Ikara Nosaba Ruhanga Akuhe Omugisa

Ruhanga akaha abantu ekisembo eky’embaganiza eky’okubaza na uwe, bakamugambira omulingo barukwehurra obu nibaraba omu kusaba. Nabbi Daudi akasaba nagamba ati: “Iwe anyakuhurra okusaba, balikuizira bona abayina omubiri.” (Zabuli 65:2) Baitu nitusobora tuta kusaba nukwo Ruhanga akatuhurra kandi akatuha emigisa?

SABA KURUGA HA MUTIMA OMU MULINGO OGW’OKWEBUNDAAZA

Esaara zaawe zikusobozesa kuseesa omutima gwawe omu maiso ga Ruhanga, ekirukumanyisa kumugambira omulingo gwonyini orukwehurramu. (Zabuli 62:8) Ruhanga Ow’obusobozi bwona agonza kuhurra esaara eziruga ha mutima.

KOZESA IBARA LYA RUHANGA OBWORAABA NOSABA

N’obukiraaba ngu Ruhanga aine ebitiinisa bingi, nka Allah, rundi Mukama. Aine ibara limu lyonka. “Ninyowe Yahwe; niryo ibara lyange.” (Isaya 42:8) Ibara Yahwe liri omu Byahandiikirwe Ebirukwera emirundi erukuhika nka 7,000. Banabbi baingi bakakozesa ibara lya Ruhanga obu baali nibasaba. Ekyokurorraho, nabbi Amosi akabazaaho Ruhanga ati: “Nuwe ayombeka ebisikabye haiguru, kandi asimba emigandaye ha nsi . . . Yahwe niryo ibara lye.” (Amosi 9:6) Naitwe tusemeriire kukozesa ibara lya Ruhanga, Yahwe, obuturukuba nitusaba.

SABA OMU RULIMI RWAWE

Ruhanga namanya ebitekerezo byaitu n’omulingo turukwehurramu, katube nitubaza rulimi ki. Ekigambo kye nikitugambira ngu: “Ruhanga tasorora omu bantu: baitu omu ihanga lyona lyona, anyakumutina nakora okuhikirra nuwe asiimwa.”​—Engeso Ezabakwenda 10:34, 35.

Baitu kusobora kutunga emigisa kuruga hali Ruhanga, titusemeriire kugarukira ha kusaba kwonka. Omu bicweka ebirukwongeraho, nitwija kurora ebitusemeriire kukora.