Ekyanda eky’Amaani—Baibuli Ekibazaaho Ki?

• “Ihanga lya China likagamba ngu mwaka gunu habaireyo ekyanda ekirukukirayo kuba ky’amaani eky’omurundi ogwakasatu omu byafaayo.”—The Guardian, Sebutemba 7, 2022.

• “Ekyanda ekiri omu bicweka ebimu eby’omu Afrika nikisobora kugumizaamu habw’omwaka gwa kataano.”—Amakuru ga UN, Agusto 26, 2022.

• “Ekicweka ekirukuhingura ha kimu kya kabiri ekya Bulaaya nikinihirwa kubamu ekyanda eky’amaani, kandi kinu nikisobora kuba nikyo ekyanda ekirukukirayo kuba ky’amaani omu myaka 500.”—Amakuru ga BBC, Agusto 23, 2022.

Abakugu baingi nibatebereza ngu ekyanda nikiija kugumizaamu kandi nikisobora kweyongera. Haroho okunihira kwona ngu omu kasumi k’omumaiso ebintu birasemera? Baibuli egamba ki?

Baibuli ekaranga ngu halibaho ekyanda

Baibuli ekiyarangire ngu kiribaho omu kasumi akaturumu:

• “Nebiihe biribaho handi nahandi.”—Luka 21:11.

Ekyanda kikira kuleetaho ebiihe rundi ibura ly’ebyokulya. Ibura ly’ebyokulya, okubonabona, n’okufa okuleetwa ekyanda nibihikiiriza obunabbi bwa Baibuli.—Okusuku’rwa 6:6, 8.

Habwaki ekyanda nikyeyongera

Baibuli etuha ensonga habwaki ekyanda nikyeyongera. Egamba eti:

• “Tikiri omu muntu arukugenda okuterekereza ebigerebye.”—Yeremiya 10:23.

Kinu nikimanyisa ngu abantu tibasobora kuterekereza kurungi ebigere byabo rundi kwerema bonka. Encwamu zaabo embi nizo zikizire kuleeteho ekyanda niibura ly’amaizi.

• Abanyasayansi baingi nibaikiriza ngu emirimo y’abantu niyo eretiire obutagasi bw’ensi kweyongera, kyaleetera ekyanda kweyongera omu bicweka bingi eby’ensi.

• Omururu hamu n’ebiragiro eby’okwegondeza biresereho kutema ebibira, kusiisa eby’obuhangwa, n’okukozesa kubi eby’obuguuda eby’ensi. Kandi ebintu nka binu, birugiremu kusiisa ensoro z’amaizi n’ebintu ebikonyera omu kukora enjura.

Baitu Baibuli etuha okunihira.

Haroho okunihira kwona okw’omu kasumi ak’omumaiso?

Baibuli n’eraganiza ngu Ruhanga alimaraho ibura ly’amaizi. Omu mulingo ki?

1. 1. Ruhanga ‘alihwerekereza abo abahwerekereza ensi.’ (Okusuku’rwa 11:18) Aliihaho abantu ababi abanyakwine omururu, abakora ebintu ebisiisa eby’obuhangwa kandi bikaleetaho ibura ly’amaizi.—2 Timoseo 3:1, 2.

2. 2. “Nomusenyi ogurukwokya gulifoka ekijongo.” (Isaya 35:1, 6, 7) Ruhanga aligarra buhyaka ebintu ebisiisirwe ekyanda kandi ensi yoona agifoole orugonjo orurungi orwine amaizi agarukwetaagisa.

3. 3. “[Ofaaho kurungi] ensi oginagira enjura ogitungisa itungo lingi.” (Zabuli 65:9) Ruhanga naija kuha ensi omugisa kandi eriijura ebyokulya ebirungi n’amaizi amecumi.