Garraho Obusinge omu Bwangu!
HAROHO ow’oruganda rundi munyaanya itwe ow’akusaaliize kuhika ha rulengo ngu kisiisire n’enkoragana yanyu? Kusobora kugarraho obusinge kandi mukaikara muli banywani, osemeriire kugira eki wakoraho omu bwangu kandi okikole n’ekigendererwa ekihikire.a
Ekyokurorraho, igufa ericwekere lisemeriire kujanjabwa nukwo lyongere likole kurungi litarukukusaasa. Baitu obusaasi nibwija kugumizaamu kakuba igufa litajanjabwa omu bwangu. Baitu ekirukukirayo kusaasa nikyo ngu igufa nirisobora kuramara kandi likalemwa kwongera kukora kurungi.
Kusisanaho n’igufa ericwekere, kakuba tutunga obuteetegerezangana n’Omukristaayo mugenzi waitu, tusemeriire kubumaraho omu bwangu. Kakuba tutakikora, obusaasi oburuga omu kufeerwa obunywani bwanyu nibwija kwikaraho. Noosobora kwahurra munywani waawe enzigu kandi obunywani bwanyu nibusobora kuhweraho kimu. Yesu akagamba ati: “Rahuka kumaraho ensonga.” (Mat. 5:25) Nahabweki, hikirra munywani waawe, obaze na uwe omu omulingo ogw’embabazi kandi omugambire ekintu kyonyini ekikubiihiize. Habwaki kinu nikisobora kuguma? Teekerezaaho ensonga zinu ibiri.
Ey’okubaza, noosobora kwohebwa kweganyira ensonga obundi habwokuba noohurra otiinire kandi torukugonza kubazaaho ekizibu.b Teekerezaaho ekyokurorraho kya Ewodiya na Suntuke, banyaanya itwe babiri abasobora kuba bakaba balemerwe kumaraho obuteetegerezangana hagati yabo. Ekizibu kyabo nikisobora kuba kyajanjaire habwokuba n’omukwenda Paulo akakimanya obu akaba ali omu Rooma. Akabateererra kukora kyona ekirukusoboka kugarraho obusinge. (Baf. 4:2) Habwokuba bakaba bali beebundaazi, bakabalizangana kurungi, kandi baaganyirangana kuruga ha mutima, kusobora kugarraho obunywani bwabo kandi bakabwikazaaho.
Eya kabiri, noosobora kunihira ngu omuntu ow’akubiihiize naija kwikiriza ensobi ye. Baitu ekikuru nukwo kugarraho obunywani bwanyu hatali kumanya nooha ow’ali omu nsobi. Dakitaali ow’arukujanjaba igufa ericwekere naija kuteeka omutima ha mulingo liraakira, hatali kuguteeka ha kintu ekirireetiire kucweka. Obu oraabaza na munywani waawe, otateeka omutima ha nooha ow’asemeriire kujunaanwa habw’ekyabaireho. Oihireho, ijuka nkooku obunywani bwanyu kiri kintu ekikuru kandi oteeke omutima ha ky’osemeriire kukora kubugarraho.
Habwaki otabaza n’ow’oruganda rundi munyaanya itwe kiro kinu, n’ekigendererwa eky’okumaraho obuteetegerezangana n’okugarraho obunywani? “Mutaikiriza izooba kugwa mukyaine ekiniga.” (Bef. 4:26) Kakuba ogira eki wakoraho kumaraho obuteetegerezangana omu bwangu, noija kuba nookonyera kulinda “obumu obw’omwoyo, n’obusinge obubateeraniza hamu.”—Bef. 4:1-3.
a Obuteetegerezangana obutali bw’amaani tusemeriire kubumaraho n’omuntu ow’atubiihize kandi tuganyirengana. (Mat. 5:23, 24) Obuteetegerezangana obw’amaani nibusobora kwetaagisa kusaba obukoonyezi bw’abagurusi. (Mat. 18:17) Omukristaayo asemeriire kuserra obukoonyezi obu hanyuma y’okuhondera obuhabuzi oburukusangwa omu Matayo 18:15, 16.
b Kakuba Omukristaayo mugenzi waitu atubiihiza, baitu kitakwasireho obunywani bwaitu, nitusobora kucwamu kweganyira ensonga.—Nfu. 26:20.