4 | Baibuli Eha Obuhabuzi Oburakukonyera

Eki Nikimanyisa Ki?

N’obukiraaba ngu Baibuli tikiri kitabu ky’obujanjabi, etuha amagezi agatukonyera kandi agatusasira. Obuhabuzi obw’eha nibusobora kukonyera omuntu ow’atalibanizibwa oburwaire bw’omutwe. Tekerezaaho ebyokurorraho binu.

Eki Kitukonyera Kita?

‘Abomiire tibetaaga mufumu, baitu abarwaire.’—MATAYO 9:12.

Baibuli eyoleka ngu obwire obumu nikisobora kutwetaagisa kuserra obujanjabi. Baingi bahuumuzibwa obubamanya ebirukukwata ha burwaire bwabo kandi bakatunga obukonyezi kuruga omu badakitaali abakugu.

“Okwemanyiza okwomubiri nikugasa.”—1 TIMOSEO 4:8.

Kukora ebintu ebiraleetera omubiri gwawe kwehurra kurungi nikiija kukukonyera kugumira oburwaire bw’omutwe. Ebintu ebi nibitwarramu kukora ebisasaizi, kulya kurungi, n’okubyama ekirukumara.

“Omutima ogwokusemererwa mubazi murungi: baitu omwoyo ogucwekere gwomya amagufa.”—ENFUMO 17:22.

Kusoma enkarra kuruga omu Baibuli ezirukugarramu amaani n’okweteraho ebigendererwa eby’osobora kuhikaho nikiija kukukonyera kwikara osemeriirwe. Obworateeka omutima ha bintu ebirungi kandi okaikara n’okunihira ngu ebintu nibiija kusemera omu kasumi ak’omumaiso, nikiija kukukonyera kugumira oburwaire bwawe.

“Amagezi gaba nabaculezi.”—ENFUMO 11:2.

Nikisobora kuba ngu tosobora kwekorra buli kimu, nahabweki ikiriza abandi kukukonyera. Abanywani n’abanyabuzaale nibasobora kuba nibagonza kukukonyera, baitu batamanyire nk’oku barakikora. Nahabweki, bagambire ekibasobora kukukorra. Otabanihirramu bingi kandi ikara nobasiima habw’obukonyezi bwabo.

Omulingo Amagezi ga Baibuli Garukukonyera Abarukutalibanizibwa Oburwaire bw’Omutwe

“Nkaba ninyehurra ntali kurungi kandi nkagenda kurora dakitaali. Akangambira oburwaire obunkaba nyine. Kinu kikankonyera kumanyirra ekizibu kyange n’okumanya obujanjabi obunsobora kutunga.”—Nicole,a ow’aine oburwaire bw’omutwe oburukwetwa bipolar.

“Nkizoire ngu kusoma Baibuli buli kiro na mukazi wange kinkonyera kuba n’ebintu ebirungi eby’okutekerezaaho kiro eki. Kandi obwire oburukukira obwingi obumba ndi kubi muno, habaho orukarra orungarramu amaani.”—Peter, ow’atalibanizibwa okwenuuba.

“Kikaba nikingumira kugambira abandi ha burwaire bwange habwokuba nkaba ninswara. Baitu haroho munywani wange ayampuliriize kandi yayetegereza omulingo nkaba ninyehurra. Akankonyera kwehurra kurungi n’okuleka kwehurra ngu ndi nyenka.”—Ji-yoo, atalibanizibwa oburwaire oburukumanywa nka eating disorder.

“Baibuli enkonyiire kuba n’entekereza ey’ehikire obukirukuhika ha kukora n’okuhuumura. Amagezi agarumu gankonyiire kugumira enyehurra embi ezikira kuntalibaniza.”—Timothy, ow’aine oburwaire oburukumanywa nka obsessive-compulsive disorder.