Emigisa Abantu Aborobera Ruhanga ei Batunga

Nabbi Musa akagamba ngu kakuba tworobera ebiragiro bya Ruhanga, nitwija kutunga emigisa kuruga hali Ruhanga. (Ekyebiragiro 10:13; 11:27) Titworobera Ruhanga ngu habwokuba nitutiina ngu naija kutufubira. Baitu emiringo ye enungi niyo etuletera kumworobera habwokuba nitumugonza kandi titurukugonza kukora ekintu kyona ekisobora kumubihiza. “Kunu nukwo kugonza Ruhanga, itwe tukwate ebiragirobye.”​—1 Yohana 5:3.

Baitu kworobera Ruhanga nikisobora kita kurugamu emigisa? Wetegereze emiringo ebiri.

1. KWOROBERA RUHANGA NIKIIJA KUTUFOORA B’AMAGEZI

“Ninyowe Mukama Ruhanga wawe, arukukwegesa okugasa, arukukuterekereza omu muhanda ogwoliba nogendamu.”​—ISAYA 48:17.

Yahwe Ruhanga, Omuhangi waitu, atumanyire kandi atuha obuhabuzi obuturukwetaaga. Obuturaaba nitugonza enyegesa ze zitukonyere kukora encwamu ez’amagezi, tusemeriire kwega kuruga omu Byahandiikirwe Ebirukwera ebintu eby’arukugonza tukole kandi hanyuma tubikole.

2. KWOROBERA RUHANGA KITULETERA OKUSEMERERWA

“Banyina [okusemererwa] abarukuhurra ekigambo kya Ruhanga nibakikwata.”​—LUKA 11:28.

Omu kasumi kanu, obukaikuru n’obukaikuru bw’abantu aborobera Ekigambo kya Ruhanga batunga okusemererwa kwonyini. Tekerezaaho ekyokurorraho eky’omusaija kuruga omu Spain ow’akaba aine ekiniga kingi kandi ayatwazaaga kubi abantu, otwaliiremu na mukazi we. Kiro kimu akasoma ebigambo bya nabbi Musa ebirukukwata ha buculeezi bwa nabbi Yusufu, mutabani wa nabbi Yakobo. Nabbi Yusufu bakamutunda kuba omwiru kandi bamusiba omu nkomo ataine musango, baitu akaikara ali muculeezi, y’alinda obusinge, kandi y’aganyira abamusobiize. (Okubanza, esuura 37-45) Omusaija onu kuruga omu Spain akagamba ati: “Kutekerezaaho ekyokurorraho kya nabbi Yusufu kikanyekambisa kukurakuraniza obuculeezi, embabazi hamu n’okwetanga. Ekyarugiremu, hati nyine obwomeezi obw’okusemererwa.”

Ebyahandiikirwe Ebirukwera nibituha obuhabuzi oburukukiraho ha mulingo tusemeriire kutwazaamu abandi. Kumanya ebirukukiraho rora ekicweka ekirukuhonderaho.