N’osobora ota Kukonyera Abaana Baawe Obubarukuba Nibatalibanizibwa Amakuru Amabi?

Obwire oburukukira obwingi habaho amakuru amabi ha tiivi, ha simu, ha tabbuleeti, na ha kompyuta. Kandi gabamu na vidiyo ezirukusoborra ebirukubazibwaho omu makuru.

Kandi abaana baba nibagarora.

N’osobora ota kukonyera abaana baawe batatalibanizibwa amakuru amabi?

• Amakuru gakwataho gata abaana?

• N’osobora ota kukonyera abaana baawe kutatalibanizibwa amakuru amabi?

• N’osobora kukora ki kakuba omwana waawe arora ekintu ekibi nikibaho?

Amakuru gakwataho gata abaana?

• Abaana baingi batabalinizibwa amakuru mabi agabarora. Abaana abamu nibasobora kutabaza omulingo behurramu obubarora amakuru amabi, kandi eki nikisobora kubatalibaniza muno.a Nibasobora n’okweyongera kwetuntura kakuba abazaire baabo beralikirra ekihinguraine.

• Abaana nibasobora kwetegereza kubi ebibarozere omu makuru. Ekyokurorraho, abamu nibasobora kutekereza ngu ebibarozere nibisobora kuhikaho ab’omu maka gaabo. Kandi abaana abato obubarora vidiyo emirundi nyingi, nibasobora kutekereza ngu ebintu ebibi nibikara nibibaho.

• Abaana nibasobora kutetegereza nk’oku abanyamakuru bakihinguraniza. Tibakimanyire ngu abanyamakuru baba nibakora sente nyingi abantu baingi obubarora amakuru gaabo. Nahabweki, abanyamakuru bongeramu ekisura omu makuru gaabo nukwo abantu baikale nibagahondera.

N’osobora ota kukonyera abaana baawe kutatalibanizibwa amakuru amabi?

• Batereho obwire obubasemeriire kumara ha tiivi. Kinu tikirukumanyisa ngu abaana baawe tibasemeriire kumanya ebirukubaho omu nsi. Baitu tikiri kirungi kwikara nibarora amakuru nugo gamu emirundi nyingi rundi kugahuliiriza.

  Maria n’agamba ati: “Obwire obumu, nyowe na iba nyowe tubazaaho ebibaire omu makuru, tutakimanyire ngu nikyeralikiriza abaana baitu.”

  Omusingi gwa: “Obujune obububa omu mutima gwomuntu buguinamya.”—Enfumo 12:25.

• Huliiriza kurungi kandi ogarukemu omu mulingo gw’embabazi. Kakuba kiba nikigumira omwana waawe kubazaaho ekintu ekibaireho, mugambire akiteere omu kisisani. Baza nauwe omu bigambo ebyarukwetegereza, kandi oyetantale kubazaaho ebintu ebitarukwetaagisa ebibaire omu makuru.

  Sarahi n’agamba ati: “Muhara waitu ahurra atekaine obutumuhuliiriza kurungi. Baitu tikisobora kumugasira obutumugambira tuti, ‘Enu niyo nyikara ey’eroho hati, tusemeriire kugimanyiira.’”

  Omusingi gwa Baibuli: “Omuntu arahukege okuhurra, naikaraho okutagamba.”—Yakobo 1:19.

• Konyera omwana waawe kwetegereza kurungi amakuru. Ekyokurorraho, abanyamakuru obubaba nibabazaaho omwana ow’aibirwe, bakikora omu mulingo oguleetera abarukugarora kutekereza ngu nabo nikisobora kubahikaho. Gambira abaana baawe ekyokozere kubalinda. Ekindi, ikara noijuka ngu abanyamakuru nibaija kwikara nibakibazaaho.

  Lourdes n’agamba ati: “Mukonyere abaana banyu kuleka kweralikirra. Obwire oburukukira obwingi, obuberalikirra muno kibarugirramu kutunga ebitekerezo ebitahikire. Nahabweki, kakuba tubakonyera kuteeka omutima ha bintu ebirungi nikiija kubakonyera kuteekana.”

  Omusingi gwa Baibuli: “Omutima ogwowamagezi nugwegesa akanwake, kandi nugwongera okwega ha minwaye.”—Enfumo 16:23.