Omuhangi Waitu Ow’okugonza n’Atufaaho

1. OMUHANGI WAITU ASOBOZESA IZOOBA KUJWA

Omu nsi tihakusoboire kubamu obwomeezi kakuba izooba lyali litaroho. Omusana gusobozesa emiti kutaaho amababi, ebyakyo, kwana ebijuma, hamu n’ensigo. Kandi gusobozesa emiti kukozesa emihama yayo kwiha amaizi omu itaka gakahika omu bikoora kandi hanyuma gakacucuuka gakagenda omu mwanya.

2. OMUHANGI WAITU ASOBOZESA ENJURA KUGWA

Enjura kisembo eky’omuhendo kuruga hali Ruhanga habwokuba esobozesa ensi kumeza eby’okulya. Ruhanga atuha enjura kuruga omu iguru, sizoni ez’okwerezaamu eby’okulya, atwigusa n’eby’okulya kandi emitima yaitu agiijuza okusemererwa.

3. OMUHANGI WAITU ATUHA EBY’OKULYA N’EBY’OKUJWARA

Banyineeka baingi beralikirra muno obubaraaba nibasobora kutungira ab’omu maka gaabo eby’okulya n’eby’okujwara ebirukumara. Wetegereze Ebyahandiikirwe ekibirukugamba: “Murole enyonyi ezomu mwanya: tizisiga, tizigesa, nobukwakuba okuhunika omu nguli; kandi Isinywe ali omu iguru azirisa. Inywe timurukukira muno ezi?”​—Matayo 6:25, 26.

“Murole ebyakyo ebyomu kisaka, nkokubimera . . . : kandi nimbagambira nti na Sulemani omu [kitiinisa kye kyona] atajwale nkekitahi kyabyo ekimu. Kandi Ruhanga obwajweka ati obunyansi obwomu kisaka . . . , talikira muno okubajweka inywe abokuikiriza okuke?”​—Matayo 6:28-30.

Ruhanga obw’araaba nasobora kutuha eby’okulya n’eby’okujwara, nitukigumya ngu n’asobora n’okutukonyera kutunga ebyetaago byaitu ebindi. Kakuba twebembeza kukora Ruhanga eby’agonza, nasobora kutuha omugisa tukeeza eby’okulya, rundi kutukonyera kutunga omulimo oguratusobozesa kugura ebyetaago byaitu.​—Matayo 6:32, 33.

Mali, obututekerezaaho izooba, enjura, ebinyonyi, hamu n’ebyakyo, kituletera kugonza Ruhanga. Ekicweka ekirukwongeraho nikiija kubazaaho omulingo Omuhangi waitu y’abalize n’abantu.