ISOMO 11
Emisingi ya Baibuli Etugasira Eta?
1. Habwaki nitwetaaga obuhabuzi?
Emisingi ya Baibuli yakutuletiire eta kwelinda?—ZABULI 36:9.
Omuhangi waitu n’atukira amagezi. Nka taata ow’engonzi atufaaho kandi atatutegekere kwerema. (Yeremiya 10:23) Nkoku omwana omuto ayetaaga okuhabura kuruga hali bazaire be, naitwe nitwetaaga obuhabuzi bwa Ruhanga. (Isaya 48:17, 18) Emisingi ya Baibuli etuhabura kandi obuhabuzi obu tusemerire kuburora nk’ekisembo kuruga hali Ruhanga.—Soma 2 Timoseo 3:16.
Ebiragiro n’emisingi ya Yahwe bitwoleka omulingo tusobora tutwaazamu obwomezi bwaitu hati, n’omulingo turukusobora kutunga obwomezi obutahwaho omu kasumi akam’omu maiso. Kituhikirire kusiima n’okuhondera obuhabuzi bwa Ruhanga habwokuba nuwe y’atuhangire.—Soma Zabuli 19:7, 11; Okusuku’rwa 4:11.
2. Emisingi ya Baibuli niyo eha?
Omu Baibuli harumu enyegesa ezitukonyera kucwamu ha bintu ebikuru Ruhanga ebyarukugonza tukole. Baitu harumu n’ebiragiro ebirukwolekera kimu ebya Ruhanga arukutunihiramu kukora. (Ekyebiragiro 22:8) Twiina kozesa obusobozi bwaitu obw’okutekereza kusobora kumanya eki Baibuli erukutwetaagisa kukora. (Enfumo 2:10-12) Nk’ekyokuroraho Baibuli eyegesa, obwomezi kisembo kuruga hali Ruhanga. Kumanya kinu kitukonyera kwetantara ekintu kyoona ekirukusobora kuteeka obwomezi bwaitu omu kabi gamba, tuli ha mirimo, omuka, rundi twiina hali turukugenda.—Soma Engeso 17:28.
3. Misingi ebiri erukukirayo obukuru?
Yesu akabazaho emisingi ebiri erukukirayo obukuru. Ogw’okubanza gwoleka ekigendererwa ky’obwomezi—kumanya Ruhanga, kumugonza, n’okumuheereza n’obwesigwa. Twiina kutekereza ha musingi gunu omu ncwamu zaitu zoona. (Enfumo 3:6) Boona abako’ra ha musingi gunu batunga omuganjano na Yahwe, kandi nibaija kutunga obwomezi obutahwaho n’okusemererwa kwonyini.—Soma Matayo 22:36-38.
Omusingi ogwakabiri gutwoleka omulingo turukusobora kwikara omu businge n’abatahi baitu. (1 Abakolinso 13:4-7) Kusobora kuko’ra ha musingi gunu twiina kuba n’endora ya Ruhanga anyina h’abantu.—Soma Matayo 7:12; 22:39, 40.
4. Emisingi ya Baibuli Etugasira Eta?
Emisingi ya Baibuli eyegesa amaka kuba n’entekereza erukusisana kandi boona nibagonzangana. (Abakolosai 3:12-14) Ekigambo kya Ruhanga kirumu omusingi ogundi ogulinda amaka ogurukwoleka ngu obuswezi bunyina kuba bw’orutekeero.—Soma Okubanza 2:24.
Kworobera emisingi ya Baibuli kisobora kutukonyera butemarra ha kuserra eby’itungo. Nk’ekyokuroraho, ha mirimo bakira kugonza abantu abakozi abakora muno kandi bali besigwa. (Enfumo 10:4, 26; Abaheburaniya 13:18) Ekigambo kya Ruhanga kituteererra kumarwa ebi tunyina n’okutwara enkoragana yaitu na Yahwe nk’ekikuru.—Soma Matayo 6:24, 25, 33; 1 Timoseo 6:8-10.
Kworobera emisingi ya Baibuli kitulinda. (Enfumo 14:30; 22:24, 25) Nk’ekyokuroraho, kworobera ekiragiro kya Ruhanga ekirukukwata ha butamiizi, kitukonyera kwerinda endwaire ez’akabi n’obutandwa. (Enfumo 23:20) Yahwe aikiriza kunywaho amaarwa make. (Zabuli 104:15; 1 Abakolinso 6:10) Emisingi Ruhanga atuha etukonyera kwetwara omu mulingo ogusemerire n’okulinda ebitekerezo byaitu. (Zabuli 119:97-100) Abakristaayo ab’amananu tibakwata ebiragiro bya Ruhanga habw’ebibamunihiramu baitu bakikora habw’okumuha ekitiinisa.—Soma Matayo 5:14-16.