Teekaniza eby’Okugarukamu Ebirukugarramu Amaani

Omu nsorrokano zaitu ez’ekitebe, twine omugisa ogw’okugarramu ab’oruganda na banyaanya itwe amaani kuraba omu by’okugarukamu byaitu. (Baheb. 10:​24, 25) Nitusobora tuta kuteekaniza eby’okugarukamu ebirukugarramu abandi amaani?

• Saba Yahwe. Musabe akukoonyere kuhayo eky’okugarukamu ekiraamuhaisa ekitiinisa kandi ekiraagarramu abandi amaani.—Zab. 35:18.

• Lengaho kuteekaniza eby’okugarukamu omu bigambo byawe hatali kusoma busoma ebiri omu kitabu. Obu oraagarukamu nookozesa ebigambo byawe, abandi nibaija kugasirwa obu baraahurra ebigambo ebirukwoleka okwikiriza kwawe.

• Leka eky’okugarukamu kyawe kibe kigufu. Eby’okugarukamu ebigufu kandi ebyanguhire, emirundi erukukira obwingi nibyo bikirayo kugarramu abandi amaani kandi biha abantu baingi omugisa ogw’okuhayo eky’okugarukamu—Nfu. 10:19.

• Bazaaho ebintu ebirukugarramu abandi amaani. Weetantale kuhayo eky’okugarukamu ekirukuha abandi obuhabuzi, rundi ekirukuhakaniza ekitebe, rundi Omukristaayo mugenzi waawe.

Noobu orukuba otatungire omugisa gw’okuhayo eky’okugarukamu, nabwo noosobora kugarramu abandi amaani. Huliiriza kurungi eby’okugarukamu by’abandi, kandi hanyuma obasiime habw’eby’okugarukamu byabo.—Nfu. 10:21.