ISOMO 10

N’osobora Ota Kumanya Okuramya Okw’amananu?

1. Haroho ediini emu yoonka ey’amananu?

Yesu nayegesa — “Mwerinde banabbi abebisuba.”—MATAYO 7:15.

Yesu akegesa abahondezibe ediini emu yoonka ey’amananu. N’esisanaho omuhanda ogurukuhikya omu bwomezi obutahwaho. Yesu akagamba: “Abaguzora bake.” (Matayo 7:14) Ruhanga aikiriza okuramya okusigikirra ha Kigambo kye kwonka. Boona abarukuramya Ruhanga omu mananu bateranizibwa okwikiriza kumu.—Soma Yohana 4:23, 24; 14:6; Abefeso 4:4, 5.

Rora vidiyo Ruhanga Aikiriza Okuramya kwa Buli Mulingo?

2. Yesu akegesa ki ha Bakristaayo ab’ebisuba?

Omwebembezi w’ediini ali omu kanisa n’ayegesa. Hanyuma aliyo n’aha omugisa amahe agarukugenda omu bulemu. — “Begamba okumanya Ruhanga; baitu omu ngeso zabu bamwehakana.”—TITO 1:16.

Yesu akahabura ha nyegesa za banabbi ab’ebisuba ezitahikire. Kakuba otayegendereza, osobora kubatwara nk’abarukuramya omu mananu. Gonze nibeyeta Bakristaayo, ebikorwa byabu tibikyoleka. Omu kuramya okw’amananu nuho hoonka osobora kusanga Abakristaayo ab’amananu abarukuko’ra hali ebi beega.—Soma Matayo 7:13-23.

3. Abaramya omu mananu n’osobora kubetegereza ota?

Wetegereze ebintu bitanu eby’orukusobora kubarorraho:

Ekigambo kya Ruhanga bakitamu ekitiinisa. Balengaho muno kukorra ha misingi eri omu Kigambo kya Ruhanga. Nahabwekyo, okuramya okuhikire tikusigikirra ha ndora n’entekereza z’abantu baitu ha Kigambo kya Ruhanga. (Matayo 15:7-9) Abaramya omu amananu tibagamba ekintu kimu kandi bakakora ekindi. Eki begesa, nikyo bakora.—Soma Yohana 17:17; 2 Timoseo 3:16, 17.

Omukristaayo n’aha orubazo orukusigikirra ha Baibuli. Hanyuma atebezaho Obukama bwa Ruhanga, akonyera abagweriirwe ekigwererezi, akonyera abakuzire omu myaka.

Batekamu ibara lya Ruhanga Yahwe, ekitiinisa. Yesu akaheesa ibara lya Ruhanga ekitiinisa n’alimanyisa. Akakonyera abantu kumanya Ruhanga n’abegesa kusabaga ibara lye lyezebwe. (Matayo 6:9) Diini ki emanyisa ibara lya Ruhanga nambere oikara?—Soma Yohana 17:26; Abarumi 10:13, 14.
Batebeza hali Obukama bwa Ruhanga. Ruhanga akatuma Yesu kutebeza amakuru amarungi ag’Obukama. Obukama bwa Ruhanga nubwo bwonka oburukusobora kujuna omuntu. Yesu akahika ha kufa kwe n’akyabutebezaho. (Luka 4:43; 8:1; 23:42, 43) Kandi akagamba ngu n’abahondezi be bakutebiize ha Bukama bunu. Bantu be diini ki abakira kukuhikiirra nibatebeza hali Obukama bwa Ruhanga?—Soma Matayo 24:14.
Abahondezi ba Yesu tibali kicweka ky’ensi enu embi. Tibetahya omu by’obulemi n’obunyamulyaine obundi. (Yohana 17:16; 18:36) Kandi tibasubiriza engeso z’abantu b’ensi.—Soma Yakobo 4:4.
Abakristaayo ab’amananu bagonzangana. Ekigambo kya Ruhanga kibatererra kuha buli muntu ekitiinisa n’okutasorora omu nganda. Gonze amadiini ag’ebisuba gahagira abarukurwana omu bulemu, abaramya omu mananu tibakikora. (Mika 4:1-3) Bakozesa obwire bwabu na sente zaabu kukonyera abantu n’ibabagarramu amaani.—Soma Yohana 13:34, 35; 1 Yohana 4:20.

4. Osobora ota kumanyirra ediini ey’amananu?

Diini ki esigikirra ha Kigambo kya Ruhanga omu nyegesa zaayo zoona, eheesa ibara lya Ruhanga ekitiinisa, kandi eyoleka abantu ngu Obukama bwa Ruhanga nubwo bwonka oburukusobora kujuna abantu? Bantu ki aboleka okugonza kandi betantara obulemu? Iwe n’otekereza niyo eha?—Soma 1 Yohana 3:10-12.

Kumanya ebirukukiraho, rora esuura 15 ey’akatabu Baibuli Etwegesa Ki?