Omulingo Omuhangi Waitu Ow’okugonza Atumanyisa Emirago Ye

Kurugira kimu ha kuhangwa kw’abantu, Omuhangi waitu aikaire n’abaza n’abantu kurabira omu bamalaika hamu na banabbi. Ekindi, akacwamu obutumwa bwe hamu n’emirago ye kuhandiikwa omu kitabu. Emirago enu n’ekwataho obusumi bwawe obw’omu maiso. Hati ninkaha nambere tusobora kusanga emirago ya Ruhanga omu kasumi kanu?

Obutumwa bwa Ruhanga hali itwe nitubusanga omu Byahandiikirwe Ebirukwera. (2 Timoseo 3:16) Ruhanga akasobozesa ata banabbi kuhandiika obutumwa bwe? Ruhanga akateeka ebitekerezo bye omu bahandiiki abahandiikire Ebyahandiikirwe Ebirukwera. (2 Petero 1:21) Nikisisana n’ekibaho omu kasumi kanu. Kakuba omusuubuzi akozesa omuhandiiki kuhandiika obutumwa omu ibara lye, obutumwa obu nibuba buli bw’omusuubuzi ogu. Omu mulingo nugwo gumu, nobukiraaba ngu Ruhanga akakozesa abantu kuhandiika obutumwa bwe, nuwe mukama w’Ebyahandiikirwe Ebirukwera.

EKIGAMBO KYA RUHANGA NIKISANGWA BULI HAMU

Nk’oku obutumwa kuruga hali Ruhanga bukuru muno, nagonza abantu boona babusome kandi babwetegereze. Omu kasumi kanu, “enjiri eyebiro nebiro” kuruga hali Ruhanga n’etebezebwa omu ‘mahanga goona, n’enganda, n’endimi.’ (Okusuku’rwa 14:6) Habw’omugisa gwa Ruhanga, hati Ebyahandiikirwe Ebirukwera rundi ebicweka byabyo biri omu ndimi ezirukuhingura omu 3,000 kandi nibikira ebitabu ebindi byona omu nsi.