Obusumi Bwawe obw’Omumaiso Busigikirra Hali Ki?
Abantu baingi nibatekereza ngu amaani agatarukurorwa nigasobora kubakonyera kumanya ebiraabaho omu kasumi ak’omumaiso. Kinu kibaleetera kukora ebintu ebibatekereza ngu nibiija kubalinda hali akabi kandi bibaleetere emigisa.
BAINGI EBIBAIKIRIRIZAAMU
KURAGURA NIBAKOZESA ENYUNYUUZI: Abantu abamu baikiriza ngu omulingo obwomeezi bwabo buliba omu busumi obw’omumaiso busigikirra ha mulingo enyunyuuzi ziba zitekaniziibwemu omu kasumi akabaazaalirwemu. Nahabweki basoma ebintu ebirukukwata ha kuragura kw’enyunyuuzi nukwo basobole kwetantara akabi akaraababaho rundi kumanya emigisa eibaratunga omu kasumi ak’omumaiso.
ABARANGI: Abantu abamu bagenda omu barangi nukwo babagambire ekiraabaho omu kasumi ak’omumaiso n’ekibasemeriire kukora. Batekereza ngu eki nikisobora kubakonyera kwetantara akabi n’okuba basinguzi.
KURAMYA ABAAFIIRE: Abantu abamu batekereza ngu basemeriire kuramya baruhanga baabo rundi kukorra abaafiire ebintu ebirukubasemeza nukwo basobole kubalinda n’okubaha emigisa. Van,a ow’arukwikara omu Vietnam, n’agamba ati: “Natekerezaaga ngu kuramya abaafiire kyakuletiire nyowe n’abaana bange kuba n’obusumi obw’omumaiso oburungi.”
KUZAARWA OGWAKABIRI: Baingi batekereza ngu obubafa, bazaarwa nk’omuntu ondi rundi nk’ekintu ekindi kandi ngu eki kiikara nikibaho. Baikiriza ngu ebizibu rundi ebirungi ebibatunga bisigikirra ha bintu ebibaakozere batakafiire.
Abandi baingi, enyikiriza enu bagirora nk’etahikire. Baitu nabwo, bakora ebintu ebindi nk’okusoma ebiganja, kuragura nibakozesa enyunyuuzi, kusoma ebitabu eby’oburaguzi n’ebindi. Batekereza ngu kukora eki nikisobora kubakonyera kumanya ekirababaho omu kasumi ak’omumaiso.
KIKI EKIRUGIREMU?
Ebintu ebibaziibweho iruguru, bisoboire kukonyera abarukubiikiririzaamu kuba n’obusumi obw’omumaiso oburungi?
Tekerezaaho ekyokurorraho kya Hào, ow’arukwikara omu Vietnam. Akatandika kwejumbira omu okuragura okw’okukozesa enyunyuuzi, n’okuramya abaafiire nukwo bisobole kumukonyera kumanya ekyokukora. Ebintu ebi bikamukonyera? Hào n’agamba ati: “Bizineesi yange ekagwa, natunga amabanja maingi, natunga ebizibu omu maka kandi nahurra nyenuubire.”
Omusaija arukwetwa Qiuming, kuruga Taiwan, nauwe yaikiririzaaga omu kuragura nakozesa enyunyuuzi, kuzaarwa ogwakabiri, n’okuramya abaafiire. Hanyuma y’okwekebiija enyikiriza zinu n’obwegendereza akagamba ati: “Nkakyetegereza ngu enyegesa n’emigenzo enu nibihakanizangana kandi nibiburanganiza. Nakiroraga ngu obwire oburukukira obwingi ebintu ebinaraguraga ninkozesa enyunyuuzi tibyahikirraga. Kandi obukirukuhika ha kuzaarwa ogwakabiri, obworaaba otarukwijuka ebintu ebikaba biri omu bwomeezi bwawe otakafiire, orasobora ota kuhinduramu kandi oketwaza kurungi omu bwomeezi obuhyaka?”
“Nkakyetegereza ngu enyegesa n’emigenzo enu nibihakanizangana kandi nibiburanganiza.”—QIUMING, TAIWAN
Hào, na Qiuming hamu n’abandi baingi bakyetegeriize ngu obufumu, kuragura n’okozesa enyunyuuzi, kuramya abaafiire rundi kuzaarwa ogwakabiri, tibisobora kutukonyera kumanya ebiraatubaho omu kasumi ak’omumaiso. Eki nikimanyisa ngu titusobora kugira ekitwakoraho kuba n’obusumi obw’omumaiso oburungi?
Baingi batekereza ngu kutunga obwomeezi oburungi omu kasumi ak’omumaiso basemeriire kutunga obwegese obwa haiguru na sente nyingi. Kiki ekirugiremu baingi obubakozere encwamu egi?
a Omu kicweka kinu n’ebirukuhonderaho, amabara agamu gahindwirwe.
b Ebigambo binu nibisangwa omu Kitabu Ekirukwera, Baibuli, omu Abagaratiya 6:7. Kandi omu mahanga agamu ebigambo binu baine orufumu orurukugamba ngu obw’obyara oburo ogesa oburo kandi obw’obyara ebihimba, noija kugesa ebihimba.