Oliyo n’Oyetekaniriza Ekiijukyo?

Okuhingurwaho kwa Yesu okw’okumalirra kukaba nikugenda kuba kukuru muno. Habwokuba akaba ali haihi kufa, akatekaniza kulya nabakwenda be ekiihuro eky’Okuhingurwaho hamu n’okutandikaho omukoro ogw’Ekiihuro kya Mukama Waitu. Nahabweki akasindika Petero na Yohana kutekaniza ekisiika. (Luk 22:7-13; rora ekisisani ekya ha kyesweko.) Kinu nikitwijukya ngu tusemeriire kwetekaniriza Ekiijukyo ekiraabaho Maaci 27. Ebitebe nibisobora kuba bimazire ira kuteekaniza owaraaha orubazo, omulingo gw’okutungamu omugaati na viini, hamu n’ebindi. Baitu iwe nk’omuntu n’osobora ota kwetekaniriza Ekiijukyo?

Tekaniza omutima gwawe. Soma kandi oyecumiitirizeeho ebyahandiikirwe ebirukukwata ha Kiijukyo. Ebyahandiikirwe binu nibisangwa omu katabu Kwekebiija Ebyahandiikirwe Buli Kiro. Ekicweka Appendix B12 ekirukusangwa omu Baibuli eya New World Translation of the Holy Scriptures kirumu entekaniza ey’okusoma ey’enyakusoboroirwe omu bwijwire. (Rora n’omu katabu Obwomeezi n’Obuheereza Bwaitu nk’Abakristaayo aka Apuli 2020.) Abaine amaka nibasobora kusanga ebintu eby’okubazaaho omu kuramya okw’eka ebirukukwata ha bukuru bw’ekicunguro kakuba bakebera omu Watch Tower Publications Index rundi Research Guide ey’Abakaiso ba Yahwe.

Raaliza abandi kubaho. Wejumbire omu kampaini ey’okuraalliza abantu. Tekerezaaho abo ab’osobora kuraaliza nk’abawatebiizeeho, abeegi baawe ba Baibuli abaakara, abanywani hamu n’abanyabuzaale. Abagurusi basemeriire kwijuka kuraaliza abo abaafukire omu by’omwoyo. Ijuka ngu kakuba omuntu aba atarukwikara omu kiikaro eky’orumu, n’osobora kutunga obwire n’ekiikaro eby’Ekiijukyo eby’omu kiikaro nambere arukwikara kakuba omiga ha kicweka EBIRUKUTUKWAHO ekirukusangwa ha jw.org kandi okakomamu “Ekiijukyo.”

Kintu ki ekindi ekitusobora kukora kwetekaniriza Ekiijukyo?