Obukoonyezi Hali Abakazi Abarukutwazibwa Kubi

Ekicweka ekiri ha jw.org ekiine omutwe “Abakazi Kuba n’Obulinzi​—Baibuli n’Ekibazaaho Eta?” kitandika n’ebigambo ebibaziibweho eruguru. Ha kumalirra kw’ekicweka eki haroho linki ey’erukukusobozesa kukihanura omu mulingo gwa PDF, nikisobora kuteerwa ha mpapura kandi noosobora kukikubamu emirundi ena nka turakiti. Munyaanya itwe ow’arukwetwa Stacy ow’arukwikara omu United States naagamba ati: “Nkateera ekicweka kinu ha mpapura kandi nyowe na munyaanya itwe ondi twazitwara omu kiikaro ekiri haihi n’ekitebe kyaitu, nambere abakazi abatwaziibwe kubi batungira obukoonyezi.”

Omu h’abakozi akatukaguza obu araaba naasobora kutunga empapura ezindi akazigabira abandi abakaba nibaikara omu kiikaro eki. Ekyarugiremu, tukamutwarra ebihandiiko ebindi 40 otwaliremu na kaadi 30 ezirukuragirra abantu ha mukura. Hanyuma, obu twagarukireyo, omukuru w’ekiikaro eki akaba naagonza twoleke abakazi abakaba nibaikarayo omulingo basobora kwegamu Baibuli.

Stacy na banyaanya itwe abandi babiri bakagenda omu kiikaro ekindi baagaba ebihandiiko bitaano kandi baabasaba ebindi. Omu h’abakozi akagamba ati: “Ekihandiiko kinu nikiija kukoonyera abakazi abali omu kiikaro kinu.” Akongera yagamba ati, “Ebintu binu nitubyetaaga.” Obu baagarukireyo, bamu h’abakazi bakesorooza kandi baagonza kumanya omulingo twegesaamu Baibuli kandi babiri hali bo bakooleka ngu nibagonza kugenda omu nsorrokano eza ha wiikendi ha Kyombeko ky’Obukama.

Stacy naagamba ati: “Nituhunirra habw’omulingo ekicweka kinu ekirungi kikwasireho abantu baingi. Obu okiteera kandi okakikubamu, kikwanguhira kukikozesa kubazaaho Obukama bwa Ruhanga n’abakazi abarukutwazibwa kubi. Tukasemererwa muno obu twarozere omulingo abantu baasemeriirwe obu baatungire obutumwa bunu, kandi tulindiriire kurora omulingo Yahwe araaha omugisa amaani tutamu kuhikirra abantu banu kubatebeza amakuru amarungi.”