Abakaiso ba Yahwe Bahambiriza Abantu Abandi Kutaaha Ediini Yabo?
Nangwa, tinukwo kiri. Magaziini yaitu eya Omunaara gw’Omulinzi ekagamba eti: “Kuhambiriza abantu kuhindura ediini yabo tikihikire.”a Twetantara kuhambiriza abantu kufooka Abakaiso ba Yahwe habw’ensonga ezolekerwe hansi:
Yesu atahambirize abantu kwikiriza ebyakaba nayegesa. Akaba akimanyire ngu abantu bake nubo baakwikiriize ebyakaba nayegesa. (Matayo 7:13, 14) Bamu h’abegeswa be obubaatabaijukire habw’ebiyabalize, akabaleka baagenda omu kiikaro ky’okubahambiriza kwikara nauwe.—Yohana 6:60-62, 66-68.
Yesu akegesa abahondezi be kutahambiriza abantu kuhindura ebibarukwikiririzaamu. Omu kiikaro ky’okuhambiriza abantu kwikiriza amakuru amarungi, abegeswa be bakaba basemeriire kuserra abo abaakugaikiriize kandi bakateeka omu nkora ebibeegere.—Matayo 10:7, 11-14.
Kuhambiriza abantu kuhinduka tikiine makuru habwokuba Ruhanga aikiriza okuramya okuruga ha mutima kandi omuntu ayegondiize.—Ekyebiragiro 6:4, 5; Matayo 22:37, 38.
Omulimo gwaitu gw’okuhindura abantu?
Ky’amananu ngu tutebeza amakuru amarungi ‘okuhikya empero z’ensi,’ obu nitwekamba kutebeza “bwerebwere, nomu nju emuemu,” nk’oku Baibuli eturagira. (Engeso Ezabakwenda 1:8; 10:42; 20:20) Kandi nk’Abakristaayo ab’omu kyasa eky’okubanza, obwire obumu abantu batujunana ngu tuhambiriza abantu kuhinduka. (Engeso Ezabakwenda 18:12, 13) Baitu ago tigali mananu. Tituhambiriza abantu kwikiriza ebitubegesa. Oihireho, twikiriza ngu abantu basemeriire kubanza kwega nukwo hanyuma becweremu.
Tituhambiriza abantu kuhindura ediini, titwesereka omu kisisani ky’ediini obu nitusagika eby’obulemi kandi titugaba sente rundi ebintu, nukwo abantu batweteranizeeho. Nitwahukanira kimu n’abantu abeyeta Abakristaayo baitu bakanga kuteekamu Kristo ekitiinisa kuraba omu kukora ebintu nk’ebi.b
Omuntu aine obugabe obw’okuhindura ediini?
Nabbi Iburahimu akaruga omu diini ey’abanyabuzaale be
Ego, Baibuli eyoleka ngu abantu baine obugabe bw’okuhindura ediini. Erumu ebyokurorraho eby’abantu baingi abaacwiremu kuruga omu diini ey’abanyabuzaale kandi baacwamu begondiize kuheereza Ruhanga ow’amananu. Bimu ha byokurorraho eby’abantu abo nubo Iburahimu, Rusi, bamu h’abantu ab’omu Asene, n’omukwenda Paulo. (Yosuha 24:2; Rusi 1:14-16; Engeso Ezabakwenda 17:22, 30-34; Abagaratiya 1:14, 23) Ekindi, Baibuli eyoleka ngu omuntu aine obugabe bw’okucwamu kwanga kuheereza Ruhanga omu mulingo ogw’arukusiima.—1 Yohana 2:19.
Obugabe obw’okuhindura ediini nibusagikwa ekihandiiko ekirukwetwa Universal Declaration of Human Rights, kandi ekitongole eky’Amahanga Ageteraine kyeta ekihandiiko kinu “omusingi ogw’obugabe bw’abantu omu nsi yoona.” Ekihandiiko eki kigamba ngu buli muntu aine “obugabe obw’okuhindura ediini rundi enyikiriza ze” hamu “nokuserra, kutunga, n’okugambiraho abandi entekereza ye,” otwaliremu n’entekereza ye obukirukuhika ha diini.c Baitu nabwo, kinu kyetaagisa kuteekamu ekitiinisa obugabe bw’abantu obw’okwikiriza rundi kwanga enyikiriza ezibatarukwikiranganiza nazo.
Kuhindura ediini kimanyisa kutateekamu ekitiinisa emigenzo y’ekika kyanyu?
Nangwa. Baibuli etutererra kuteekamu ekitiinisa abantu boona, kababe ba diini ki. (1 Petero 2:17) Ekindi, Abakaiso ba Yahwe borobera ekiragiro kya Baibuli eky’okuteekamu ekitiinisa abazaire baabo n’obukiraaba ngu baine enyikiriza ezirukwahukana.—Abefeso 6:2, 3.
Baitu nabwo, tikiri ngu buli omu naija kwikiranganiza na Baibuli eky’egamba. Omukazi omu ayakuliire omu ihanga lya Zambia n’agamba ati: “Nambere nyikara, omuntu kuhindura ediini . . . kirorwa nk’ekikorwa eky’obujeemu kandi nk’ow’agobiize eka yoona n’ekiikaro orukwikaramu.” Omukazi onu akahikwaho enyikara enu obwakaba akyali nsingato. Akatandikire kwega Baibuli n’Abakaiso ba Yahwe kandi hanyuma yacwamu kuhindura ediini ye. N’agamba ati: “Emirundi nyingi bazaire bange bakaikara nibangambira ngu bambihiriirwe muno kandi ngu mbagobiize. Kikangumira muno habwokuba ngonza kusemeza bazaire bange. . . . Kucwamu kuba mwesigwa hali Yahwe omu kiikaro ky’okuhondera emigenzo y’ediini, tikirukumanyisa ngu ngobiize ab’omu ka.”d
a Rora Watchtower eya Janwali 1, 2002, orupapura 12, akacweka 15.
b Ekyokurorraho, nk’omu mwaka 785 Yesu Amazire Kuzaarwa, Charlemagne akateekaho ekiragiro eky’okwita omuntu wena omu Saxony ayayangaga kubatizibwa nk’omu h’Abakristaayo. Ekindi, omu mwaka 1555 Yesu Amazire Kuzaarwa, endagaano erukwetwa Peace of Augsburg, eyatairweho omukono ebitebe ebikaba nibirwanisangana omu kicweka ekyali nikimanywa nka Holy Roman Empire, ekagamba ngu omulemi wena asemeriire kuba Mukatuliki rundi wa Lutheran kandi abantu boona abali hansi y’obulemi bwe basemeriire kuba omu diini ye. Abo abaayangire kutaaha ediini y’omulemi wabo, baali basemeriire kufuruka omu kiikaro eki.
c Obugabe nubwo bumu buli omu bihandiiko nka African Charter on Human and Peoples’ Rights, American Declaration of the Rights and Duties of Man, 2004 Arab Charter on Human Rights, ASEAN (Association of Southeast Asian Nations) Human Rights Declaration, European Convention on Human Rights, hamu na International Covenant on Civil and Political Rights. Baitu nabwo, amahanga agagamba ngu nigaha abantu baabo obugabe obu tigateeka omu nkora ebigabaza.
d Baibuli eyoleka ngu Yahwe, niryo ibara lya Ruhanga ow’amananu.