Busaho Ekikaba Nikisobora Kubalemesa

Hakaba haroho omusaija omulema ow’akaba atarukurubata kandi buli kiro yaikaraaga ha mulyango gwa yekaru nasabiriza. Kiro kimu, akarora omukwenda Petero hamu na Yohana nibataaha omu yekaru. Omusaija onu akabagambira ati: ‘Caali mumpeho sente.’ Omukwenda Petero akamugarukamu ati: ‘Nyine ekintu ekirukukira sente ekindukugonza kukuha. Omu ibara lya Yesu, imuka orubate!’ Omukwenda akamukonyera kwimuka kandi omusaija akatandika kurubata! Abantu bakasemererwa muno habw’eky’amahano kinu kandi baingi kikabaletera kuba baikiriza.

Baitu banyakatagara hamu n’Abasadukayo bakabiihirwa muno. Bakakwata abakwenda, babatwara omu mbuga z’ebiragiro kandi babakaguza ngu: ‘Noha ayabahaire amaani ag’okukiza omusaija onu?’ Omukwenda Petero akagarukamu ati: ‘Tukatunga amaani kuruga hali Yesu ou mwaisire.’ Abebembezi b’ediini bakatokera haiguru bagamba: ‘Ebya Yesu mutabitugambira!’ Abakwenda bakagamba bati: ‘Nitwija kugumizaamu nitumubazaaho. Kandi busaho ekiratulemesa.’

Hanyuma y’okulekerwa, abakwenda banu bakagenda nambere abegeswa abandi bakaba bali kandi babagambira byona ebikaba bibahikireho. Bakasaba hali Yahwe nibagamba: ‘Tukonyere kuba bamanzi nukwo tusobole kugumizaamu nitukora omulimo gwawe.’ Yahwe akabaha omwoyo ogurukwera kandi bagumizaamu nibatebeza n’okukiza abantu. Baingi bakeyongera kuba baikiriza. Abasadukaayo bakabihirwa muno kandi bakwata abakwenda babata omu nkomo. Baitu omu bwire bw’ekiro, Yahwe akatuma maraika yakingura enyigi z’enkomo kandi yagambira abakwenda ati: ‘Mugende mugaruke omu yekaru mwegese.’

Obu bwakiire nyenkyakara, bakagambira abebembezi b’ediini abakaba bali omu rukurato ngu: ‘Enyigi z’enkomo zisibirwe baitu abasaija mukwasirege tibarumu! Baitu bali omu yekaru nibegesa abantu!’ Bakongera bakwata abakwenda omurundi ogundi babatwara omu rukurato. Hanyuma, nyakatagara omukuru akagamba ati: ‘Tukabaha ekiragiro busaho kwongera kutebeza hali Yesu!’ Baitu Petero akamugarukamu ati: “Kituhikiriire [okworobera] Ruhanga okukira abantu.”

Ababembezi b’ediini bakabihirwa muno bagonza kwita abakwenda. Baitu omu h’Abafalisaayo arukwetwa Gamalyeri akemerra y’agamba ati: ‘Mweriinde! Ruhanga n’asobora kuba ali n’abasaija abo. Nimugonza mali kurwanisa Ruhanga?’ Bakamuhuliiriza kandi tibabaita. Hanyuma y’okutera abakwenda emiigo, bakabaragira kuleka kutebeza kandi babaleka bagenda. Baitu abakwenda bo bakagumizaamu nibatebeza amakuru amarungi n’obwekambi omu yekaru, hamu n’okutebeza nju ha nju.