Otaikaraho Kubatizibwa

1. Nsonga ki enungi ezisemeriire kutuleetera kubatizibwa?

NOGONZA Yahwe Ruhanga ow’akuhaire buli kisembo kyona ekirungi otwaliiremu n’ekisembo eky’obwomeezi? Nogonza kumwoleka ngu nomugonza? Omulingo ogurukukirayo oburungi ogu osobora kukikoramu nukwo kwehayo kandi okooleka okwehayo kwawe kuraba omu kubatizibwa. Ebintu binu bikukonyera kufooka kicweka eky’eka ya Yahwe. Ekirarugamu, So kandi Omunywani waawe naija kukwebembera kandi akufeeho habwokuba noija kuba ofookere muntu we. (Zab. 73:24; Is. 43:​1, 2) Okwehayo n’okubatizibwa kwawe bikuha okunihira okw’okwegondeza omu bwomeezi obutahwaho.—1 Pet. 3:21.

2. Biki ebi turukwija kubazaaho omu kicweka kinu?

² Haroho ekintu ekirukukulemesa kubatizibwa? Obu kiraaba nukwo kiri, toli wenka. Haroho obukaikuru n’obukaikuru bw’abantu abakaba baine kukora empindahinduka omu ngeso zaabo hamu n’omu ntekereza yabo kusobora kubatizibwa. Hati, nibaheereza Yahwe n’okusemererwa hamu n’obwekambi. Kiki eki orukwegera hali bamu abaabatiziibwe omu kyasa eky’okubanza? Leka turole ebintu ebikaba nibigonza kubalemesa kandi turole eki turukwegera ha kyokurorraho kyabo.

ABASAMALIYA BAKABATIZIBWA

3. Bintu ki ebikaba nibisobora kulemesa Abasamaliya kubatizibwa?

³ Abasamaliya ab’omu kasumi ka Yesu bakaba bali omu diini ey’ekaba eri omu Sekemu eya kara hamu n’omu matemba ga Buyudaaya. Abasamaliya batakabatiziibwe, bakaba nibeetaaga kutunga okumanya okuhikire okurukusigikirra ha Kigambo kya Ruhanga. Abasamaliya bakaba nibaikiriza ngu ebitabu bitaano eby’okubanza ebya Baibuli nibyo byonka ebyaterekereziibwe omwoyo ogurukwera, kandi ebi nibyo ekitabu ekya Okubanza kuhika ha kitabu ekya Ekyebiragiro, kandi obundi n’ekitabu ekya Yosuha. Baitu nabwo bakaba nibanihira ngu Masiya akaba naija kwija kusigikirra ha murago gwa Ruhanga ogurukusangwa omu Ekyebiragiro 18:​18, 19. (Yoh. 4:25) Kusobora kubatizibwa, bakaba basemeriire kwikiriza Yesu Kristo nka Masiya ow’akaba araganiziibwe. “Abasamaliya baingi” nikyo baakozere. (Yoh. 4:39) Abandi bakaba baine kusingura okusoroora okw’amaani okukaba kuli hagati y’Abasamaliya n’Abayudaaya.—Luk. 9:​52-54.

4. Kusigikirra hali Ebikorwa by’Abakwenda. 8:​5, 6, 14, Abasamaliya abamu baketwaza bata Firipo obu akaba naabatebeza?

⁴ Kiki ekyakonyiire Abasamaliya kubatizibwa? Firipo omutebezi w’enjiri obu yabatebiize “ebirukukwata hali Kristo,” Abasamaliya abamu ‘bakaikiriza ekigambo kya Ruhanga.’ (Soma Ebikorwa by’Abakwenda 8:​5, 6, 14.) N’obu kiraaba ngu Firipo akaba ali Muyudaaya, batange kumuhuliiriza. Obundi bakaijuka enkarra kuruga omu bitabu bitaano eby’okubanza ebirukwoleka ngu Ruhanga tasoroora. (Bir. 10:​17-19) Firipo akakora ebyamahano bingi ebikaba nibitwarramu kukiza abarwaire n’okubinga badaimooni. (Ebik. 8:7) Kinu kikabakonyera kuteeka omutima “hali ebi Firipo ebi yagambire” ebirukukwata hali Kristo, kandi baagumya obwakaiso oburukwoleka ngu Firipo akaba asindikirwe Ruhanga.

5. Masomo ki agatusobora kwegera hali Abasamaliya?

⁵ Abasamaliya abo bakaba nibasobora kwanga kwegera hali Firipo ngu habwokuba akaba ali Muyudaaya rundi ngu habwokuba bakaba batakahurrahoga enyegesa ze. Baitu eki batakiikirize kubaho. Abasamaliya bataikaleho kubatizibwa hanyuma y’okukigumya ngu Firipo akaba naabegesa amananu. Baibuli esoborra eti: “Baitu obu baikiriize Firipo ow’akaba naatebeza amakuru amarungi ag’Obukama bwa Ruhanga hamu n’ibara lya Yesu Kristo, abasaija n’abakazi boona bakaba nibabatizibwa.” (Ebik. 8:12) Nokigumya ngu Ekigambo kya Ruhanga nugo mananu kandi ngu Abakaiso ba Yahwe basingura okusoroora kandi ngu bakora kyona ekirukusoboka kwolekangana okugonza kwonyini nk’akokurorraho akarukwoleka Abakristaayo ab’amananu? (Yoh. 13:35) Obu kiraaba nukwo kiri, otatiina kubatizibwa obu nokigumya ngu Yahwe naija kukuha emigisa.

6. Nosobora ota kwegera ha kyokurorraho kya Ruben?

⁶ Ruben, kuruga omu Germany, akakurra omu ka ey’Abakaiso ba Yahwe. Baitu obu akaba akyali muto, akaba naagurukyagurukya Yahwe obu araaba aroho kwo. Akasingura ata okugurukyagurukya kwe? Obu yakyetegeriize ngu akaba ataine okumanya okuhikire, akacwamu kwega ebirukukiraho. Naagamba ati: “Nkesomesa kusobora kutunga amananu gonyini. Emirundi nyingi nkasomaho enyegesa ey’erukugamba ngu ebintu bitahangwe.” Akasoma akatabu Is There a Creator Who Cares About You? Akatabu kanu kakakwataho muno Ruben. Akagamba ati: ‘Mali! Yahwe aroho kwo.’ Kandi obu yabungiire ekitebe ekikuru eky’Abakaiso ba Yahwe, akeyongerra kimu kusiima obumu obuli hagati y’oruganda orw’ensi yoona. Ruben obu yagarukireyo omu Germany, akabatizibwa aine emyaka 17. Obu oraaba nogurukyagurukya ebintu ebi oyegere, singura okugurukyagurukya oku kuraba omu kukora okuseruliiriza omu bitabu byaitu. Nitusobora kusingura okugurukyagurukya kuraba omu kutunga ‘okumanya okuhikire.’ (Bef. 4:​13, 14) Kandi obu orahurra ebirukukwata ha bumu hamu n’okugonza ebiri hagati y’abantu ba Yahwe omu bicweka ebindi eby’ensi kandi okabyerorra omu kitebe kyawe, noija kweyongerra kimu kusiima oruganda rwaitu orw’ensi yoona.

SAULO OWA TARUSO AKABATIZIBWA

7. Saulo akaba aine kuterekereza entekereza eya mulingo ki?

⁷ Tekerezaaho ekyokurorraho kya Saulo owa Taruso. Akaba amanyire kurungi ebiragiro eby’Abayudaaya kandi akaba aliyo naafooka omuntu ow’amaani omu Bayudaaya. (Bag. 1:​13, 14; Baf. 3:5) Saulo akahiiganiza muno Abakristaayo omu kasumi nambere Abayudaaya baabaroraga nk’abecwireho ekitebe. Akaba aine entekereza etahikire habwokuba yatekerezaaga ngu naakora Ruhanga eki arukugonza. (Ebik. 8:3; 9:​1, 2; 26:​9-11) Kusobora kwikiriza Yesu kandi akabatizibwa nk’Omukristaayo, Saulo na uwe akaba aine kwikiriza kuhiiganizibwa.

8. (a) Kiki ekyakonyiire Saulo kubatizibwa? (b) Kusigikirra ha Ebikorwa by’Abakwenda 22:​12-16, Ananiya akakonyera ata Saulo? (Rora n’ekisisani.)

⁸ Kiki ekyakonyiire Saulo kubatizibwa? Yesu Kristo Omukama ow’akaba aine ekitiinisa ekingi obu yamubonekiire, Saulo akafa amaiso. (Ebik. 9:​3-9) Akasiiba kumara ebiro bisatu kandi naasobora kuba akaba naatekerezaaho ekikaba kimuhikireho. Mali, Saulo akakigumiza kimu ngu Yesu akaba ali Masiya kandi ngu abahondezi be bakaba bali omu diini ey’ehikire. Saulo aine kuba yasaliirwe muno habw’okwejumbira omu kwitwa kwa Sitefano! (Ebik. 22:20) Hanyuma y’ebiro bisatu, omwegeswa Ananiya, akahikirra Saulo yamwigura amaiso, kandi yamwekambisa kubatizibwa ahonaaho. (Soma Ebikorwa by’Abakwenda 22:​12-16.) N’obwebundaazi, Saulo akaikiriza obukonyezi kandi yatandika obwomeezi obuhyaka.—Ebik. 9:​17, 18.

9. Masomo ki ag’orukwegera hali Saulo?

⁹ Haroho amasomo agatusobora kwegera hali Saulo. Akaba naasobora kwikiriza emyehembo rundi kutiina abantu kumulemesa kubatizibwa. Baitu eki atakiikirize kubaho. N’obwebundaazi, Saulo akahindura obwomeezi bwe obu yaikiriize amananu agarukukwata hali Kristo. (Ebik. 26:​14, 19) Saulo akaba ayehaireyo kufooka Omukristaayo n’obu kiraaba ngu akaba akimanyire ngu naija kuhiiganizibwa. (Ebik. 9:​15, 16; 20:​22, 23) Hanyuma y’okubatizibwa kwe, akaikara naayesiga Yahwe kumukonyera kugumira ebirengo ebirukwahukana. (2 Kol. 4:​7-10) Okubatizibwa kwawe nk’omu h’Abakaiso ba Yahwe nikusobora kuleetaho ebirengo baitu noija kutunga obukonyezi. Nosobora kukigumya ngu Ruhanga na Kristo nibaija kwikaraga nibakusagika.—Baf. 4:13.

10. Ekyokurorraho kya Anna nikisobora kukugasira kita?

¹⁰ Anna akakurra omu Bulaaya eya Buruga Izooba. Hanyuma ya maama we kubatizibwa, Anna akatandika kwega Baibuli aine emyaka 9 hanyuma ya ise kumwikiriza. Baitu kinu kikaleetaho ebizibu omu ka yabo enyakurumu abanyabuzaale baingi abaikaraga hamu. Abanyabuzaale bakakirora nk’ekintu ekirukuswaza omuntu kuleka ediini ey’ekika. Anna obu akaba aine emyaka 12, akasaba ise amwikirize kubatizibwa. Ise akaba naagonza kumanya egi obu eraaba ekaba eri ncwamu ye, rundi obu araaba akaba naasindikirizibwa omuntu ondi. Anna akagarukamu ati, “Ningonza Yahwe.” Kandi ise akamwikiriza kubatizibwa. Hanyuma ya Anna kubatizibwa, abanyabuzaale be bakagumizaamu nibamutwaza kubi. Omu h’abanyabuzaale be akamugambira ati: “Obwomeezi bwawe bwakubaire burungi kakuba wabaire musiihani kandi omunywi w’etaaba kukira okuba omu h’Abakaiso ba Yahwe.” Anna akagumira ata ekintu eki? Naagamba ati, “Yahwe akankonyera kuguma kandi nyina nyowe na ise nyowe bakansagika muno.” Anna aikara naijuka obusumi nambere yayeroliire omukono gwa Yahwe omu bwomeezi bwe. Aikara naabazaaho obusumi obu nukwo ateebwa omulingo Yahwe amukonyiire. Obu oraaba notiina okuhakanizibwa, ijuka ngu na iwe Yahwe naija kukukonyera.—Baheb. 13:6.

KORONEERIYO AKABATIZIBWA

11. Koroneeriyo akaba ali omu nyikara ya mulingo ki?

¹¹ Ekindi, nitusobora kwega amasomo amakuru kuruga omu kyokurorraho kya Koroneeriyo. Akaba ali “mukuru w’ekitebe kyabaserikale,” abarukuhika nka 100 omu ihe ly’Abarooma. (Ebik. 10:1) Omuntu nk’ogu naasobora kuba akaba aine ekitiinisa eky’amaani muno omu bantu hamu n’omu mahe. Koroneeriyo “yakorraga abantu ebikorwa bingi ebirungi.” (Ebik. 10:2) Yahwe akasindika omukwenda Petero kumutebeza amakuru amarungi. Obujunaanizibwa bwa Koroneeriyo bukamuleetera kwikaraho kubatizibwa?

12. Kiki ekyakonyiire Koroneeriyo kubatizibwa?

¹² Kiki ekyakonyiire Koroneeriyo kubatizibwa? Baibuli eyoleka ngu uwe “hamu n’ab’omu nju ye yoona bakaba nibatiina Ruhanga.” Kandi Koroneeriyo yaikaraga naasaba Ruhanga. (Ebik. 10:2) Petero obu yatebiize Koroneeriyo amakuru amarungi, uwe hamu n’eka ye, bakaikiriza Yesu kandi babatizibwa ahonaaho. (Ebik. 10:​47, 48) Hataroho kugurukyagurukya, Koroneriyo akaba ayeheriireyo kimu kukora empindahinduka zoona ezirukwetaagisa nukwo uwe hamu n’eka ye basobole kuramiza hamu Yahwe.—Yos. 24:15; Ebik. 10:​24, 33.

13. Masomo ki ag’orukwegera hali Koroneeriyo?

¹³ Kusisanaho na Saulo, Koroneeriyo na uwe akaba naasobora kwikiriza obujunanizibwa bwe kumulemesa kufooka Omukristaayo. Baitu eki atakiikirize kubaho. Kusobora kwikiriza amananu nikikwetaagisa kukora empindahinduka ez’amaani omu bwomeezi bwawe? Obu kiraaba nukwo kiri, Yahwe naija kukukonyera. Naija kukuha emigisa obu oracwamu kuteeka omu nkora emisingi ya Baibuli kusobora kumuheereza.

14. Nosobora ota kugasirwa omu kyokurorraho kya Tsuyoshi?

¹⁴ Tsuyoshi, kuruga omu Japan, akaba aine kuhindura omulimo gwe kusobora kubatizibwa. Akaba ali mukonyezi wa mukuru w’isomero erya Ikenobo eryakonyeraga abantu ha mulingo ogw’okutekanizaamu ebyakyo. Mukuru w’isomero nuwe yatekanizaaga ebyakyo ebyakozesebwaga omu migenzo eya Bbuda ey’okuziika, nahabweki obu yabaga atasoboire kugenda, Tsuyoshi nuwe yakiraga kumukiikirra omu migenzo enu. Baitu Tsuyoshi obu yayegere amananu agarukukwata ha kufa, kukora ekintu kinu ha mulimo gwe kikaba nikiija kumulemesa kubatizibwa. Akakora encwamu ey’okutongera kwejumbira omu migenzo ey’Ababbuda. (2 Kol. 6:​15, 16) Tsuyoshi akabaza na mukuru w’isomero ha nsonga enu. Kiki ekyarugiremu? Tsuyoshi akasobora kwikara ha mulimo baitu atarukwejumbira omu migenzo enu. Akabatizibwa nk’omwaka gumu hanyuma y’okutandika kwega Baibuli.a Obu kiraaba nikikwetaagisa kukora empindahinduka ha mulimo gwawe nukwo osobole kusemeza Ruhanga, kigumye ngu naija kuha iwe n’eka yaawe ebi murukwetaaga.—Zab. 127:2; Mat. 6:33.

ABAKOLINSO BAKABATIZIBWA

15. Kiki ekikaba nikisobora kulemesa Abakolinso kubatizibwa?

¹⁵ Abantu abaikaraga omu rubuga orwa Kolinso eya kara bakaba bamanyirwe muno nk’abarukugonza sente kandi bakaba baine engeso ezitasemiire. Abantu abaikarayoga bakaba nibakora ebintu bibi muno ebitarukusemeza Ruhanga. Nahabweki, kyakugumiire muno abantu abakaba nibaikara omu rubuga oru kusobora kutandika kuheereza Yahwe. Baitu nabwo, omukwenda Paulo obu yaizire omu rubuga oru, kandi yatebeza amakuru amarungi agarukukwata hali Kristo, ‘Abakolinso baingi abaahuliire, bakaikiriza kandi baabatizibwa.’ (Ebik. 18:​7-11) Hanyuma, Mukama waitu Yesu Kristo akabonekera Paulo omu kwolekwa kandi yamugambira ati: “Nyine abantu baingi omu rubuga runu.” Nahabweki, Paulo akagumizaamu naatebeza omu rubuga oru kumara omwaka gumu n’ekicweka.

16. Kiki ekyakonyiire Abakolinso kusobora kusingura ebintu ebikaba nibisobora kubalemesa kubatizibwa? (2 Abakolinso 10:​4, 5)

¹⁶ Kiki ekyakonyiire Abakolinso kubatizibwa? (Soma 2 Abakolinso 10:​4, 5.) Ekigambo kya Ruhanga hamu n’omwoyo gwe ogurukwera ogw’amaani bikabakonyera kukora empindahinduka ez’amaani omu bwomeezi bwabo. (Baheb. 4:12) Abantu ab’omu Kolinso abaikiriize amakuru amarungi bakasobora kwecwaho engeso ezi embi hamu n’ebikorwa nk’obutamiizi, obusuma, hamu n’obukuuhya.—1 Kol. 6:​9-11.b

17. Kiki eki turukwegera hali Abakolinso?

¹⁷ N’obu kiraaba ngu abantu abamu omu Kolinso bakaba baine kusingura engeso ezigumire kuleka, batateekereze ngu kikaba nikiija kubagumira muno kufooka Abakristaayo. Bakateekamu muno amaani kutaaha omu muhanda ogufunzire ogurukuhikya omu bwomeezi obutahwaho. (Mat. 7:​13, 14) Oliyo norwanisa engeso embi kusobora kubatizibwa? Otajwaha! Saba Yahwe akuhe omwoyo gwe gukukonyere kwangirra okwegomba okw’okukora ekintu ekibi.

18. Nosobora ota kugasirwa omu kyokurorraho kya Monika?

¹⁸ Monika, kuruga omu Georgia, akekamba muno kusobora kuleka okubaza kubi hamu n’okwesemeza okutasemiire kusobora kukurakurana kuhika ha kubatizibwa. Naagamba ati: “Omu myaka yange ey’obuto, ekyankonyeraga, kukaba kusaba. Yahwe akaba akimanyire ngu nkaba ningonza kukora ekihikire, kandi yaikaraga nankonyera kandi nanyebembera.” Monika akabatizibwa aine emyaka 16. Haroho engeso ezi oine kuleka nukwo osobole kuheereza Yahwe omu mulingo ogu arukusiima? Gumizaamu nomusaba akuhe amaani agarakukonyera kukora empindahinduka. Yahwe atuha omwoyo gwe ogurukwera atarukwima.—Yoh. 3:34.

OKWIKIRIZA KWAWE NIKUSOBORA KUSIMBURA ENSOZI

19. Kiki ekisobora kukukonyera kusingura ebizibu ebiri nk’ensozi? (Rora n’ekisisani.)

¹⁹ Kigumye ngu Yahwe naakugonza kandi naagonza ofooke kicweka ky’eka ye. Ago gali mananu k’obe oli omu nyikara eza mulingo ki ezisobora kuzooka nk’ezirukukulemesa kubatizibwa. Yesu akagambira guruupu ey’abegeswa be ab’omu kyasa eky’okubanza ati: “Kakuba muba mwine okwikiriza okurukwingana nk’akajuma aka karadaali, nimusobora kugambira orusozi runu ngu, ‘Ruga hanu ogende hali,’ kandi rulirugaho kandi busaho kintu kyona ekiribalema.” (Mat. 17:20) Abo abakaba nibahuliiriza Yesu bakaba bamazire na uwe emyaka nke, nahabweki okwikiriza kwabo kukaba nikukyakura. Baitu Yesu akabagumya ngu kakuba bakurakuraniza okwikiriza okugumire, Yahwe akaba naija kubakonyera kusingura ebizibu ebikaba biri nk’ensozi. Kandi Yahwe naija kukukorra ekintu nikyo kimu!

20. Ebyokurorraho ebibaziibweho omu kicweka kinu eby’Abakristaayo ab’omu kyasa eky’okubanza hamu n’aba kasumi kanu, bikwekambisize kukora ki?

²⁰ Obu oramanyirra ebintu ebisobora kukulemesa kubatizibwa, gira eki wakoraho kubyeihaho omu bwangu. Tunga okuhuumuzibwa n’amaani kuruga omu byokurorraho eby’Abakristaayo ab’omu kyasa eky’okubanza hamu n’ab’omu kasumi kanu. Leka ebyokurorraho byabo bikwekambise kandi bikuleetere kwehayo hali Yahwe kandi obatizibwe. Eri ncwamu ey’erukukirrayo kimu oburungi ei osobora kukora!