3 | Gasirwa omu Byokurorraho Ebiri omu Baibuli

BAIBULI EBAZAAHO . . . Abasaija n’abakazi abesigwa abaali baine enyehurra nk’ezaitu.—YAKOBO 5:17.

Eki Nikimanyisa Ki?

Omu Baibuli harumu ebyokurorraho eby’abasaija n’abakazi abayehuliire omu miringo erukwahukana. Kakuba tusomaho ebyokurorraho byabo, nitusobora kusanga ngu bamu halibo bakaba baine enyehurra nk’ezaitu.

Eki Kitukonyera Kita?

Itwena tugonza kukimanya ngu abandi nibatwetegereza. Baitu kukira muno, obutuba niturwanisa oburwaire bw’omutwe. Obutuba nitusomaho ebyokurorraho eby’abantu abarukubazibwaho omu Baibuli, nitusobora kukirora ngu nabo bakatunga ebitekerezo n’enyehurra nk’ezaitu. Ekirugamu, tukyetegereza ngu n’abandi bakabirabamu kandi kitukonyera kwehurra ngu tituli itwenka ekisobora kukehya ha nyehurra zaitu embi ezirukututalibaniza.

Omu Baibuli harumu abantu baingi abayehuliire bali bonka kandi betuntwire. Wakehurraga ojwahire kandi otakyagonza kwomeera? Musa, Eriya na Daudi nukwo bayehuliire bati.—Okubara 11:14; 1 Ekyabakama 19:4; Zabuli 55:4.
Baibuli ebazaaho omukazi arukwetwa Hana ayayehuliire “asaliirwe” habwokuba akaba atasobora kuzaara kandi mukaiba yamutuntuzaga muno.—1 Samuiri 1:6, 10.
Baibuli ebazaaho omusaija arukwetwa Yobu. N’obukiraaba ngu akaba aine okwikiriza, akabonabona muno yahika n’okugamba ati: “Ninuga obwomezi bwange; tindukwenda kwomera ebiro byona.”—Yobu 7:16.

Obutumanya omulingo abantu abarukubazibwaho omu Baibuli baayetwaize obubaatungire ebitekerezo ebibi, naitwe nitusobora kutunga amaani kugumira ebirukututuntuza.

Omulingo Baibuli Ekonyiire Kevin

Omulingo Ntalibanizibwa Oburwaire obw’Omutwe Oburukwetwa Bipolar

“Badakitaali bakansangamu oburwaire bunu obunkaba ndi haihi kuhikya emyaka 50. Obwire obumu nyehurra ngu ninsobora kugumira ekizibu kyona. Baitu obwire obundi mpurra ntakyagonza kwomeera.”

Omulingo Baibuli Enkonyiire

“Omuntu arukubazibwaho omu Baibuli ayayehuliire nka nyowe, nuwe omukwenda Petero. Akakora ensobi ezamuletiire kwehurra nk’ataine mugaso. Baitu omu kiikaro ky’okwikara nazitekerezaaho, yamaraga obwire n’abanywani abarukumufaaho. Oburwaire bwange obububa butabukire, ntekerezaaho muno obutahikirra bwange kandi kindetera kwehurra nk’ow’ataine mugaso. Baitu, nka Petero, ndengaho kwikara haihi n’abanywani bange abarukugonza kunkonyera nukwo ntahwamu amaani.

“Omuntu ondi ow’ampumuza muno nuwe Omukama Daudi. Akatuntura muno habw’ensobi ez’akaba akozere. Obwire obumu, nyehurra nkauwe habwokuba haroho obumbaza rundi ninkora ebintu ebinyeyijukya. Ebigambo bya Daudi ebirukusangwa omu Zabuli 51 bimpumuza muno. Omu rukarra rwa 3, akagamba ati: ‘Mmanyire ebyokusiisa byange: nekibi kyange kiri omu maiso gange obutosa.’ Mali ebigambo binu nibibazaaho omulingo nyehurramu obumba nyenuubire, habwokuba kingumira kweroramu akarungi koona. Ebigambo ebiri omu rukarra orwa 10 nabyo binkwataho muno. Daudi akagamba ati: ‘Ompangemu omutima ogusemeziibwe, ai Ruhanga; ongarremu omwoyo omurungi omunda yange.’ Nkozesa ebigambo ebirusisanaho n’ebi obumba ninsaba Ruhanga kunkonyera kwerora nk’oku andora. Kandi orukarra orwa 17 rumpumuza muno. Nirugamba ngu: ‘Omutima ogucwekere, oguzizire, ai Ruhanga, toligugaya.’ Orukarra runu rungumya ngu Ruhanga n’angonza.

“Obunteeka omutima ha byokurorraho ebiri omu Baibuli n’ebintu ebyampaire hati, kigumya okunihira kwange okw’akasumi ak’omumaiso. Kwikara nintekerezaaho emirago ya Baibuli kinkonyera kugumiisiriza.”