingo basemeriire kujaguzaamu Okuhingurwaho kwabo okw’okubanza.a Binu biri bimu ha bintu ebyakorwaga kwijuka Okuhingurwaho nk’oku byolekerwe omu Baibuli.
a Baitu hanyuma y’obwire, haroho empindahinduka ezimu ezaali zisemeriire kukorwa. Ekyokurorraho, Abaisaleri bakajaguza omukoro ogw’Okuhingurwaho nibanguhiriza habwokuba bakaba basemeriire kwetekaniza kuruga omu ihanga lya Misiri. (Okuruga 12:11) Baitu, obubahikire omu Nsi ey’Ekaba Eraganiziibwe, bakaleka kujaguza Okuhingurwaho omu mulingo gw’okwanguhiriza.
● Ekihongwa: Amaka gaserraga akataama ak’omwaka gumu (rundi embuzi) ha kiro kya ikumi eky’okwezi kwa Abibu (Nisani), kandi ha kiro ekya 14 bakabaagaga. Ha Kuhingurwaho okw’okubanza, Abayudaaya bamisirraga emu ha sagama y’ekihongwa ha miryango yabo na haiguru y’emiryango, kandi bayokyaga ekisoro kyona, hanyuma bakirya.—Okuruga 12:3-9.
● Ekiihuro: Kwongerra h’akaana k’entaama (rundi embuzi), Abaisaleri balyaga omugaati ogutatumbisiibwe hamu n’emikubi ey’erukusarra kandi binu nabyo byabalirwaga ha kiihuro eky’Okuhingurwaho.—Okuruga 12:8.
● Obugenyi: Abaisaleri bajaguzaaga Obugenyi obw’Emigaati Etatumbisiibwe kumara ebiro musanju hanyuma y’Okuhingurwaho, akasumi nambere batalyaga emigaati etumbisiibwe.—Okuruga 12:17-20; 2 Ekyebyomubusinge 30:21.
● Okwegesebwa: Abazaire bakozesaaga akasumi ak’Okuhingurwaho kwegesa abaana baabo ebirukukwata hali Yahwe Ruhanga.—Okuruga 12:25-27.
● Orugendo: Hanyuma y’obwire, Abaisaleri baagendaga Yerusalemu kujaguza Okuhingurwaho.—Ekyebiragiro 16:5-7; Luka 2:41.
● Ebintu ebindi ebyakorwaga: Omu kasumi ka Yesu, eviino, n’okuzina ebizina nabyo bikongerwa omu kujaguza Okuhingurwaho.—Matayo 26:19, 30; Luka 22:15-18.
Ebisuba ebirukukwata ha Kuhingurwaho
Ekisuba: Abaisaleri balyaga ekiihuro eky’Okuhingurwaho ha kiro kya Nisani 15.
Amananu: Ruhanga akaragira Abaisaleri kubaaga akaana k’entaama omu bwire bwa rwebagyo hanyuma y’izooba kugwa ha kiro kya Nisani 14 kandi balye enyama yako ha kiro eki omu bwire bw’ekiro. (Okuruga 12:6, 8) Abaisaleri babaraga ekiro kyabo kuruga ha kugwa kw’izooba kuhika ha kugwa kw’izooba erirukuhonderaho. (Ebyabalevi 23:32) Nahabweki Abaisaleri babaagaga akataama kandi balya ekiihuro ky’Okuhingurwaho ha kutandika kw’ekiro kya Nisani 14.
Ekisuba: Abakristaayo basemeriire kujaguza Okuhingurwaho.
Amananu: Hanyuma ya Yesu kujaguza Okuhingurwaho ha Nisani 14 omu mwaka gwa 33 Y.A.K., akatandikaho omukoro ogundi, kandi ogu nugwo Ekiihuro ekya Mukama Waitu. (Luka 22:19, 20; 1 Abakolinso 11:20) Ekiihuro kinu kikagaruka omu kiikaro ky’Okuhingurwaho, habwokuba tuba nitwijuka ekihongwa kya Kristo anyakuli omwana gw’entaama ey’Okuhingurwaho. (1 Abakolinso 5:7) Ekihongwa kya Yesu nikikira obukuru ekihongwa ekyakozesebwaga ha mukoro ogw’Okuhingurwaho habwokuba kireetera abantu boona ababohiirwe omu bwiru obw’ekibi n’okufa kulekerwa.—Matayo 20:28; Abaheburaniya 9:15.