Ihe lya Yahwe ery’Omurro

Beni-hadadi omukama wa Aramu yaikaraga narwanisa Isareri. Baitu nabbi Erisa nauwe yaikaraga nahabura omukama wa Isareri nukwo asobole kukira. Nahabweki, Omukama Beni-hadadi akagonza kukwata nabbi Erisa. Obuyakizoire ngu nabbi Erisa akaba n’aikara omu rubuga Dosani akasindikayo ihe rye kumukwata.

Ihe ly’Abaramu likagenda Dosani obwire bw’ekiro. Obwire obu bwakiire, omuheereza wa nabbi Erisa akagenda aheeru y’arora orubuga rwona rwetoroirwe ihe erikooto. Akatiina muno kandi yaimukya iraka nagamba: ‘Erisa, tukole ki?’ Erisa akamugarukamu ati: ‘Haroho baingi abali naitwe kubakira.’ Aho naho, Yahwe akasobozesa omuheereza wa Erisa kurora embarasi hamu n’egaali ez’omurro ez’obulemu ezikaba ziri ha nsozi ez’ehingulirize orubuga.

Ihe ly’Aramu obulyalengereho kukwata Erisa, akasaba Yahwe amukonyere. Aho n’aho, abamahe b’Aramu bakaleka kwetegereza nambere bakaba bali, n’obu baraaba baali nibahweza. Erisa akabagambira ati: ‘Runu tiruli nurwo orubuga orumurukuserra. Munkuratire ndabatwara hali omusaija ou murukuserra.’ Bakahondera Erisa yabatwara yabahikiza kimu omu Samaliya, nambere omukama wa Isareri yaikaraga.

Abamahe b’Aramu obu bagarukiremu kwetegereza kandi bamanya nambere bakaba bali, bakatiina muno. Omukama wa Isareri akakaguza Erisa ati: ‘Mbaite?’ Nabbi Erisa akagurora nk’omugisa gw’okusasura abaali baizire kumwita? Nangwa. Erisa akamugambira ati: ‘Otabaita. Bahe eby’okulya kandi obaleke bagende.’ Omukama akabakorra obugenyi kandi yabaleka bataaha.