Kozesa Kurungi Ebiri omu Katabu Baibuli eky’Eyegesa

Omwegi wa Baibuli obwayeyongera kwega Baibuli kandi akakorra hali eby’arukwega, asobora kukurakurana kandi akaana ebyana eby’omwoyo. (Zab. 1:1-3) Tusobora kukoonyera abeegi baitu kukurakurana nitukozesa kurungi akatabu Baibuli eky’Eyegesa.

Ebikaguzo Ebiri ha Kutandika kw’Esuura: Ha kutandika kwa buli suura, haroho ebikaguzo ebigarukwamu omu isomo eryo lyonyini. N’osobora kukozesa ebikaguzo binu kuteekamu omwegi wawe ekihika ky’okugonza kumanya ebimurukugenda kwegaho. Rundi osobora kumusaba akugambire omulingo arukwetegerezaamu buli kikaguzo. Kakusangwa agarukamu ekintu ekitahikire, tikirukukwetaagisa kumuterekereza omu kasumi ako. Eby’araaba akugarukiremu nibiija kukukoonyera kumanya ensonga ez’osemeriire kutaho omutima n’osoborra.—Nfu. 16:23; 18:13.

Ebyongirweho: Omwegi obwaraaba ayetegeriize kandi naikiraniza n’ebimwegere omu suura, osobora kumugamba n’ayesomera ebiri omu byongirweho. Omurundi ogundi obumuraaba nimugenda kwega, banza omukaguze orole obwaraaba yayetegeriize ebiyasomere. Baitu obworarora ngu nikyetaagisa musomere hamu ebimu rundi byona ebiri omu byongirweho, osemeriire kuteekaniza kara ebikaguzo ebyoramukaguza nimusoma obucweka obwo.

Eby’okweijukya: Akasanduuko kanu karumu eby’okugarukamu by’ebikaguzo ebiri ha kutandika kw’esuura. Osobora kukakozesa kugumya ngu omwegi waawe ayetegeriize kandi n’asobora kusoborra eby’omwegeseze. Musome ebiri omu kasanduuko n’ebyahandiikirwe byona ebiraaba birumu. Hanyuma musabe akozese ebyahandikiirwe kusoborra ensonga ezibalizibweho omu kasanduuko.—Eng. 17:2, 3.