Ikara Oine Okusemererwa Obu Oraaba Okuzire omu Myaka

1-2. Yahwe arora ata abaheereza be abeesigwa abakuzire omu myaka? (Zabbuli 92:12-14; rora n’ekisisani ekya ha kyesweko.)

ABANTU kwetoroora ensi yoona beetwaza omu miringo erukwahukana obukirukuhika ha kukura omu myaka. Ekyokurorraho, teekerezaaho kinu: Noijuka obu warozere oruju rw’okubanza omu mutwe gwawe? Noosobora kuba wagondeze kurusikamu omuntu ondi atakarurozere. Baitu okakyetegereza ngu kusikamu enju kikaba kitarukwija kutangira ezindi kumera. Ekyokurorraho kinu nikyoleka nkooku kigumire kurwanisa kukura omu myaka.

² Baitu Isiitwe ow’omu iguru aine omulingo ogurukwahukana ogu aroramu abaheereza be abakuzire omu myaka. (Nfu. 16:31) Naabalengesaniza n’emiti ey’esemiire. (Soma Zabbuli 92:12-14.) Habwaki naabalengesaniza n’emiti ey’esemiire? Emiti enyakukuzire muno ekira kuba esemiire habwokuba eba ine ebikoora bingi rundi ebyakyo. Ekyokurorraho, haroho omuti ogumu ogurukusangwa omu Japan kandi gwomeera emyaka nyingi muno. Emu ha miti enu ey’erukukirayo kusemera emazire emyaka erukuhingura omu rukumi. Kusisanaho n’emiti enu ey’ekuzire, abaheereza ba Ruhanga abeesigwa abakuzire omu myaka baba basemiire kukira muno omu maiso ga Ruhanga. Yahwe naasiima emiringo enungi abakuzire omu myaka ei baine; bamuheeriize kumara emyaka nyingi, kandi baikaire bali beesigwa hali uwe omu nyikara enungi hamu n’embi.

3. Bazaaho ebyokurorraho ebirukwoleka omulingo Yahwe yakozeseze abakuzire omu myaka kuhikiiriza ekigendererwa kye.

³ Omuntu kukura omu myaka tikimanyisa ngu takyali w’omugaso hali Yahwe.a Kandi amananu gali, Yahwe akakozesa abantu abakaba bakuzire omu myaka kuhikiriza emirimo ey’amaani rundi ebintu ebirukuhuniiriza. Ekyokurorraho, Saara akaba akuzire omu myaka nambere Yahwe yarangiire ngu akaba naija kufooka nyina ihanga ery’amaani kandi nyinenkuru Masiya. (Kub. 17:15-19) Kandi, Musa akaba akuzire omu myaka nambere Yahwe yamuheeriire obujunaanizibwa obw’okwebembera Abaisaleeri kubaiha omu ihanga lya Misiri. (Kurug. 7:6, 7) Kandi omukwenda Yohaana na uwe akaba akuzire omu myaka nambere Yahwe yamuterekereriize n’omwoyo ogurukwera kuhandiika ebitabu bitaano ebya Baibuli.

4. Kusigikirra ha Enfumo 15:15, kiki ekisobora kukoonyera abakuzire omu myaka kugumira ebizibu ebi batangatangana? (Rora n’ekisisani.)

⁴ Abakuzire omu myaka bahikwaho ebizibu bingi muno ebirukwahukana. Munyaanya itwe omu, omu mulingo gw’okusandaara akagamba ngu, “Kukura omu myaka tikuli kw’abaceke.” Baitu kuba n’okusemererwab nikisobora kukoonyera abakuzire omu myaka kugumira ebizibu ebi batangatangana. (Soma Enfumo 15:15.) Omu kicweka kinu nitwija kubazaaho ebintu abakuzire omu myaka basobora kukora kwikara baine okusemererwa. Kandi nitwija n’okurora omulingo abandi basobora kukoonyera ab’oruganda na banyaanya itwe abakuzire omu myaka abali omu kitebe kyabo. Baitu ka tubanze tubazeeho ensonga habwaki nikisobora kuguma kwikara twine okusemererwa obu tuba nitukura omu myaka.

OMULINGO KUKURA OMU MYAKA KISOBORA KUKWATAHO OKUSEMERERWA KWAWE

5. Kiki ekisobora kuleetera bamu h’abakuzire omu myaka kuhwamu amaani?

⁵ Kiki ekisobora kukumaramu amaani? Obundi noosobora kuhwamu amaani habwokuba tokyasobora kukora ebintu ebi wakoraga kara. Noosobora kuhurra nooyegomba akasumi obu okaba okyali muto kandi oine obwomeezi oburungi. (Mug. 7:10) Ekyokurorraho, munyaanya itwe ow’arukwetwa Ruby naagamba ati: “Kujwara engoye kingumira habwokuba nyikara ninsaasa kandi tingendagenda. N’ekintu ekyanguhire nk’okujwara sokisi kingumira. Emikono yange nensaasa kandi tinsobora kukozesa kurungi ebyara byange. N’okukora ebintu ebyanguhire kingumira.” Kandi Harold, ayaheeriizeeho ha Beseeri naagamba ati: “Obwire obumu nkwatwa ekiniga habwokuba tinkyasobora kukora ebintu ebi nayegondezaamuga. Nkaba nyine amaani obu nkaba nkyali muto. Nayegondezaaga omu kuzaana omuzaano ogurukwetwa baseball. Abandi baagambaga ngu, ‘Omupiira mugucumire Harold habwokuba talemwa kuteeba.’ Baitu hati tindukuteekereza ngu ninsobora n’okucuma omupiira.”

6. (a) Nsonga ki ezindi ezisobora kuleetera bamu h’abakuzire omu myaka kuhwamu amaani? (b) Kiki ekisobora kukoonyera abakuzire omu myaka kucwamu obu baraaba basemeriire kuleka kuvuga? (Rora ekicweka ekiine omutwe “Nsemeriire Kuleka Kuvuga?” ekiri omu magaziini enu)

⁶ Noosobora kuhwamu amaani habwokuba tokyasobora kwekorra ebintu ebi wakoraga kara. Obundi nikisobora kwetaagisa omuntu kwija omu ka yaawe kukukorra ebintu ebimu rundi nikisobora kukwetaagisa kwikara n’omu h’abaana baawe. Obundi noosobora kuba ohoirwemu amaani habwokuba obwomeezi bwawe bucekere rundi tokyahweza kurungi kuhika ha rulengo ngu tokyasobora kugenda ahantu oli wenka rundi kuvuga ekiiruka kyona. Mali eki nikisobora kukukwasa enaku y’amaani! Noosobora kuba otakyasobora kukora ebintu ebi wakoraga kara, baitu ijuka ngu okyali w’omugaso hali Yahwe na hali abantu abandi. Kandi kimanye ngu Yahwe naayetegereza omulingo orukwehurra. Ekikuru hali Yahwe teri nzooka yaawe eya haruguru baitu eki oli omunda. Naamanya ngu noomugonza muno kandi noogonza ab’oruganda na banyaanya itwe—1 Sam. 16:7.

7. Kiki ekisobora kukoonyera abo abahoirwemu amaani ngu habwokuba nibasobora kutarora ensi enu embi eya Sitaani neehwerekerra?

⁷ Obundi noosobora kuba ohoirwemu amaani habwokuba nooteekereza ngu osobora kufa otakarozere ensi ya Sitaani neehwerekerezebwa. Obu oraaba nooyehurra omu mulingo ogu, kiki ekisobora kukukoonyera? Lengaho kwijuka ngu Yahwe aine ensonga habwaki akyalinzire kumaraho ensi enu embi. (Is. 30:18) Habwaki akyalindiriire? Okugumiisiriza kwe nikusobozesa obukaikuru n’obukaikuru bw’abantu kutunga obwire n’omugisa ogw’okumumanya n’okumuheereza. (2 Pet. 3:9) Nahabweki obu orayehurra ohoirwemu amaani, lengaho kuteekerezaaho omuhendo gw’abantu abarukwija kugasirwa habw’okugumiisiriza kwa Yahwe empero etakaizire. Kandi bamu h’abantu abo nibasobora kuba bali banyabuzaale baawe.

8. Ebizibu ebireetwaho kukura omu myaka, nibisobora bita kukwataho abakuzire?

⁸ Ka tube tukuzire omu myaka rundi nangwa, obu tuba tutarukwehurra kurungi, nitusobora kukora rundi kubaza ebintu ebi tusobora kweijukya hanyuma. (Mug. 7:7; Yak. 3:2) Ekyokurorraho, omusaija omwesigwa Yobbu obu akaba naabonabona, akabaza ebigambo ebitarumu. (Yob. 6:1-3) Ekindi, abakuzire omu myaka nibasobora kubaza rundi kukora ebintu ebi batakira kukora rundi kubaza habw’oburwaire obu baine rundi habw’emibazi ei barukumira. Baitu noobu turaaba tukuzire omu myaka rundi turwaire, tikyakubaire kirungi kutaba bantu b’embabazi tukigenderiire rundi kwikara nitunihira ngu abandi nibaija kutukorra ebintu. Kandi kakuba tukyetegereza ngu tubaliize omuntu omu mulingo ogutali gw’embabazi, tusemeriire kumusaba ekiganyiro.—Mat. 5:23, 24.

OMULINGO TUSOBORA KWIKARA TUSEMERIIRWE

9. Habwaki osemeriire kwikiriza abandi kukukoonyera? (Rora n’ebisisani.)

⁹ Ikiriza abandi kukukoonyera. (Bag. 6:2) Ha kubanza nikisobora kukugumira. Munyaanya itwe arukwetwa Gretl naagamba ati: “Obwire obumu, kingumira kwikiriza obukoonyezi kuruga h’abandi, habwokuba nyehurra ngu niinyija kubafookera omugugu. Kintwaliire akasumi kuhindura enteekereza yange n’okwikiriza ngu niinyetaaga obukoonyezi.” Obu oikiriza obukoonyezi kuruga h’abandi, oba noobaha omugisa ogw’okutunga okusemererwa okuruga omu kugaba. (Ebik. 20:35) Kandi na iwe nikiija kukusemeza kurora omulingo abandi barukukugonza kandi barukukufaaho.

10. Habwaki osemeriire kwijuka kusiima? (Rora n’ebisisani.)

¹⁰ Ba muntu arukusiima. (Bak. 3:15; 1 Bas. 5:18) Abantu abandi obu batukorra ebintu ebirungi, nitusobora kusiimira ha mutima baitu tukeebwa kubagambira. Baitu obu tubasekera kandi tukabagambira ngu mwebale, tubaleetera kwehurra ngu b’omugaso kandi ngu nibasiimwa. Leah, ow’arolerra abakuzire omu myaka ha Bbeseeri, naagamba ati: “Omu ha banyaanya itwe aba ndukurolerra andekera obupapura obuhandiikirweho obutumwa oburukwoleka okusiima. Ahandiika ebigambo bike baitu biba by’embabazi. Ngonza muno kubusoma kandi kindeetera muno okusemererwa kukimanya ngu naasiima obukoonyezi bwange.”

11. Noosobora ota kukoonyera abandi? (Rora n’ebisisani.)

¹¹ Lengaho kukoonyera abandi. Obu orakozesa obwire bwawe n’amaani gaawe kukoonyera abandi, nikiija kukukoonyera kutateeka muno omutima ha bizibu byawe. Orufumo rumu omu Afrika rulengesaniza abakuzire omu myaka n’eryahurro ly’ebitabu ebirumu amagezi amarungi. Baitu kakuba abantu batasoma ebitabu ebi, tibasobora kubyegeraho. Na inywe muli nk’eryahurro ly’ebitabu. Nahabweki, leka niinywe mubanze kugira eki mwakoraho kugambiraho abato h’amagezi gaanyu hamu n’ebi murabiremu. Bakaguze ebikaguzo kandi hanyuma ohuliirize. Bagambire nkooku Yahwe akukonyiire omu bwomeezi bwawe n’omulingo kumworobera kirukwija kubaleetera okusemererwa. Hataroho kugurukyagurukya noija kutunga okusemererwa obu orahuumuza ab’oruganda na banyaanya itwe abato kandi okabagarramu amaani.—Zab. 71:18.

12. Kusigikirra hali Isaaya 46:4, kiki Yahwe eki arukuraganiza kukorra abo abakuzire omu myaka? (Rora n’ebisisani.)

¹² Saba Yahwe akuhe amaani. Noobu kiraaba ngu noosobora kwehurra ojwahire omu mubiri rundi omu biteekerezo, ijuka ngu Yahwe “taruha kunu tajwaha.” (Is. 40:28) Yahwe akozesa ata amaani ge agataine bugarukiro? Gumu ha miringo agakozesa nukwo kugarramu amaani abaheereza be abeesigwa abakuzire omu myaka. (Is. 40:29-31) Kandi naaraganiza kubakoonyera. (Soma Isaaya 46:4.) Kandi Yahwe ebi araganiza abihikiiriza. (Yos. 23:14; Is. 55:10, 11) Buli murundi osaba Yahwe kandi okarora okugonza kwe n’obusagiki bwe, kikuleetera okusemererwa.

13. Kusigikirra hali 2 Abakolinso 4:16-18, kiki eki tusemeriire kwijuka? (Rora n’ebisisani.)

¹³ Ijuka ngu enyikara ei orumu y’akacu kake. Obu tukiijuka ngu enyikara ey’egumire y’akacu kake, kitwanguhira kugigumira. Baibuli etugumya ngu oburwaire n’okukura omu myaka biroho habw’akacu kake. (Yob. 33:25; Is. 33:24) Nahabweki noija kutunga okusemererwa kukimanya ngu ebiro ebirungi biri omumaiso hatali enyuma. (Soma 2 Abakolinso 4:16-18.) Baitu kiki abandi eki basobora kukora kukoonyera?

OMULINGO ABANDI BASOBORA KUKOONYERA

14. Habwaki kikuru kubungira abakuzire omu myaka rundi kubaterra esimu?

¹⁴ Ikara noobungira abakuzire omu myaka kandi obaterre esimu. (Baheb. 13:16) Abakuzire omu myaka nibasobora kwehurra bali bonka. Ow’oruganda ow’ataruga omu nju arukwetwa Camille naagamba ati: “Nyikara omu nju kuruga nyenkyakara kuhika rwebagyo, nahabweki mpurra amasu. Obwire obumu nyehurra nk’entale ey’ekuzire ey’esibiirwe omu kiju. Mpurra ntiinire kandi mbihiirwe.” Obu tubungira abakuzire omu myaka tuba nitubagumya ngu bakyali b’omugaso hali itwe kandi ngu nitubagonza. Obundi noosobora kwijuka akasumi obu okaba noogonza kubungira rundi kuterra ow’oruganda rundi munyaanya itwe ow’akuzire omu myaka ow’omu kitebe kyawe baitu tiwakikora. Itwena twine bingi eby’okukora. Hati, kiki ekisobora kutukoonyera “kumanya ebintu ebirukukirayo obukuru,” ebirukutwarramu kubungira abakuzire omu myaka? (Baf. 1:10) Noosobora kuhandiika ebigambo ha kalenda yaawe ebiraakwijukya kusindikira abakuzire omu myaka ab’omu kitebe kyawe obutumwa rundi kubaterra esimu. Weeteereho obwire obw’okubabungira.

15. Bintu ki abato n’abakuzire omu myaka ebi basobora kukora hamu?

¹⁵ Obu oraaba okyali muto, noosobora kweralikirra habwokuba tomanyire ebintu ebi osobora kubazaaho rundi kukora n’abakuzire omu myaka. Baitu oteeralikirra, eki orakora lengaho kuba omunywani omurungi. (Nfu. 17:17) Baza n’abakuzire omu myaka ensorrokano zitakatandikire na hanyuma y’okuhwa. Obundi noosobora kubakaguza kukugambira ekyahandiikirwe eki bakira kugonza rundi ekintu ekirukusekesa ekyababaireho bakyali bato. Noosobora n’okubaraaliza kurora hamu puroguraamu eya JW Broadcasting^®. Noosobora kubakoonyera kuraba omu kubakorra ebintu ebi batasobora kwekorra. Ekyokurorraho, noosobora kubakoonyera kukigumya ngu ebyoma byabo ebyakalimagezi nibikora kurungi, n’okubahanurra ebitabu ebihyaka ebi tukozesa omu kwesomesa. Munyaanya itwe ow’arukwetwa Carol naagamba ati: “Weeheyo kukora n’abakuzire omu myaka ebintu ebi okira kugonza. Noobu kiraaba ngu nkuzire omu myaka, ninkyagonza kwegondeza omu bwomeezi, nk’okugenda kugura ebintu, kulya aheeru n’okubungira ebiikaro ebisemiire.” Kandi munyaanya itwe ow’arukwetwa Maira naagamba ati: “Omu ha banywani bange aine emyaka 90. Nankiza emyaka 57. Baitu eki nkira n’okukyebwa habwokuba twikara nituseka hamu kandi turora hamu fiilimu. Kandi obu tutunga ebizibu tukoonyerangana.”

16. Habwaki kirungi kugenda n’abakuzire omu myaka obu baba nibagenda omu irwarro?

¹⁶ Genda na bo kurora dakitaali. Noosobora kubakoonyera kubatwara omu irwarro kandi okakigumya ngu badakitaali nibabatwaza omu mulingo omurungi kandi nibabaha obujanjabi obu barukwetaaga. (Is. 1:17) Noosobora n’okubakoonyera kuraba omu kuhandiika ebintu badakitaali ebi babagambiire. Munyaanya itwe ow’akuzire omu myaka ow’arukwetwa Ruth naagamba ati: “Emirundi erukukira obwingi obu ngenda nyenka omu irwarro, dakitaali takira kwikiriza ebi ndukumugambira. Badakitaali bakira kungambira ebintu nka, ‘Toli murwaire, oihireho iwe nukwo orukuteekereza.’ Baitu obu ngenda n’omuntu ondi, habaho embaganiza ha mulingo dakitaali abazaamu na nyowe. Ninsiima muno ab’oruganda na banyaanya itwe abahayo obwire bwabo kunsendekereza.”

17. Miringo ki ey’okutebeza ei osobora kwejumbiramu oli hamu n’abakuzire omu myaka?

¹⁷ Kora na bo omu buheereza. Bamu h’abakuzire omu myaka nibasobora kuba bataine maani ag’okutebeza nju ha nju. Noosobora kuraaliza munyaanya itwe ow’akuzire omu myaka kukweteeranizaaho omu kutebeza okwa h’akagaali. Noosobora kumuleetera entebe nukwo asobole kwikarra haihi n’akagaali. Rundi noosobora kutwara ow’oruganda ow’akuzire omu myaka ha mwegi waawe, rundi kwegeseza omwegi waawe omu ka y’ow’oruganda. Abagurusi nibasobora kukora enteekaniza ez’okuba n’ensorrokano ez’okugenda omu buheereza omu maka g’ab’oruganda abakuzire nukwo na bo basobole kuzeejumbiramu. Amaani aga tutamu kukoonyera abakuzire omu myaka tigafa busa.—Nfu. 3:27; Bar. 12:10.

18. Kiki eki turukwija kubazaaho omu kicweka ekirukuhonderaho?

¹⁸ Ekicweka kinu kyatukoonyera kukiijuka ngu Yahwe agonza abakuzire omu myaka kandi abarora nk’ab’omuhendo. Kandi na itwe nukwo tubarora tuti! Kukura omu myaka kwija n’ebizibu bingi, baitu habw’obukoonyezi bwa Yahwe, noosobora kwikara oine okusemererwa. (Zab. 37:25) Mali ka nikigarramu amaani kukimanya ngu ebiro byawe ebirungi biri omumaiso hatali enyuma! Baitu ab’oruganda na banyaanya itwe abamu baine ekizibu ekirukwahukana, baine obujunaanizibwa obw’okurolerra omunyabuzaale ow’akuzire omu myaka, omwana rundi omunywani ow’arwaire. Nibasobora bata kwikara baine okusemererwa? Ekicweka ekirukuhonderaho nikiija kugarukamu ekikaguzo eki.