Ebizina Ebihyaaka eby’Okuramya Yahwe!
1 Ha ruso’rokano orwa Watch Tower Bible and Tract Society of Pennsylvania, orwabaireho omu Okitobba 4, 2014, entegeka y’okukora empinduka omu kitabu kyaitu eky’ebizina ekarangwa. Ago gaali makuru agarukusemeza muno! Ababaireho bakaijukizibwa omugaso ogw’ebizina omu kuramya kwaitu.—Zab. 96:2.
2 N’osobora kwekaguza, habwaki nikyetaagisa okukora empinduka omu kitabu eky’ebizina? Haro ensonga nyingi. Ey’okubanza, okwetegereza kwaitu okw’Ebyahandiikirwe kwikara nikweyongera kandi eki kiretera ebizina byaitu kuhinduka. (Nfu. 4:18) Ensonga endi eri: ebigambo ebirukukira obwingi ebiri omu kitabu kyaitu eky’ebizina bikaihwa omu mpindura ya New World Translation eyakara. Hati bisemeriire kuhindurwa nukwo bihikaane n’empindura empyaka. Habw’omulimo omukooto ogurukwetagisibwa kuhindura ebigambo, kikacwibwamu okwongeramu ebizina ebihyaaka.
3 Nikitwetaagisa okulinda ekitabu ky’ebizina ekihyaaka kituruke nukwo tutandike okubizina? Nangwa. Nitubamanyisa ngu omu myeezi erukwija, ebizina bimu nibiija kuteekwa ha mukura gwaitu gwa jw.org. Buli kizina ekihyaaka ekiraturukizibwa nikiija kukozesebwa omu ruso’rokano rw’obuheereza kandi kiija kuba kihandiikirweho “ekizina ekihyaaka.”
4 Omulingo Tusobora Kwega Ebizina Ebihyaaka: Tikyanguha kwega ekizina ekihyaaka. Nk’omuhandiiki wa zabuli naitwe nitugonza okuzina obuturaaba tuli omu nso’rokano hatali ‘okuculeera’ kwonka (Zab. 30:12) Obw’oraaba n’ogonza okwega ebizina ebihyaaka, hondera oburagirizi obukuhairwe hanu.
Huliiriza ekizina ekiraaba kiteirwe ha mukura gwaitu emirundi n’emirundi nukwo osobole kukikwata.
Wetegereze ebigambo ebiri omu kizina nukwo osobole kubikwata.
Zina n’oyatura ebigambo n’ohondera akatambi ak’ekizina. Kikole emirundi n’emirundi kuhikya ekizina okikwasire.
Omu kasumi k’Okuramya kw’Eka, murabe omu ebizina binu kuhikya mubikwasire.
5 Omu myeezi erukwija ekicweka ky’obuheereza obukiraaba nikimaliirra n’ekizina ekihyaaka, mwija kubanza mukihulirize nukwo mukizinire hamu nimuhondera akatambi nk’oku tukora buli kiro.
6 Kuzinira hamu tuli omu nso’rokano kituheereza omugisa ogw’okuhaisaniza Yahwe. Nahabwekyo tikiri kirungi kuturuka aheeru obwire bw’okuzina buhikire.
7 Haroho omulingo ogundi ogutusobora kwoleka ngu tusiima ebizina byaitu. Obutuba omu nso’rokano enkooto, bateekaho ebizina ekicweka kya nyenkya’kara n’ekyarwebagyo bitakatandikire. Emirundi ebiri buli mwaka, ab’oruganda bakozesa sente zaabu okugenda Patterson, New York, okuturukya ebizina eby’okukozesa omu kuramya kwaitu. Nahabwekyo ow’oruganda obw’atusaba okwikaara tuhuliirize ebizina puroguraamu etakatandikire kiba kirungi twikaarre tubihulirize. Kinu kiija kutukonyera kutekaniza emitima yaitu okuhuliiriza ebirukugenda kuhonderaho.—Ezera 7:10.
8 Twija kumaliirra oruso’rokano rwaitu orw’ekiro kinu n’ekizina ekihyaaka ekiina omutwe “The Kingdom Is in Place—Let it Come!” Ekizina kinu ekyazinirwe ha ruso’rokano orwa Watch Tower Bible and Tract Society of Pennsylvania, orubaho buli mwaka kikahandiikwa okwijuka emyaka100 eyi Obukama bumazire nibulema.
9 Ebizina ebihyaaka biri bimu ha bintu ebisemiire Yahwe atuhaire. (Mat. 12:35a) Obuturayekamba okubyeega nikiija kutukonyera kuhaisaniza Yahwe n’okumutekamu ekitiinisa.—Zab. 147:1.