Ekibi Ekitaganyirwa Nikyo Kiki?
Eky’okugarukamu kuruga omu Baibuli
Ekibi ekitaganyirwa nikimanyisa ebikorwa otwaliiremu n’enteekereza ebiremesa omusiisi kutunga okuganyirwa kuruga hali Ruhanga. Eki nikisobora kubaho kita?
Ruhanga aganyira abo abegarukamu ebibi byabo, bakahondera endengo ze omu bwomeezi bwabo, kandi bakaikiririza omuli Yesu Kristo. (Engeso Ezabakwenda 3:19, 20) Baitu, omuntu nasobora kukwatirayo akaikara nakora ekibi kandi ataine ekitekerezo eky’okuhindura ebikorwa n’entekereza ye. Baibuli ebazaaho omuntu ogu nk’owaine “omutima omubi” oguba ‘gugumangaine obwebisuba ebyekibi.’ (Abaheburaniya 3:12, 13) Nk’ibumba eriba lyokiibwe omu murro kandi eritasobora kwongera kubumbwa buhyaka, omutima gw’omuntu guba gwehakaniire kimu Ruhanga. (Isaya 45:9) Nihaba hataroho ekintu kyona ekisobora kuleetera omuntu ogu kuganyirwa, nahabweki aba najunanibwa ekibi ekitaganyirwa.—Abaheburaniya 10:26, 27.
Bamu h’abebembezi b’amadiini omu kasumi ka Yesu bakakora ekibi ekitaganyirwa. Bakaba bakimanyire ngu omwoyo gwa Ruhanga ogurukwera nugwo gwasobozesaaga Yesu kukora ebyamahano, baitu nabwo bakigenderraga kugamba ngu amaani yagaihaga hali Sitaani.—Marako 3:22, 28-30.
Ebyokurorraho by’ebibi ebisobora kuganyirwa
Kujuma ibara lya Ruhanga habw’obutamanya. Ha kubanza, omukwenda Paulo akaba najuma ibara lya Ruhanga, baitu hanyuma akagamba ati: “Nkaganyirwa obwokukora ntamanyire nomu kutaikiriza.”—1 Timoseo 1:13.
Obusiihani. Baibuli ebazaaho bamu h’abantu abaali basiihani baitu abaahikire baahindura ebikorwa byabo kandi Ruhanga yabaganyira.—1 Abakolinso 6:9-11.
“Nkozere ekibi ekitaganyirwa?”
Obworaaba mali onobere ekibi ekiwali nokora kara kandi nogonza kuhinduka, eki nikimanyisa ngu tokozere ekibi ekitaganyirwa. Ruhanga nasobora kukuganyira n’obw’ogarukirra okongera okakora ekibi nikyo kimu emirundi nyingi, ekikuru nikyo kutagumanganiza omutima gwawe haluwe.—Isaya 1:18.
Abantu abamu nibasobora kuteekereza ngu bakozere ekibi ekitaganyirwa habwokuba nibatuntuzibwa omuntu wabo ow’omunda. Baitu, Baibuli eyegesa ngu titusemeriire kwikara nitwesiga enyehurra zaitu. (Yeremiya 17:9) Ruhanga tatuhaire obusobozi obw’okucwera omusango omuntu wena—otwaliiremu naitwe itwenka. (Abarumi 14:4, 12) Nasobora kutuganyira, emitima yaitu n’obwegumizaamu n’etujunaana.—1 Yohana 3:19, 20.
Yuda Isikalyota akakora ekibi ekitaganyirwa?
Ego. Omururu gukamuleetera kwiba sente ezikaba zihairweyo habw’omulimo ogurukwera. Ekindi, akefoora ngu nasaalirirwa abanaku kandi kunu ekigendererwa kye kyali ky’okutunga sente nyingi ez’okwiba. (Yohana 12:4-8) Omutima gwa Yuda obugwagumanganiire kimu omu kukora ekibi, akagobeza Yesu habw’ebinusu 30 eby’efeeza. Yesu akaba akimanyire ngu Yuda akaba atarukwija kwegarukamu kuruga ha mutima habw’ekintu ekiyakoraga, egi niyo ensonga habwaki yamwesere “omwana owokuhwerekerra.” (Yohana 17:12) Kinu kikamanyisa ngu Yuda obuyafiire, akaba naija kuhwerekerezebwa habw’ebiro n’ebiro, ataine okunihira okw’okuhumbuuka.—Marako 14:21.
Yuda ategarukemu kuruga ha mutima habw’ekibi kye. Ekibi kye atakigambire Ruhanga, baitu akakigambira abebembezi b’amadiini abayakozere nabo enteekaniza ey’okugobeza Yesu.—Matayo 27:3-5; 2 Abakolinso 7:10.