Baibuli Egamba Ki ha Kwekoraho N’okwehunda?
Eky’okugarukamu kuruga omu Baibuli
N’obukiraaba ngu Baibuli tebazaaho ensonga enu omu bwijwire, tejumirra kwekoraho, kujwara ebikomo, hamu n’ebintu ebindi eby’okwesemeza. Baitu, omu kiikaro ky’okuteeka muno omutima ha nzooka yaitu, Baibuli ekurakuraniza “[ekyokujwara] ekitarukusisikara ekyomwoyo omuculezi ogutanyina emyehembo.”—1 Petero 3:3, 4.
Okwekoraho okwa ha mubiri tikurukutangwa
● Abakazi abesigwa omu Baibuli bakekoraho. Rebeka, ayaswirwe Isaka mutabani wa Iburahimu, akajwara ekikomo ekyezaabu eky’enyindo, ebikomo ebyezaabu, hamu n’ebintu ebindi eby’okwekoraho kandi eby’omuhendo ebiyatungire kuruga hali ow’akaba naija kufooka isezaara. (Okubanza 24:22, 30, 53) Omu mulingo nugwo gumu, Esiteri, akaikiriza “[ebintu] ebyokwesemeza” nukwo asobole kwetekaniriza obujunanizibwa bwe obukaba nibusobora kumuheebwa obw’okuba omugo omu Bulemi obwa Buperusi. (Esiteri 2:7, 9, 12) Ebintu binu nibisobora kuba byatwarramuga kukozesa “amagita,” rundi “ebintu eby’embaganiza eby’okwekoraho.”— kusigikirra ha New International Version; na Easy-to-Read Version.
● Ebyokurorraho omu Baibuli bikozesa eby’okwehunda omu kulengesaniza ebintu ebirungi. Ekyokurorraho, omuntu ow’aha amagezi amarungi alengesanizibwa ‘n’empeta yomukutu eyezabu . . . okutu okurukuhurra.’ (Enfumo 25:12) Omu mulingo nugwo gumu, Ruhanga wenyini akalengesaniza omulingo yatwaizeemu ihanga lya Isaleri n’omusaija ow’ahunda omugole we omukazi n’ebikomo, orukwanzi, hamu n’obwoma bw’amatu. Okuhunda kunu kukaleetera ihanga lya Isaleri kuba ihanga ‘erirungi muno.’—Ezekyeri 16:11-13.
Ebisuba ebirukukwata ha kwekoraho n’okwehunda
Ekisuba: Omu 1 Petero 3:3, Baibuli ejumirra “[okuzigisa] isoke okwa haruguru, nokujwara, ebya zabu.”
Amananu: Ebigambo ebyetoroire ekyahandiikirwe kinu nibyoleka obukuru obw’oburungi obw’omunda oburukwahukanaho n’okwekoraho okwa ha mubiri rundi okwehunda. (1 Petero 3:3-6) Embaganiza enu neyolekwa nahandi omu Baibuli.—1 Samuiri 16:7; Enfumo 11:22; 31:30; 1 Timoseo 2:9, 10.
Ekisuba: Omugo omubi Yezeberi kukozesa erangi rundi ekikalaamu kusiiga amaiso ge, kali kokurorraho akarukwoleka ngu kwekoraho kibi.—2 Ekyabakama 9:30.
Amananu: Yezeberi, akatwarwa kuba omuntu omubi habw’ebikorwa bye ebibi eby’obwisi n’oburaguzi, hatali habw’enzooka ye.—2 Ekyabakama 9:7, 22, 36, 37.