IKARA OLI BULINDAARA!

Ediini n’obulemu Obuli omu Ihanga lya Ukraine—Kiki Baibuli eky’Egamba?

Wetegereze abebembezi b’amadiini ruranganwa ekibarukugamba ha bulemu obuli omu ihanga lya Ukraine:

“Mukuru w’ediini eya omu ihanga lya Russia, Patriarch Kirill, takajumiriire Russia habwokutahirra Ukraine. . . . Ekeleziya ye egumiizeemu n’erarangya ebisuba hali Ukraine, kandi Putin akozeseze ebisuba binu kugenda omu maiso n’obulemu bunu.”—EUobserver, Maaci 7, 2022.
“Patriarch Kirill . . . asagikire n’amaani ihanga lye kutahirra Ukraine—obu nagamba ngu obulemu bunu buli bulemu obw’okurwanisa ekibi.”—AP News, Maaci 8, 2022.
“Mukuru w’ediini eya Orthodox omu ihanga lya Ukraine, Metropolitan Epiphanius I owa Kyiv, ha kiro kya Bbalaza akasabira abantu be omugisa kugenda kurwanisa ihe lya Russia . . . Akongera yagamba ngu kwita abamahe ba Russia tikiri kibi.”—Jerusalem Post, Maaci 16, 2022.
“Itwe [Ukrainian Council of Churches and Religious Organizations (UCCRO)] nitusagika abamahe ba Ukraine hamu na boona abarukutusagika, nituha omugisa amaani barukutekamu kurwanirra ihanga lya Ukraine hali abanyanzigwa kandi nitubasabira.”—Bigambo bya UCCROa, Febwali 24, 2022.

Kiki ekyorukutekereza? Amadiini agarukugamba ngu nigahondera Yesu gasemeriire kwekambisa abantu baago kugenda omu bulemu? Kiki Baibuli eky’egamba?

Ebyafaayo by’Ediini omu Bulemu

Ebyafaayo nibyoleka ngu obusumi oburukukira obwingi ediini ziikaire nizisagika kugenda omu bulemu, nizigamba ngu kirungi kugenda omu bulemu, rundi ngu nikyetaagisibwa kugenda omu bulemu kandi akasumi nuko kamu nizefoora ngu nizikorra obusinge. Kumara emyaka nyingi, Abakaiso ba Yahwe baikaire nibakonyera abantu kukirora ngu obu bugobya bw’amadiini. Wetegereze bimu ha byokurorraho ebyolekerwe omu bitabu byaitu.

Ekicweka “Obulemu bw’Amadiini—Ekisuba eky’Akabi muno” kikooleka omulingo Ekeleziya ey’abakatuliki yajunaniziibwe n’ekiita bantu ekibaali nibagamba ngu kwali kuheereza Ruhanga na Kristo.
Ekicweka “Ekeleziya ey’Abakatuliki omu Afrika” nikisoborra omulingo amadiini gaalemerwe kutangira obulemu bw’enganda, n’ekiita bantu.
Ebicweka “Tusemeriire Kujunaana Ediini?,” “Omulimo Amadiini Gakozere omu Bulemu bw’Abantu,” hamu na “Ediini Egwera Orubaju” bisoborra omulingo Abakatuliki, aba Orthodox, n’Abapurotesitanti basagikire embaju ez’obulemu bwingi.

Ediini ez’Ekikristaayo Zisemeriire Kusagika Obulemu?

Yesu akeegesa ki: “Gonza mutahi wawe nkokwoyegonza wenka.” (Matayo 22:39) “Mugonzege abanyanzigwa banyu.”—Matayo 5:44-47.

Kitekerezeeho: Ediini n’esobora kugamba ngu n’ehondera ekiragiro kya Yesu kandi akasumi nuko kamu ne’yekambisa abahondezi baayo kwita bagenzi baabo omu bulemu? Kutunga eky’okugarukamu, soma ebicweka binu; “Abakristaayo Abamananu n’Obulemu” na “Nikisoboka Kugonza Abanyanzigwa Baawe?”

Yesu Ekiyagambire: “Obukama bwange tibuli bwomunsi enu: kakuba obukama bwange buli bwomu nsi enu, basaija bange bakurwaine ndeke kuhebwayo.” (Yohana 18:36) “Bona abakwata empirima balifa empirima.”—Matayo 26:47-52.

Kitekerezeeho: Obukiraaba ngu Abakristaayo bakaba batasemeriire kurwana kulinda Yesu, basemeriire kukwata ebyokurwanisa habw’ensonga endi yoona? Soma ekicweka “Obulemu n’Obukristaayo Nibikwatagana?” kurora omulingo Abakristaayo aba kara baahondiire n’obwesigwa ekyokurorraho n’enyegesa za Yesu.

Kiki Ekirukwija Kuhika ha Madiini Agarukusagika Obulemu?

Baibuli n’eyegesa ngu Ruhanga anoba amadiini agarukugamba ngu nigahondera Yesu kandi kunu niganga kuhondera enyegesa ze.—Matayo 7:21-23; Tito 1:16.

Ekitabu eky’Okusuku’rwa nikyoleka ngu Ruhanga n’ajunaana amadiini ago okufa kwa boona “abaisirwe hansi.” (Okusuku’rwa 18:21, 24) Kumanya habwaki, soma ekicweka “Baburoni Orukuru Nikyo Kiki?”
Yesu akakyoleka ngu amadiini goona agarukwanga Ruhanga nigaija kuhwerekerezebwa habw’ebikorwa byago ebibi, nkoku omuti omubi ogwana ebijuma ebibi “bagutema, bagunaga omu murro.” (Matayo 7:15-20) Soma ekicweka “Empero y’Ediini z’Ebisuba Eri Haihi!” kumanya nk’oku kinu kiribaho.

Abakaiso ba Yahwe b’Embaganiza

Abakaiso ba Yahwe omu Russia na Ukraine, n’omu nsi yoona, boorobera ebiragiro bya Yesu ebirukukwata ha kutagwera rubaju omu by’obulemi n’okwetantara obulemu. Habw’esonga enu, titurukwetahya kandi titurukusagika obulemu bunu rundi obundi bwona. Habwokuba tucweriiremu kimu kuhondera Baibuli eky’erukugamba, bamu h’Abakaiso ba Yahwe nibahiiganizibwa. (Yohana 15:19, 20; 2 Timoseo 3:12) Ekyokurorraho, gavumenti ya Russia etaire Abakaiso ba Yahwe baingi omu nkomo kandi abamu bababonaboneseze muno. Bakatwara n’ebyombeka byaitu eby’okuramizaamu. Kumanya ebirukukiraho, genda www.jw-russia.org.

Kurora omulingo Abakaiso ba Yahwe omu Russia baliyo nibahiiganizibwa habw’okwikiriza kwabo, rora vidiyo ey’edakiika ina enyakwine omutwe Abakaiso ba Yahwe omu Irkutsk Baikaire Besigwa n’obukiraaba ngu Amaka Gaabo Nigaazibwa.
Kumara emyaka nyingi, Abakaiso ba Yahwe bamanyirwe kuba bantu abatagwera rubaju. Kurora omulingo bataragweriire rubaju n’obukiraaba ngu bakahiiganizibwa muno omu Nazi Germany n’ey’ekaba eri Soviet Union, rora vidiyo Bakaikara Bagumire omu Kuhiiganizibwa

Nitukusaba obungire omukura gwaitu kumanya ebirukukiraho ha nyikiriza zaitu, otwaliremu n’omurago gwa Baibuli ogw’omu kasumi ak’omu maiso nambere hataliba bulemu. (Isaya 2:4; Yeremiya 29:11) Nitukusaba otuhikirre kumanya ebirukukiraho.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a UCCRO, rundi Ukrainian Council of Churches and Religious Organizations, kirumu amakanisa n’amakeleziya 15 agarukukiikirra aba Orthodox, Abakatuliki Abayonaani n’Abarooma, Abapurotesitanti, n’Abarokole otwaliiremu Abayudaaya n’Abasiraamu.