Abakaiso ba Yahwe Barora Bata Emikoro y’Okuziika?
Enyikiriza zaitu n’ebikorwa byaitu ebiine akakwate n’emikoro ey’okuziika bisigikirra ha nyegesa za Baibuli. Ekyokurorraho:
Tikiri kibi kurra obworukuba oferiirwe. Abegeswa ba Yesu barraga obubaaferwaga abantu baabo. (Yohana 11:33-35, 38; Engeso Ezabakwenda 8:2; 9:39) Nahabweki, omuntu obwaferwa tikaba kasumi k’okujaguza. (Omugambizi 3:1, 4; 7:1-4) Oihireho tukarora nk’akasumi ak’okwoleka abaferiirwe embabazi n’okubahuumuza.—Abarumi 12:15.
Abafiire tibamanyire kintu kyona. Katube nituruga omu ruganda ki rundi nituruga nkaha, twetantara emigenzo n’ebikorwa ebirukusigikirra ha nyikiriza etali omu Baibuli erukugamba ngu abafiire baine ekibamanyire kandi ngu nibasobora kubaza n’abomeezi. (Omugambizi 9:5, 6, 10) Binu nibitwarramu emigenzo nk’okuraara ha rwoto, kukora obugenyi obw’amaani ha kiro ky’okuziika, kwijuka ekiro omuntu yaferiireho buli mwaka, kuhongera abafu, kubaza n’abafu, n’emikoro y’abafakati. Twetantara emigenzo n’ebikorwa nka binu byona habwokuba nitugonza kworobera ekiragiro kya Baibuli ekirukugamba ngu: “Muruge omulibo hagati, . . . kunu mutalikora ha kintu ekitasemeziibwe.”—2 Abakolinso 6:17.
Haroho okunihira hali abantu abafiire. Baibuli eyegesa ngu nihaija kubaho okuhumbuuka kandi ngu akasumi nikaija kuhika okufa kuhweho. (Engeso Ezabakwenda 24:15; Okusuku’rwa 21:4) Okunihira kunu kutukonyera kutaganya rundi kwoleka obusaasi ekihinguraine, nk’oku kwakonyiire Abakristaayo abaakara.—1 Abasesalonika 4:13.
Baibuli etutererra kuba abaculeezi. (Enfumo 11:2) Twikiriza ngu emikoro y’okuziika tikasemeriire kuba kaire k’okweyoleka. (1 Yohana 2:16) Titukora emikoro y’okuziika ey’amaani n’ekigendererwa ky’okusemeza abantu, rundi kugura esanduuko n’engoye eza sente nyingi kwoleka obuguuda.
Titulengaho kuhambiriza abandi enyikiriza obukirukuhika ha kuziika. Omu nsonga enu, tuhondera omusingi ogurukugamba ngu: “Itwena tulyetonganira omu omu hali Ruhanga.” (Abarumi 14:12) Baitu obutuheebwa omugisa, tulengaho kusoborra enyikiriza zaitu “nobuculezi nokutina.”—1 Petero 3:15.
Kuziika kw’Abakaiso ba Yahwe Kuba Kuta?
Ekiikaro: Kakuba eka ecwamu kuba n’omukoro gw’okuziika, nigusobora kuba hona nambere eka eracwamu gube, nigusobora kuba ha Kyombeko ky’Obukama, omu ka yabaferiirwe, nambere bokeza emitumbi, rundi ha kituuro.
Ha kuziika: Orubazo orukusoborra Baibuli ekyegamba ha kufa n’okunihira okw’okuhumbuuka ruheebwa kuhuumuza abaferiirwe. (Yohana 11:25; Abarumi 5:12; 2 Petero 3:13) Arukuha orubazo n’asobora kubazaaho emiringo emirungi ow’afiire eyabaire aine, kandi n’asobora n’okubazaaho ebiturukwegera ha kyokurorraho ky’obwesigwa omuntu ow’afiire ekyataireho.—2 Samuiri 1:17-27.
Ekizina ekirukusigikirra ha Byahandiikirwe nikisobora kuzinwa. (Abakolosai 3:16) Omukoro gw’okuziika gumalirra n’esaara erukuhuumuza.—Abafiripi 4:6, 7.
Kusorooza sente: Titusasuza muntu wena habw’obuheereza bwaitu, otwaliremu n’okuziika, kandi titusorooza sente omu nsorrokano zaitu.—Matayo 10:8.
Kubaho: Abantu abatali Bakaiso ba Yahwe nibatangirirwa kubaho ha mukoro gw’okuziika oguba ha Kyombeko ky’Obukama. Nk’ensorrokano zaitu ezindi, otwaliremu n’okuziika, buli omu wena natangirirwa.
Abakaiso ba Yahwe bagenda ha kuziika okurukwebemberwa amadiini agandi?
Buli omu h’Abakaiso ba Yahwe ayecweramu nasigikirra ha muntu we ow’omunda anyakutendekerwe Baibuli. (1 Timoseo 1:19) Baitu titwejumbira omu mikoro y’ediini eitukuhurra ngu nehakaniza emisingi ya Baibuli.—2 Abakolinso 6:14-17.