Baibuli Eyegesa ngu Omuntu obw’Afa Afooka Ekintu Ekindi Ekyomeezi?
Eky’okugarukamu kuruga omu Baibuli
Nangwa. Enyegesa ey’erukugamba ngu omuntu obw’afa afooka ekintu ekindi ekyomeezi rundi n’enteekereza ey’erukugisisana tesangwa ahantu hoona omu Baibuli. Enyegesa enu esigikirra ha nyegesa ey’erukugamba ngu omwoyo tigufa.a Baitu, Baibuli eyegesa ngu omwoyo nuwe omuntu wena, nahabweki omwoyo gufa. (Okubanza 2:7; Ezekyeri 18:4) Omuntu obw’afa, busaho ekisigara kiri kyomeezi.—Okubanza 3:19; Omugambizi 9:5, 6.
a Enyikiriza ey’erukugamba ngu omwoyo tigufa hamu n’enyikiriza ey’erukugamba ngu omuntu obw’afa afooka ekintu ekindi ekyomeezi zikatandikira omu Baburoni eyakara. Hanyuma, abafirosofa Abahindi bakatandikaho enyegesa ey’erukwetwa Karma. Kusigikirra ha kitabu ekirukwetwa Britannica Encyclopedia of World Religions, Karma kiri kiragiro ekigamba ngu ebintu omuntu akora omu bwomeezi obw’akasumi kanu nibiija kumukwataho n’omu bwomeezi oburukuhonderaho.—Orupapura 913.
Mbaganiza ki ey’eri hagati y’okuhumbuuka n’enyegesa ey’erukugamba ngu omuntu obw’afa afooka ekintu ekindi ekyomeezi?
Enyegesa ya Baibuli ey’erukukwata ha kuhumbuuka terukusigikirra ha nyegesa ey’erukugamba ngu omwoyo tigufa. Omu kasumi ak’okuhumbuuka, abantu abaafiire nibaija kwongera bafoorwe boomezi habw’amaani ga Ruhanga. (Matayo 22:23, 29; Engeso Ezabakwenda 24:15) Okuhumbuuka kutuha okunihira okurungi okw’okuba omu nsi empyaka twine omugisa ogw’okutongera kufa.—2 Petero 3:13; Okusuku’rwa 21:3, 4.
Ebisuba ebirukukwata ha Baibuli hamu n’enyegesa ey’erukugamba ngu omuntu obw’afa afooka ekintu ekindi ekyomeezi
Ekisuba: Baibuli egamba nabbi Eriya obuyafiire akongera yazaarwa nka Yohana Omubatizi.
Amananu: Ruhanga akaranga ngu: “Ndibatumira Eriya nabi,” kandi Yesu akooleka ngu Yohana Omubatizi akahikiriza obunabbi bunu. (Maraki 4:5, 6; Matayo 11:13, 14) Baitu nabwo, kinu kitamanyise ngu Eriya akaba ayongiire kuzaarwa nka Yohana Omubatizi. Yohana wenyini akagamba ngu akaba atali nuwe Eriya. (Yohana 1:21) Oihireho, Yohana akakora omulimo nk’ogwa Eriya ogw’okurangirra obutumwa bwa Ruhanga obu nayeta abantu kwegarukamu. (1 Ekyabakama 18:36, 37; Matayo 3:1) Ekindi, Yohana nauwe akaba ali w’amaani muno nka nabbi Eriya.—Luka 1:13-17.
Ekisuba: Baibuli egamba ngu omuntu obw’afa akafooka ekintu ekindi ekyomeezi, aba ‘azairwe obwakabiri.’
Amananu: Baibuli eyoleka ngu kuzaarwa obwakabiri kimanyisa kuzaarwa buhyaka omu by’omwoyo kandi kinu kibaho omuntu obw’aba akyali mwomeezi. (Yohana 1:12, 13) Kuzaarwa buhyaka kunu tikusigikirra ha bintu omuntu akozere kara, baitu guba mugisa gwa Ruhanga oguha abo abagutunga okunihira okw’embaganiza okw’akasumi ak’omu maiso.—Yohana 3:3; 1 Petero 1:3, 4.