Yesu Akoma Saulo Kuba Mukristaayo

Saulo akaba ali musaija Muroma, enzaarwa ya Taruso. Akaba ali Mufalisaayo omukugu omu Biragiro by’Abayudaaya kandi yaharanaga muno Abakristaayo. N’ekiniga kingi yaserraga Abakristaayo omu maka gaabo nukwo abanage omu nkomo. Kandi akaba aroho nasunga abantu ab’ekiniga obu bakaba nibateera Sitefano amabaale kumwita.

Baitu Saulo atagarukire ha kuhiganiza Abakristaayo abaali omu Yerusalemu honka, baitu akasaba nyakatagara omukuru kumwikiriza kugenda kuhiganiza n’Abakristaayo abakaba bali Damasiko. Saulo obwakaba ali haihi kuhika Damasiko, ekyererezi eky’amaani kikamumulikira kandi kyamwehinguliiriza hanyuma yagwa ha nsi. Hanyuma akahurra iraka nirigamba: ‘Saulo, habwaki nompiganiza?’ Saulo nauwe akakaguza ati: ‘Niiwe oha?’ Iraka ligarukamu liti: ‘Ninyowe Yesu. Genda Damasiko kandi noija kumanya ekyosemeriire kukora.’ Saulo akafa amaiso kandi baali baine kumukwatirra kumuhikya omu rubuga Damasiko.

Omu Damasiko, hakaba harumu Omukristaayo omwesigwa arukwetwa Ananiya. Yesu akagambira Ananiya kurabira omu kirooto ati: ‘Imuka ogende hali enju ya Yuda, omu ikuute erirukwetwa Literekeriire okaguze omusaija ow’ibara lya Saulo.’ Ananiya akagarukamu ati: ‘Mukama wange, manyire bingi ebirukukwata ha musaija ogu. Natwara abegeswa baawe omu nkomo.’ Baitu Yesu akagamba ati: ‘Genda nambere ali habwokuba mukomere kutebeza amakuru amarungi omu mahanga maingi.’

Ananiya akagenda nambere Saulo akaba ali kandi yamugambira ati: ‘Mwene waitu, Saulo, Yesu antumire kukwigura amaiso.’ Aho n’aho Saulo akatandika kurora. Saulo akegesebwa ebirukukwata hali Yesu kandi nauwe yafooka muhondezi we. Hanyuma y’okubatizibwa nk’Omukristaayo, Saulo akatandika kutebeza n’Abakristaayo abandi omu maso’rokaniro. Tekerezaaho omulingo Abayudaaya bahuniriiremu obu babarozere Saulo natebeza ebirukwata hali Yesu. Abayudaaya bakagamba: ‘Onu tali nuwe omusaija ayahiganizaaga abegeswa ba Yesu?’

Saulo akatebeza abantu ba Damasiko kumara emyaka esatu. Abayudaaya bakanoba Saulo kandi bagonza n’okumwita. Baitu ab’oruganda obu bakimanyire, bakakonyera Saulo kutoroka. Bakamuta omu kigega kandi bamurabya omu kihuru ekyali kiri omu kisiika ky’orubuga.

Saulo obuyagenzere Yerusalemu, akalengaho kuserra ab’oruganda. Baitu ab’oruganda bo baali nibamutiina. Hanyuma, omwegeswa ow’embabazi arukwetwa Baranaba akamutwara hali abakwenda kandi yabasobororra ngu Saulo akaba ahindukire. Saulo akatandika kukorra hamu n’ekitebe ekiri omu Yerusalemu kutebeza amakuru amarungi n’obwekambi. Hanyuma, akatandika kumanywa nka Paulo.