Kiki Ekitusobora Kwega Kuruga omu Bizina Byaitu Ebindi Ebitali omu Kitabu Kyaitu ky’Ebizina?

Bizina ki ebyokira kugonza ebitali omu kitabu kyaitu ekyebizina? Habwaki n’obigonza? Notekereza ngu ebiri omu vidiyo ey’ebizina ebi nibyoleka ebintu ebiturabamu omu bwomeezi? Nk’oku haroho ebizina ebirukubazaaho ebintu ebirukwahukana, buli muntu aine ekyagonza. N’obukiraaba kiri kiti ebizina binu hamu na vidiyo zabyo tibigarukira ha kutusemeza kwonka.

Buli kizina kirumu amasomo agaturusobora kukozesa omu bwomeezi bwaitu hamu n’omu buheereza. Ebizina ebimu bibazaaho kwoleka amakune, obumu, obunywani, obumanzi, okugonza hamu n’okwikiriza. Ebindi bibazaaho nk’oku tusobora kugaruka hali Yahwe, kuganyira abandi, kulinda obwesigwa bwaitu buli kiro hamu n’okweteraho ebigendererwa eby’omwoyo. Haroho n’ekizina ekirukubazaaho omulingo tusobora kukozesa kurungi amasimu gaitu. Masomo ki agandi ag’osangire omu bizina binu?

MUROLE VIDIYO Y’EKIZINA ENSI EMPYAKA IRIIRE HAIHI, HANYUMA MUGARUKEMU EBIKAGUZO BINU:

• Ow’oruganda na mukazi we abakuzire omu myaka batekeriizeeho migisa ki ey’obusumi bw’omu maiso?​—Kub 12:3

• Nitusobora tuta kugumya okwikiriza kwaitu omu busobozi bwa Yahwe obw’okuhikiriza emirago ye?

• Omu kasumi akatali kahara bintu ki ebirukwija kubaho ebirayongera kututeraniza hamu?

• Okunihira okurukukwata ha Bukama bwa Ruhanga kutukonyera kuta kugumiisiriza ebizibu ebiturukutunga omu kasumi kanu?​—Bar 8:25