Ab’eby’obulemi Nibatiinisiriza ngu Haramagedoni eri Haihi Kubaho—Baibuli Ekibazaaho Ki?

Nyenkyakara ya Bbalaza, Okitobba 10, 2022, Russia ekateera ebikompola omu mbuga za Ukraine obu n’ehora enzigu hanyuma y’okuhulika okw’amaani okwabaireho ebiro bibiri enyuma ha rutindo orukuru orukuteraniza Crimea na Russia. Binu bikabaho hanyuma y’obwire buke ab’eby’obulemi abamu kutiinisiriza ngu nihasobora kubaho Haramagedoni omu bwire obutali bwa hara.

• “Titukairraga haihi na Haramagedoni kuruga omu kasumi ka [Purezidenti wa U.S. John F.] Kennedy obuhabaireho okutiinisirizibwa okw’okuterangana ebikompola hagati y’Amerika na Cuba. . . . Tindikunihira ngu nikisoboka kukozesa eby’okurwanisa ebya nuclear hatabaireho Haramagedoni.”—Joe Biden Purezidenti wa U.S., Okitobba 6, 2022.

• “Ninyikiriza ngu nihasobora kubaho Haramagedoni ey’eraleteera ensi yoona akabi.”—Purezidenti wa Ukraine Volodymyr Zelensky, obuyakaguziibwe ebiraruga omu kukozesa eby’okurwanisa bya nuclear, Amakuru ga BBC, Okitobba 8, 2022.

Kukozesa eby’okurwanisa bya nuclear nikisobora kurugamu Haramagedoni? Baibuli ekibazaaho ki?

Eby’okurwanisa ebya nuclear nibyo biraleetaho Haramagedoni?

Nangwa. Ekigambo “Haramagedoni” nikisangwa omu Baibuli omurundi gumu gwonka omu Okusuku’rwa 16:16. Tikirukumanyisa obulemu oburaabaho hagati y’amahanga, baitu hagati ya Ruhanga ‘n’abakama ab’ensi zoona.’ (Okusuku’rwa 16:14) Ruhanga naija kukozesa obulemu bwa Haramagedoni kuhwerekereza obulemi bw’abantu bwona.—Danieri 2:44.

Kumanya omulingo Haramagedoni erakwataho ensi soma ekicweka Obulemu obwa Haramagedoni Nikyo Kiki?

Ensi n’abantu abarumu barahwerekerezebwa obulemu bwa nuclear?

Nangwa. N’obukiraaba ngu abalemi nibasobora kukozesa eby’okurwanisa bya nuclear omu kasumi ak’omumaiso, Ruhanga tarukwija kubaleka kuhwerekereza ensi. Baibuli egamba eti:

• ‘Ensi ikaraho ebiro byona.’—Omugambizi 1:4.

• “Abahikiriire baligwetwa ensi, baragiikaramuga ebiro nebiro.”—Zabuli 37:29.

Baitu, obunabbi bwa Baibuli n’ebintu ebirukubaho hati byoleka ngu tuli haihi kuhika omu kasumi ek’embaganiza omu byafaayo by’abantu. (Matayo 24:3-7; 2 Timoseo 3:1-5) Manya Baibuli eky’egamba ha busumi obw’omumaiso kuraba omu kwega Baibuli okw’okuleeta hamu ebitekerezo.