EKYOKURORRAHO KY’OMUNTU KURUGA OMU BAIBULI

Kurakuraniza Okutiina Ruhanga, nka Obbadiya

Obbadiya akaba ahairwe obujunaanizibwa bw’okurolerra ebintu by’omukama omubi Ahabbu, ayaikiriize okuramya kwa Bbaali kweyongera kukanya omu Isaleeri. Baitu nabwo, Obbadiya yatiinaga Yahwe ‘kuruga omu buto bwe.’ (1 Bakam. 18:1-13) Nahabweki, Omugo Yezebberi obu yaragiire ngu banabbi ba Yahwe boona baitwe, Obbadiya akakimanya ngu akaba asemeriire kwoleka obumanzi kusobora kutangira ekikorwa kinu ekibi kubaho. Kusereka nabbi omu wenka kikaba kyakabi muno; baitu Obbadiya akasereka banabbi 100 kandi yaikara naabaha ebyokulya omu kasumi k’enjara ey’amaani! Teekerezaaho omulingo kyamugumiire kurora ngu banabbi baingi ab’ebisuba abaaheerezaaga omukama n’omugo tibaayetegereza ekintu eki akaba naakora.—1 Bakam. 18:19.

Kiki eki turukwegera ha musaija ogu ayatiinaga Ruhanga? Okutiina Obbadiya oku akaba ainiire Ruhanga, kukaba nikukira okutiina oku akaba ainiire Ahabbu. Okutiina Obbadiya oku akaba ainiire Ruhanga, kukamukoonyera kuta obwomeezi bwe omu kabi kusobora kulinda bagenzi be. Kakuba okuramya okw’amananu kuba kutangirwe nambere turukwikara, na itwe tusemeriire kukurakuraniza okutiina Ruhanga. Okutiina nk’oku nikwija kutukoonyera kusagika ab’oruganda na banyaanya itwe abarukuhikwaho ebirengo.