Nooyeyongera Kumanya Kurungi Yahwe?

1. Twehurra tuta obu tuteekerezaaho amagezi ga Yahwe, okumanya kwe, hamu n’ebintu ebirukuhuniiriza ebi akozere?

WAKATEEKEREZAAHOGA okuhama kw’okumanya kwa Yahwe, amagezi ge amaingi muno, hamu n’ebintu bingi ebirukuhuniiriza ebi akozere? Kituhuniiriza muno obu tuteekerezaaho Omuhangi waitu. Noosobora kwehurra nk’omukwenda Paulo ayahandiikire ati: “Obuguuda bwa Ruhanga, amagezi ge, n’okumanya kwe, ka bihamire! Omulingo acwamu emisango gugumire kugwetegereza omu bwijwire, n’emihanda ye yoona titusobora kugyetegereza tukagimarayo!”—Bar. 11:​33, 34.

2. Habwaki nitusobora kukigumya ngu nitusobora kumanya Yahwe?

² Noobu kiraaba ngu titulimanya buli kintu kyona ekirukukwata hali Yahwe, nitusobora kumanya muntu wa mulingo ki. Omukama Daudi akagambira mutabani we Suleimaani ati: “Manya Ruhanga owa so, omukorrege nomutima oguhikiriire. . . obwolimuserra, olimuzora.” (1 Byom. 28:9) Hanyuma y’ebyasa bingi, omukwenda Yohaana akaijukya Abakristaayo bagenzi be ati: “Akatuha okwetegereza, tumumanye ogu owamazima.” (1 Yoh. 5:20) Ekindi, Yesu akagamba ngu naija kukoonyera abantu kumanya kurungi Ise.—Mat. 11:27.

3. Omu kicweka kinu, nitwija kubazaaho ki?

³ Itwena abeehayo kuheereza Yahwe, tuba twegere ebintu bingi ebirukumukwataho. Baitu nabwo, tituleka “kumanya” Yahwe. (Yoh. 17:3) Ekyokurorraho, nitusobora kweyongera kwega ha bintu ebimuleetera okusemererwa, n’omulingo tusobora kugumya obwesige bwaitu omuli uwe. Leka tubazeeho ebikaguzo bisatu itwena ebi tusemeriire kwekaguza, noobu kiraaba tumazire bwire ki nituheereza Yahwe: Nikimanyisa ki kumanya Yahwe? Habwaki tusemeriire kweyongera kumumanya kurungi? Kandi nitusobora tuta kweyongera kumumanya kurungi?

NIKIMANYISA KI KUMANYA YAHWE?

4. Nikitwarramu ki kumanya Yahwe?

⁴ Obu turaayegaho ebi yagambiire Abayudaaya abakaba nibaruga omu bunyagwa, nikiija kutukoonyera kumanya nikitwarramu ki kumanya Yahwe. Yahwe akabaraganiza ati: “Ndibaha omutima ogwokumanya nyowe, okundi [Yahwe].” (Yer. 24:7) Ky’amananu ngu Abayudaaya abo abaagarukire kuruga Bbabburooni bakaba bamanyire ebintu bingi ebirukukwata hali Yahwe. Baitu bakaba basemeriire kumwirra haihi kuraba omu kweyongera kumwegaho. Ekitabu kimu ekirukusoborra Baibuli, kigamba kiti: “Haroho embaganiza hagati y’okumanya ebirukukwata hali Ruhanga n’okumanya Ruhanga. Nitusobora kulengesaniza kinu n’embaganiza ey’eri hagati y’okusomaho okugonza n’okuba oine omuntu ow’orukugonza.” Titusemeriire kugarukira ha kumanya ngu Ruhanga aroho, kandi ngu ibara lye niryo Yahwe. Twine kumanya Ruhanga Muntu wa mulingo ki.

5. Kiki eki turukwegera hali Omukama Yosiya obukirukuhika h’amakuru g’okumanya Yahwe?

⁵ Obu tweyongera kumanya Yahwe, twega ebintu ebimusemeza hamu n’ebintu ebimubiihiza. Teekerezaaho ekyokurorraho ky’Omukama Yosiya. Baibuli egamba eti: “Omu mwaka gwobusingebwe ogwa munana, obwakaba akiri muto, akatandika okuserra Ruhanga wa Daudi isenkuru.” (2 Byom. 34:3) Baitu Yosiya atagarukire ha kwesomesa kyonka. Akateeka omu nkora ebi akaba naayega. Kuraba omuli nabbi Yeremiya, Yahwe akagamba ngu Yosiya akaba naagonza “ebyamazima nebyobulyo,” kandi yarwanirraga abaine ebizibu hamu n’abanaku. Hanyuma Yahwe akongera yagamba ati: “Eki tinukwo kumanya nyowe?”—Yer. 22:​15, 16.

6. Nkooku kyolekerwe omu Zabbuli 9:​10, kumanya Yahwe nikiija kutukwataho kita?

⁶ Soma Zabbuli 9:10. Obu tweyongera kumanya Yahwe, tweyongera kumwesiga. Kinu nikyo kyahikire hali omukwenda Paulo. Omurundi gwe ogw’okumalirra obu akaba ali omu nkomo kandi ali haihi kwitwa, akahandiika ati: “Tindukukwatwa ensoni habwokuba mmanyire ogu ou naikiririizeemu.” (2 Tim. 1:12) Paulo ebi akaba ayegere n’ebi akaba arabiremu, bikamukoonyera kwesigira kimu Ruhanga. Akaba naakigumya ngu Yahwe akaba atarukwija kwebwa omulingo yamuheeriize n’obwesigwa, kandi akaba naija kumuhumbuura.

HABWAKI TUSEMERIIRE KWEYONGERA KUMANYA YAHWE?

7. Hanyuma y’okuheereza Yahwe emyaka nyingi, kiki ekisobora kubaho?

⁷ Hanyuma y’akasumi, nitusobora kuleka kuteekamu amaani kweyongera kumanya Yahwe nkooku twakoraga kara obu tukaba tutandikire kumwegaho. Habwaki eki nikisobora kubaho? Obu tuba nitwesomesa Baibuli rundi nitugisoma hamu n’ekitebe, nitusobora kuteeka omutima ha mulingo ebi turukusoma bisobora kutukoonyera omu bwomeezi bwaitu obwa buli kiro, n’omulingo tusobora kubikozesa kukoonyera abantu abandi. Ebyahandiikirwe bitwekambisa kukora eki. (2 Tim. 3:​16, 17) Baitu Baibuli etugambira bingi ebirukukwata ha Muhandiiki wayo. (Zab. 25:​8-10) Tutateeka muno omutima ha mulingo obutumwa bwa Baibuli burukutugasira rundi kugasira abantu abandi, tukalema kwekaguza, ‘Ebi ndukusoma nibinyegesa ki hali Yahwe Ruhanga?’

8. Kweyongera kumanya kurungi Yahwe, nikiija kukwataho kita obunywani bwaitu na uwe? (Zabbuli 73:​24-28)

⁸ Obu tweyongera kumanya kurungi Yahwe, enkoragana yaitu na uwe eyeyongera kuguma. Ekyokurorraho, oyehurra ota hali Yahwe hanyuma y’okusoma Baibuli, kurora broadcast eya buli kwezi, rundi obu ogenda ha nsorrokano enkooto? Tukira muno kwehurra tuli haihi na Isiitwe ow’omu iguru. Habwaki? Habwokuba tuba twegere bingi ebirukumukwataho. Kandi eki, kituleetera kumukugiza n’okumusiima. Twehurra nk’omuhandiiki wa zabbuli ayayecumiitirizeeho omulingo Yahwe akaba naamufaaho, kandi yagamba ati: “Ruhanga nigo mani agomutima gwange, nomugabo gwange ogwebiro byona.” (Soma Zabbuli 73:​24-28.) Amaani aga tuteekamu kweyongera kumanya kurungi Yahwe, gatukoonyera kweyongera kusiima obunywani obu twine na uwe obw’omuhendo muno.

9. Kuteekerezaaho Yahwe, nikiija kukwataho kita encwamu zaitu? Bazaaho ekyokurorraho.

⁹ Obu tuteekerezaaho Yahwe, tukaijuka ebi tumwegereho, tukateekerezaaho omulingo ebikorwa byaitu birukumukwataho, nitwija kukora encwamu enungi. (Nfu. 3:​5, 6) Teekerezaaho ekyokurorraho kinu: Ab’oruganda na banyaanya itwe baingi bateeka ekisisani ky’ogu ou bali na uwe omu buswere nambere basobora kwikara nibakirora. Kinu kibakoonyera kwikara nibagonza kandi nibateekerezaaho ou bali na uwe omu buswere, bakora encwamu ezibarukumanya ngu niziija kumusemeza, kandi beetantara kukora ekintu kyona ekiraamusaaliza. Omu mulingo nugwo gumu, obu turaikara nituteekerezaaho Yahwe, nikiija kutukoonyera kukora encwamu eziraamusemeza.—Zab. 19:​13, 14.

10. Nitwija kusobora kukora ki, obu turaayega hali Yahwe?

¹⁰ Twine obusobozi obw’okwoleka emiringo ya Yahwe, habwokuba tukahangwa omu kisisani kye. (Kub. 1:26) Obu tweyongera kwega ha miringo ya Yahwe, tweyongera kwega omulingo turaamwegeraho. Yesu akajumirra abahandiiki n’Abafalisaayo habw’okulemwa kwoleka emiringo ya Ruhanga. Noobu kiraaba ngu bakaba bamanyire kurungi Ebiragiro, bakaba “[banagiriize] ebintu ebirukukirayo obukuru omu Biragiro, nk’obwinganiza, embabazi, hamu n’obwesigwa.” (Mat. 23:23) Kutasisanaho n’abeebembezi b’amadiini abo, leka tukole ekiturukusobora kwetegereza kurungi emiringo ya Yahwe erukurolerwa omu biragiro bye hamu n’omu misingi ye. Kukora eki, nikiija kutukoonyera kwoleka emiringo egi.—1 Yoh. 4:​8, 11.

TWEYONGERA TUTA KUMANYA KURUNGI YAHWE?

11. Okeega ota hali Yahwe?

¹¹ Nooha ayabandize kukwegesa hali Yahwe? Obundi okakuzibwa abazaire abali bamu h’Abakaiso ba Yahwe. Nibasobora kuba baakugambiire ebyokurorraho kuruga omu Baibuli ebirukwoleka emiringo ya Yahwe kandi baakwegesa omulingo ebintu ebi yahangire byoleka emiringo ye. Obundi okaikiriza omu h’Abakaiso ba Yahwe kukwegesa Baibuli. Omwegesa waawe owa Baibuli naasobora kuba yakozeseze kimu ha bikwato byaitu ebi tukozesa kwegesa Baibuli, nk’ekitabu Wegondeze omu Bwomeezi Ebiro n’Ebiro! kukukoonyera kwetegereza kurungi ebyokurorraho kuruga omu Baibuli, n’ebintu Ruhanga ebi yahangire ebi twegesa ha miringo ye enungi.a (Neh. 8:8; Ebik. 14:17) Leka turole omulingo tusobora kweyongera kwega hali Yahwe.

12-13. Kiki eki tusobora kwega hali Yahwe kuruga omu kusoma Baibuli? Bazaaho ekyokurorraho. (Yeremiya 39:​15-18) (Rora n’ekisisani ekya ha kyesweko.)

¹² Omulingo ogw’okubanza ogu tusobora kweyongera kwega hali Yahwe nugwo kuraba omu kwesomesa Ekigambo kye. Obwire obumu, Baibuli ebazaaho emiringo ya Yahwe. (Kurug. 34:​6, 7) Baitu ekira muno kubazaaho abantu hamu n’encwamu ezi baakozere. Obu oraasomaho ebintu nk’ebi, teekerezaaho omulingo bisobora kukwegesa hali Yahwe.

¹³ Teekerezaaho ekyokurorraho kinu. Obu oraasoma Yeremiya 38:​6-13, noija kwegaho Omunyaisiyopiya arukwetwa Ebedi-mereki, ayajunire nabbi Yeremiya. Hataroho kugurukyagurukya, noorora emiringo ei osobora kwegera ha kwefeereza, obumanzi, hamu n’okugonza Ebedi-mereki ebi yayolekere. Baitu noorora n’emiringo ya Yahwe, ey’eyolekerwe omu kyokurorraho kinu? (Soma Yeremiya 39:​15-18.) Ekyokurorraho, rukarra ki orurukwoleka ngu Yahwe naasiima, w’obwinganiza kandi tasoroora? Miringo ki endi eya Yahwe ei okurora omu kyokurorraho kinu? Buli murundi obu osoma enkarra omu Baibuli, serramu emiringo ya Yahwe ey’eyolekerwe, hanyuma omusiime kandi omukugize habw’emiringo egi.

14. Tusemeriire kukora ki, kurora twagasirwa omu bwijwire obu tutwara obwire kurora ebyahangirwe?

¹⁴ Omulingo ogwa kabiri ogu tusobora kweyongera kwega hali Yahwe nugwo kuraba omu kwecumiitirizaaho ebintu ebi yahangire. (Zab. 145:​9, 10) Ky’amananu ngu tikirukumara kugarukira ha kwecumiitirizaaho ebyahangirwe kyonka. Abantu abamu bamara obwire oburukukira obwingi nibeega ha byahangirwe baitu balemwa kwetegereza emiringo ya Ruhanga rundi kwikiriza ngu aroho! Omukwenda Paulo akahandiika ngu ‘emiringo ye etarukurorwa . . . , neerolerwa kimu kuruga ensi ehangwa omuli ebi ebyahangirwe.’ (Bar. 1:20) Empindura emu eya Baibuli ey’orukarra runu egamba ngu, omuntu arukwetegereza kurungi naasobora kurora emiringo ya Ruhanga. Nahabweki, tusemeriire kwecumiitirizaaho ebi turukurora kusobora kwetegereza emiringo y’Omuhangi waitu.

15. Kiki Patrick eki akozere kusobora kweyongera kumanya kurungi Yahwe, kandi na iwe noosobora kumwegeraho ota? (Rora n’ekisisani.)

¹⁵ Baingi omuli itwe twikara omu mbuga nambere hatali eby’obuhangwa bingi. Obu oraaba oli omu nyikara nk’egi, nikiba nikikyasoboka kwegera ha byahangirwe? Teekerezaaho ekyokurorraho kya Patrick, arukwikara omu Brazzaville, orubuga orukooto omu ihanga lya Congo. Naagamba ati: “Ndengaho kurora ebyahangirwe obu mba ndi ha rubbalaza rwange. Nkira kurora obuhuka obutaito rundi obunyonyi obutaito nibuserra ebyokulya rundi ahokuraara. Kiro kimu, nkatwara obwire narora ebinyonyi ebimu nibikora ekiju kyabyo. Bikaserra ebintu eby’okukozesa ebirukworoba nukwo obwana bwabyo bwikale kurungi.” Baitu Patrick atagarukire ha kurora ebinyonyi; akateekerezaaho muno Omuhangi. Naagamba ati: “Nkakyetegereza ngu Yahwe afaaho ebyetaago by’ebihangirwe bye, otwaliiremu n’ebyo ebirukuzooka nk’ebitaito muno. Kinu kingumiza kimu ngu na nyowe nanfaaho kandi taliremwa kumpa ebyetaago byange.”

16. Kiki ekyakoonyiire Malyamu, nyina Yesu kweyongera kumanya kurungi Yahwe, kandi na itwe nitusobora tuta kumwegeraho? (Rora n’ekisisani.)

¹⁶ Omulingo ogwa kasatu ogu tusobora kweyongera kumanya kurungi Yahwe, nugwo kuraba omu kwecumiitirizaaho ebintu ebi twarabiremu. Eki nikyo Malyamu, nyina Yesu yakozere. Akaba amanyire kurungi Yahwe kandi akaba ‘asiimirwe omu maiso ga Ruhanga.’ (Luk. 1:30) Baitu hanyuma akaheebwa obujunaanizibwa obw’amaani, obw’okuba nyina Yesu, Omwana wa Ruhanga. Yahwe akagarramu Malyamu amaani naakozesa Erizabbessi omunyabuzaale we hamu na malika Gabulyeri. Hanyuma akeecumiitirizaaho ebi yarabiremu eki byamwegeseze hali Yahwe otwaliiremu amaani ge, embabazi ze, okutasoroora kwe, n’omulingo afaaho abantu abarorwa nk’aba hansi. (Luk. 1:​46-55) Nkooku Malyamu yasiimire obusagiki bwa Ruhanga, na itwe tusiima muno Yahwe obu atusagika omu kasumi akahikire. (Baheb. 4:16) Obu oraatunga obusagiki bunu, weekaguze: ‘Kinu kinyegeseze ki hali Yahwe? Miringo ki eya Yahwe ei nyegere?’

TITULIREKA KWEGA

17-18. Habwaki tutarukwija kuleka kwega hali Yahwe?

¹⁷ Teekerezaaho obwingi bw’ebintu ebi tulyega hali Yahwe omu nsi empyaka. Nitwija kutunga emizingo empyaka ey’erumu ebiragiro bye ebi tusemeriire kworobera. (Kus. 20:12) Nitwija kweyongera kumwegaho kurungi, obu nitweyongera kwegondeza omu bintu ebi yahangire. (Is. 11:​6-9) Kandi nitwija kweyongera kumanya Isiitwe kuraba omu kwega ebintu ebihyaka. Ekyokurorraho, obu tulirora naahumbuura abantu baitu aba turukugonza, n’omulingo alitukoonyeramu kufooka abantu abahikiriire.

¹⁸ Titulireka kwega hali Yahwe. Aikaireho kuruga obusinge bwona, nahabweki, “okwetegerezakwe tikurukulengwa.” (Zab. 90:2; 147:5) Omuntu “tarukusobora okuzora omulimo Ruhanga oguyakozire okuruga ha kubanza nokuhikya ha mpero.” (Mug. 3:11) Nahabweki, noobu turaaba tumazire akasumi kaingi nituheereza Yahwe, leka tukozese buli mugisa gwona ogu tutunga kweyongera kwega hali Isiitwe ow’okugonza.